Şütüyən ölüm

Bakı:

22 °C

52 %

3 m/s

Əlaqə

AZ RU EN

Ana səhifə / Sosial / Şütüyən ölüm

Şütüyən ölüm

17.03.2022 [10:19]

Yol qəzalarının sayı niyə artır?

Nicat DİLQƏMLİ

İnsan həyatının böyük bir hissəsi yollarda keçir. Belə olduğu halda bütün hərəkət iştirakçıları qaydalara riayət etməli, həm öz, həm də digərlərinin sağlamlığı üçün ehtiyat tədbirləri görməlidirlər. Dövlət Yol Polisi tərəfindən mütəmadi olaraq maarifləndirici məlumatlar paylaşılmasına, xəbərdarlıqlar edilməsinə baxmayaraq, hələ də yol qəzaları qurbanlarının sayı əfsuslar olsun ki, durmadan artır. Əgər diqqət yetirsək, avtoqəzaların sayı əsasən həftəsonlarında və bayram günlərində rekord həddə çatır. Demək olar, hər gün belə xəbərlərlə rastlaşırıq. Elə son iki ayın statistikasına nəzər saldıqda təxmin etmək olar ki, qarşıdan gələn bayram günlərində qəzaların sayında bir qədər də artım müşahidə edilə bilər. Belə ki, Baş Dövlət Yol Polisi İdarəsindən bildirilib ki, 2022-ci ilin yanvar-fevral aylarında respublika ərazisində 277 yol qəzası baş verib. Nəticədə 126 nəfər həlak olub, 225 nəfər isə yaralanıb. “Yaralıların sayı ötən ilə nisbətən 28 nəfər azdır”, - İdarədən qeyd edilib. Xüsusilə vurğulamaq yerinə düşər ki, son günlər baş verən qəzaların bir çoxunda piyadaların vurulması əksəriyyət təşkil edir. Demək ki, həm sürücülər, həm də piyadalar yol hərəkəti qaydalarına ciddi şəkildə əməl etməlidirlər.

Qarşıdan bayram gəlir. Təəssüf ki, həm də təhlükəyə bir az daha yaxın olmuş oluruq. Xüsusilə bayram günlərində özümüzü yol qəzalarından necə qoruyaq? Sürücülər və piyadalar hansı qaydalara əməl etməlidirlər?

Mövzu ilə bağlı fikirlərini “Yeni Azərbaycan”a bölüşən nəqliyyat eksperti Elməddin Muradlı bildirib ki, son günlər baş verən yol qəzalarının ağırlıq dərəcəsi artıb: “ Ötən ildə hadisələrin sayında artım qeydə alındı. Son baş verən hadisələrdə iki və ya daha artıq insanın həlak olması mütəmadi hal alıb. Son günlər baş verən avtoqəzalara nəzər yetirdikdə qəzaların ağırlıq dərəcəsinin artmasını görmüş oluruq”.

Ekspert hesab edir ki, insanların psixoloji durumu da avtoqəzaların artmasına səbəb olur: “Pandemiya səbəbindən insanlar arasında psixoloji gərginlik var. Heç kim heç kimə yol vermək istəmir, kimsə digərinin yoluna daxil oldusa, dava düşür. Sürücülər bir çox hallarda yola çıxarkən tələsirlər. Düşünürəm ki, bu kimi hallar da qəzalara səbəb olan əsas amillər sırasındadır”.

“Bir neçə il bundan öncə sürücülər tez-tez DYP əməkdaşlarının mütəmadi olaraq həyata keçirdikləri reydlərdən şikayətlənirdilər. İndi isə sanki sürücülərə bir növ sərbəstlik verilib və bunun nəticəsi qəzaların statistikasında özünü aydın şəkildə göstərir. Hesab edirəm ki, həm sözügedən reydlərin tez-tez keçirilməsi, həm də maarifləndirmə işlərinin aparılması baş verə biləcək qəzaların sayının azalmasına təsir göstərəcək. Bundan başqa, sürücülər də öz məsuliyyətlərini ciddi şəkildə dərk etməli, qanunlara birmənalı olaraq əməl etməlidirlər”, - deyə E.Muradlı sürücülərə müraciətində deyib.

Paylaş:

Baxılıb: 745 dəfə