Elnur Babayev: İnsanların yanğın təhlükəsizliyi qaydalarına biganə yanaşması böyük fəlakətlərə yol aça bilər

Bakı:

25 °C

73 %

7 m/s

AZ RU EN

Ana səhifə / Sosial / Elnur Babayev: İnsanların yanğın təhlükəsizliyi qaydalarına biganə yanaşması böyük fəlakətlərə yol aça bilər

Elnur Babayev: İnsanların yanğın təhlükəsizliyi qaydalarına biganə yanaşması böyük fəlakətlərə yol aça bilər

06.08.2021 [08:52]

Məlum olduğu kimi, son vaxtlar qardaş Türkiyə də daxil olmaqla dünyanın bir sıra ölkələrində meşə yanğınları tüğyan edir. Bəzən təkcə meşələrin deyil, hətta kənd və qəsəbələrin belə alovlara qərq olması ilə nəticələnən bu yanğınların baş verməsində insan ehtiyatsızlığı əsas rol oynayır. Bu isə bizdən daha da ehtiyatlı olmağı tələb edir.
Öz növbəsində, mövzu ilə bağlı qəzetimizə açıqlama verən Fövqəladə Hallar Nazirliyinin (FHN) Dövlət Yanğın Nəzarəti Xidmətinin şöbə rəisi Elnur Babayev bildirib ki, insan ehtiyatsızlığı yaşayış sahələrində də yanğınlara yol aça bilər. Məsələn bəzən elektrik və qaz cihazlarının istismarı zamanı yanğın təhlükəsizliyi qaydaları pozulur: “Ölkəmizdə aparılan təhlillər zamanı müəyyən olunub ki, istehsalat və yaşayış sahələrində yanğın hadisələrinin böyük bir qismi elektrik xətlərinin və qurğularının istismarı, məişət elektrik cihazlarından istifadə zamanı yanğın təhlükəsizliyi qaydalarının pozulması səbəbindən baş verir. Elektrik qurğularının istismarı, elektrik avandanlıqları və cihazlarının istifadəsi zamanı yanğın təhlükəsindən uzaq olmaq üçün bir sıra qaydalara əməl olunması vacibdir. Eləcə də qaz cihazlarının istismarı zamanı təhlükəsizlik qaydaları pozulur. Sobaların, qaz cihazlarının üstündə və bilavasitə yaxınlığında paltar qurudulur. Bu da yanğına səbəb olan amillərdəndir”.
Şöbə rəisi vətəndaşların evlərində yanğınsöndürən balon saxlamasını məsləhət görür: “Tövsiyə edərdim ki, mənzildə, fərdi evdə quru kimyəvi tozlu yanğınsöndürən balonları olsun. Öz evimdə 6 kq-lıq yanğınsöndürən balonum var. Qəfil elektrik təsərrüfatında adi bir qısaqapanma olar, pərdəyə keçməklə yanğının miqyası böyüyə bilər. Bildiyiniz kimi, elektrik xəttinə su vurmaq mümkün olmadığı üçün onu yanğınsöndürən balonlardan istifadə edərək söndürmək lazımdır. Bir metr məsafədən 1000 V-dək gərginliyə istifadə etmək olar”.
Müsahibimiz onu da vurğulayıb ki, eləcə də bütün avtomobillərdə yanğınsöndürən balonu olmalıdır. Balon isə yük yerində deyil, avtomobilin salonunda saxlanılmalıdır ki, hadisə baş verdikdə avadanlıq əlçatan olsun: “Bir daha əhalini diqqətli olmağa, təhlükəsizlik məsələlərində fəal iştirak etməyə və belə hallarla üzləşdikdə dərhal Fövqəladə Hallar Nazirliyinin “112” qaynar xətti”nə məlumat verməyə çağırıram. Bununla yanaşı, insanlar soyuqqanlı davranıb yanğını söndürməyə çalışmalı, elektrik təsərrüfatını ayırmağa imkan varsa, xətdən ayırmalıdırlar. Unutmayaq ki, hər saniyənin belə öz hökmü var”.
“Meşələrdə isə yanğın hadisələrinin baş verməsinin bir çox hallarda səbəbkarı insanlardır. İnsanların yanğın təhlükəsizliyi qaydalarına biganə yanaşması böyük fəlakətlərə yol aça bilər. Meşə ərazisində olarkən piknik edirlər, ocaq qalayırlar, ancaq ocağın söndüyünə əmin olmadan qoyub gedirlər. Azərbaycanın bu zəngin təbiətini gələcək nəsillərimiz üçün qoruyub saxlamalıyıq. Belə səhlənkarlığa yol vermək olmaz. Nəticəsi daha acınacaqlı olur. Elə hallar var ki, bu hadisə insan itkisi ilə nəticələnə bilər”, - deyə Elnur Babayev vurğulayıb.
MÜŞFİQƏ

Paylaş:

Baxılıb: 823 dəfə