Atalar “üç”dən deyib...

Bakı:

25 °C

78 %

3 m/s

Əlaqə

AZ RU EN

Ana səhifə / Sosial / Atalar “üç”dən deyib...

Atalar “üç”dən deyib...

09.12.2021 [11:00]

Bəs ÜST nə deyir?

MÜŞFİQƏ

“Buster” dozası məcburidirmi?

Dünyada koronavirusa yoluxma “həndəsi silsilə” ilə artır. Havaların da soyuq keçməsi ilə mövsümi xəstəliklərin çoxalması immun sisteminin zəifləməsinə gətirib çıxarır. Hazırda dünyanın ayrı-ayrı ölkələrində, eləcə də yeni dalğaların qarşısının alınması məqsədilə vaksinin üçüncü dozasının vurulmasına başlanılıb.

“Azərbaycan Respublikasında “COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq ölkə üzrə peyvəndlənmə prosesi davam edir və avqust ayından etibarən ölkədə “buster” dozanın vurulmasına başlanılıb. Azərbaycanda bu günə qədər vurulan vaksinlərin ümumi sayı 10 milyon 739 mindən çoxdur. Üçüncü - “buster” doza ilə peyvənd olunanların sayı isə 1 milyon 37 min 909 nəfər təşkil edir.

ÜST: Üçüncü doza yalnız immuniteti zəif olan insanlar üçün lazımdır

Ümumdünya Səhiyyə Təşkilatının (ÜST) Baş direktoru Tedros Qebreyesus bildirib ki, peyvəndlərin üçüncü dozası (buster) yalnız immuniteti zəif olan insanların çox kiçik bir qrupu üçün lazım ola bilər. Lakin hələlik ÜST, əhalinin bütün təbəqələri və xüsusilə də artıq tam peyvənd olunan sağlam insanlar üçün onların istifadəsinin əleyhinə çıxır.

Nə üçün üçüncü doza vaksin vurdurmalıyıq?

Üçüncü doza vurduranların əksəriyyəti təhsil və tibb işçiləridir. Məlum olduğu kimi, iki doza vaksin olunmuş təhsil və tibb işçiləri arasında koronovirusa yoluxanlar da var. Onların təbirincə desək, iki doza qorumadısa, üçüncü doza qoruyacaqmı?

TƏBİB-dən verilən məlumata görə, ilk iki dozanın vurulmasından sonra bir sıra peyvəndlərin növündən asılı olaraq üç, altı, səkkiz ay müddətində qoruyuculuğn davam etdiyi, sonra azalmağa başladığı müşahidə edildi. “Buster” doza isə gücləndirici, möhkəmləndirici məqsəd daşıyır. Yəni bu, heç də yeni bir peyvəndləmə prosesi deyil, ilk iki dozanın davamı olaraq əlavə gücləndirici dozadır, immuniteti gücləndirməyə xidmət edir.

Üçüncü doza kimlərə vurulmalıdır?

Qurumdan bildirilib ki, yaşlılar, xəstəliyə yoluxduğu təqdirdə onu ağır keçirmək riski olanlar, ilk iki dozanı alan və heç bir şübhəli hallarla üzləşməyən hər kəs üçüncü doza ilə əlaqədar müraciət edə bilər. İlk iki dozadan asılı olmayaraq, üçüncü doza təklif olunan istənilən peyvəndi seçmək olar.

Üçüncü doza sondurmu?

Üçüncü dozadan sonra dördüncü dozanın da vurulacağı haqqında indidən heç nə demək olmaz, ona ehtiyac olub-olmayacağını zaman göstərəcək. İcbari Tibbi Sığorta üzrə Dövlət Agentliyindən isə bildirilib ki, “İmmunitet sertifikatı” bitdikdən sonra 56 gün müddətində “buster” doza vurduran şəxslər müddətsiz “İmmunitet sertifikat”ı alacaq. Əgər “buster” dozanı vurdurmaq üçün tələb olunan vaxt yəni ki, 56 gün ötürülərsə, o zaman “Peyvənd sertifikatı” əldə etmək üçün hər iki doza vaksin vurulmalıdır.

Paylaş:

Baxılıb: 1133 dəfə