Yersiz ajiotaj...

Bakı:

29 °C

48 %

3 m/s

Əlaqə

AZ RU EN

Ana səhifə / Sosial / Yersiz ajiotaj...

Yersiz ajiotaj...

21.04.2022 [10:04]

Qadınlar Polis Orqanlarında fəaliyyət göstərə biləcəkər

Ehsan Zahidov “Yeni Azərbaycan”a danışdı

Günel ABBAS

Ölkəmizdə mütəmadi olaraq bütün iş sahələrində gender bərabərliyinin təmini və qadın hüquqlarının qorunması ilə bağlı maarifləndirici tədbirlər aparılır. Prosesin gücləndirilməsi məqsədilə müvafiq qərarlar qəbul edilir. Bunun nəticəsidir ki, hətta ən ağır hesab edilən iş sahələrində belə qadınların kişilərlə bərabərhüquqlu çalışması təmin edilir. Son günlər KİV və sosial media platformalarında qadınların daxili işlər orqanlarında xidmətə və Polis Akademiyasına qəbulunun dayandırılması ilə bağlı müxtəlif məlumatlar yayılıb. Bu fikirlər cəmiyyətdə birmənalı qarşılanmayıb. Xüsusilə bu sahədə fəaliyyət göstərmək istəyən bir çox vətəndaşların narazılığına səbəb olub. “Yeni Azərbaycan” məsələni dəqiqləşdirmək üçün Daxili İşlər Nazirliyinin (DİN) mətbuat xidməti ilə əlaqə saxlayıb.

DİN-in Mətbuat Xidmətinin rəisi Ehsan Zahidov sorğumuza cavab olaraq bildirib ki, iddialar tamamilə əsassızdır və şayə xarakterlidir. Onun sözlərinə görə, gender (kişi və qadınların) bərabərliyinin təminatları haqqında Azərbaycan Respublikasının Qanununa uyğun olaraq DİN tərəfindən gender siyasəti daim diqqət mərkəzində saxlanılır. Eləcə də bu sahədə məqsədyönlü və sistemli tədbirlər həyata keçirilir. Qanuna uyğun olaraq Nazirlikdə gender məsələləri üzrə vəzifə də təsis olunub və həmin vəzifəni polis polkovnik-leytenantı rütbəsi daşıyan qadın əməkdaş icra edir”.

E.Zahidov qeyd edib ki, hazırda Azərbaycan Respublikasının daxili işlər orqanları şəxsi heyətinin 11 faizini qadın əməkdaşlar təşkil edir. “Bu da bir çox dövlətlərin anoloji göstəricilərindən yüksəkdir. Qadın həmkarlarımız polis serjantından polis polkovnikinə qədər xüsusi rütbə daşıyırlar. Bu gün Azərbaycan Polisi sıralarında polis nəfərindən tutmuş idarə rəisinə kimi xidmət edən qadın əməkdaşlar var. Bundan başqa, DİO-da xidmət edən qadınlar öz kişi həmkarları ilə çiyin-çiyinə ölkəmizdə sabitliyin və ictimai asayişin qorunması sahəsində üzərlərinə düşən vəzifələri böyük əzmlə yerinə yetirirlər.

Bununla yanaşı daxili işlər orqanlarının sıralarında idmanın cüdo, karate-do, stend və güllə atıcılığı və digər növləri üzrə dünya çempionatlarının və kuboklarının, beynəlxalq turnirlərin və Azərbaycan birinciliyinin qalibləri var. Bu gün qadın polis əməkdaşları respublikanın “ASAN xidmət” mərkəzlərində və daxili işlər orqanlarının istintaq, təhqiqat, pasport-qeydiyyat, statistika, “102 Zəng-Mərkəzi”, post-patrul, tibb və digər sahələrində vətəndaşlarımızın xidmətindədirlər”.

Nazirlik rəsmisi onu da vurğulayıb ki, hazırda qadın vətəndaşlarımız daxili işlər orqanlarında xidmətə yalnız Polis Akademiyasında təhsil alaraq qəbul olunmurlar. O cümlədən orta təhsili tam başa vurduqdan, digər mülki ali təhsil ocaqlarını bitirdikdən sonra DİN tərəfindən əvvəlcədən elan olunan müsabiqələri müvəffəqiyyətlə keçdikləri təqdirdə xidmətə qəbul olunurlar.

DİN mətbuat xidmətinin digər əməkdaşının sözlərinə görə isə hələ də akademiyaya qəbul üçün müraciət edən qadınlar var: “Sadəcə beşillik təhsil və bu müddətdəki fiziki hazırlıq məsələsi akademiyada həmin şəxslərə izah olunduqdan sonra müraciətlərini geri götürüblər. Yəni hazırda qadın vətəndaşların akademiyada olmaması bununla əlaqədardır. Bu o demək deyil ki, qadınların sənəd qəbuluna hansısa qadağa tətbiq olunub”.

Paylaş:

Baxılıb: 730 dəfə