Peyvənd sertifikatlarımız Avropada niyə tanınmır?

Bakı:

31 °C

45 %

4 m/s

Əlaqə

AZ RU EN

Ana səhifə / Sosial / Peyvənd sertifikatlarımız Avropada niyə tanınmır?

Peyvənd sertifikatlarımız Avropada niyə tanınmır?

28.12.2021 [10:17]

Nicat Dilqəmli

Ölkəmiz koronavirus pandemiyası ilə mübarizədə elə ilk günlərdən dünya ölkələri arasında ön sıradadır. Görülən işlərlə yanaşı, cəmiyyətin maarifləndirilməsi istiqamətində tədbirlər vətəndaşlarımızın pandemiyanın yarada biləcəyi təhlükədən xəbərdar olmasına səbəb olub. Buna görə də əhali uğurla davam etdirilən peyvəndlənmə prosesində aktiv iştirak edir.

Amma və lakin...

Amma bəzi məsələlər ölkəni tərk edən vətəndaşlar üçün ciddi problemə çevrilib. Belə ki, xüsusən Avropaya üz tutan soydaşlarımız bəzi məkanlara daxil olarkən peyvənd sertifikatlarından istifadə edə bilmirlər. Çətinliklə üzləşən vətəndaşlarımız sosial şəbəkələr üzərindən sözügedən problemlə bağlı öz narahatlıqlarını ifadə edirlər. Məlumatlarda, hətta “Pfizer” sertifikatının üzərindəki QR kodun da tanınmadığı bildirilir.

Deputat irad bildirib

Deputat Vüqar Bayramov da özünün sosial şəbəkə hesabında bir neçə gün öncə bu barədə paylaşım etmişdi. Millət vəkili İcbari Tibbi Sığorta üzrə Dövlət Agentliyi tərəfindən məlumatların elektronlaşması və Avropa Birliyi elektron sistemin inteqrasiyasına ehtiyac olduğunu vurğulayıb: “2021-ci ilin ilk ayından sonra sərt karantin tədbirləri tətbiq etmədən yoluxma sayında kəskin artımın qarşısının alınması təqdirəlayiqdir. Bununla yanaşı, Peyvənd Sertifikatının elektronlaşması və eləcə də onun regional qəbul edilməsi baxımdan təəssüf ki, problemlər qalmaqdadır. Belə ki, Azərbaycanda verilən Peyvənd Sertifikatı hələ də Avropa Birliyində elektron sistem tərəfindən tanınmır və oxunmur. Bu isə Peyvənd Sertifikatı olan Azərbaycan vətəndaşlarının bir sıra hallarda Avropada qapalı məkanlara daxil olmasını əngəlləyir. Çünki bizim vaksin sənəddə olan QR kodunu Avropada elektron sistem oxuya bilmir. Hətta “Pfizer” peyvəndindən istifadə edən vətəndaşlarımızın da Avropada qapalı məkanlara daxil olarkən oxşar problemlə üzləşirlər. Ötən həftə İtaliyada səfərdə olan zaman Avropa Birliyinin elektron bazasına inteqrasiya olunmamağın bizim vətəndaşlar üçün yaratdığı texniki problemləri müşahidə etdim. Bu baxımdan, bu istiqamətdə işlərin sürətləndirilməsi çox vacibdir. İcbari Tibbi Sığorta üzrə Dövlət Agentliyi tərəfindən məlumatların elektronlaşması və Avropa Birliyi elektron sistemin inteqrasiyasına ehtiyac var”.

“Qeyd edək ki, Avropa İttifaqında birliyə üzv olmayan ölkələrin elektron inteqrasiyası baxımdan hər hansı əngəl yoxdur. Sadəcə, həmin ölkələr uyğun sahədə inteqrasiya oluna bilən elektron bazalarını formalaşdırmalıdırlar. Yeri gəlmişkən, birliyə üzv dövlətlər ilə yanaşı, Avropa İttifaqına daxil olmayan 28 ölkə artıq qitənin elektron bazasına inteqrasiya olunub. Cənubi Qafqazda yerləşən digər iki ölkə, Türkiyə, Moldova, Ukraniya elektron inteqrasiya olunan ölkələr sırasındadır və həmin ölkələrin vətəndaşlarının QR kodları Avropada tanınır və oxunur. Bizim Peyvənd Sertifikatının QR kodu isə hələ də qədim qitə sərhədlərində tanınmır”,-deyə Vüqar Bayramov əlavə edib.

Sertifikatların qarşılıqlı tanınması üçün İşçi Qrup yaradılıb

Yaranan narahatlıqla bağlı Azərbaycan Respublikasının Səhiyyə Nazirliyinin mətbuat xidmətindən “Yeni Azərbaycan”a COVID-19 sertifikatlarının qarşılıqlı tanınması mexanizmlərinin işlənilməsi üçün İşçi Qrup yaradıldığı bildirildi: “Azərbaycan Respublikası Nazirlər Kabinetinin müvafiq Sərəncamına əsasən COVID-19 sertifikatlarının qarşılıqlı tanınması mexanizmlərinin işlənilməsi üçün İşçi Qrup yaradılıb. İşçi Qrupun təklifləri əsasında Azərbaycan Respublikası Nazirlər Kabinetinin 27 noyabr 2021-ci il tarixli 371 nömrəli “COVID-19 xəstəliyinə qarşı peyvənd olunmanı, peyvəndləməyə əks göstərişi, neqativ PZR test nəticəsini əks etdirən və COVID-19 xəstəliyinə yoluxmuş şəxslərin sağalaraq immunitetə malik olmalarını təsdiq edən sertifikatların tanınması ilə bağlı bəzi məsələlərin tənzimlənməsi haqqında Qərar”ı qəbul olunub. Bu Qərardan irəli gələrək aidiyyəti dövlət qurumlarının iştirakı ilə xarici ölkələrlə COVID-19 sertifikatlarının qarşılıqlı tanıdılmasına dair ilkin müzakirələr keçirilib”.

Mətbuat xidmətindən bildirilib ki, müzakirələrin yekunlarına dair ictimaiyyətə əlavə məlumatlar təqdim olunacaq.

Paylaş:

Baxılıb: 993 dəfə