Azərbaycanda hər kəs qanun qarşısında bərabərdir

Bakı:

22 °C

64 %

4 m/s

Əlaqə

AZ RU EN

Ana səhifə / Sosial / Azərbaycanda hər kəs qanun qarşısında bərabərdir

Azərbaycanda hər kəs qanun qarşısında bərabərdir

05.08.2021 [09:11]

Müstəqil Azərbaycan demokratik və hüquqi dövlət quruculuğuna davamlı şəkildə güclü siyasi iradə nümayiş etdirərək bu yolla inamla irəliləyir. Qısa müstəqillik tarixində respublikamızda demokratik təsisatların yaradılması və onların funksionallığının təmin edilməsi, həmçinin bütün fəaliyyət sferaları üçün zəruri hüquqi bazanın qurulmasından ötrü məqsədyönlü tədbirlər görülüb və genişmiqyaslı islahatlar həyata keçirilib. Bu xüsusda söhbət açarkən 1995-ci il noyabrın 12-də ümumxalq səsverməsi yolu ilə Konstitusiyanın (Əsas Qanunun) qəbul edilməsinin önəmini xüsusi qeyd etmək lazımdır. Ulu Öndər Heydər Əliyevin rəhbərliyi ilə hazırlanan bu Konstitusiya respublikamızda demokratik cəmiyyət və hüquqi dövlət quruculuğu üçün fundamental baza rolunu oynayır. Dünyanın qabaqcıl ölkələrinin təcrübəsi, yeni çağırışlar və milli maraqlarımız maksimum dərəcədə nəzərə alınan Konstitusiyamızda hüquqi dövlətin bütün prinsipləri - qanunun aliliyi, insan hüquqlarının müdafiəsi, hakimiyyət bölgüsü, konstitusiya nəzarəti prinsipləri təsbit olunub, insan haqlarının təmini dövlətin ali məqsədi kimi bəyan edilib. Qeyd edək ki, Konstitusiyamızın üçdə bir hissəsi məhz bu məsələyə həsr olunub.
Eyni zamanda, son 18 ildə Prezident İlham Əliyevin imzaladığı Fərman və sərəncamlar əsasında reallaşdırılan islahatlar ölkəmizin məhkəmə-hüquq sisteminin daha da təkmilləşməsini, bu sahədə dünyada mövcud olan ən yüksək standartların respublikamızda da tətbiqini, insan və vətəndaş hüquq və azadlıqlarının çərçivəsinin daha da genişləndirilməsini, cəza siyasətinin humanistləşdirilməsini təmin edib. Tam qətiyyətlə deyə bilərik ki, bu gün müstəqil Azərbaycanda hüquqi dövlətin fundamental prinsipləri dəqiq şəkildə müəyyənləşdirilib, zəruri qanunvericilik bazası yaradılıb və münasibətlərin hüquq müstəvisində tənzimlənməsi üçün bütün şərtlər təmin olunub. Azərbaycanda identik bir mənzərə formalaşıb. Belə ki, bir tərəfdən, ölkəmizdə qəbul olunan və konseptual baxımdan bir-birini tamamlayan sənədlər sosial mənşəyindən asılı olmayaraq, hamının qanunlar qarşısında bərabərliyini özündə ehtiva edir. Yəni kiminsə respublikanın icra strukturlarında vəzifə tutması və yaxud qanunvericilik orqanında, başqa belə nüfuzlu qurumda təmsil olunması digər kateqoriyalardan olan vətəndaşların hüquq və azadlıqlarını məhdudlaşdırmasına qətiyyən yol vermir. Digər tərəfdən, biz şahidi oluruq ki, respublikanın siyasi rəhbərliyi, şəxsən Prezident İlham Əliyev müxtəlif auditoriyalarda çıxışları zamanı daim məmurları sadə və təvazökar olmağa, qanunlara, hüquqi tələblərə əməl etməyə çağırır və bildirir ki, özbaşınalıq edənlər, qanunlarımızın aliliyini pozanlar mütləq cəzalarını alacaqlar.
Yeri gəlmişkən, bu günlərdə deputat Eldəniz Səlimov tərəfindən törədilən əmələ görə hüququn dərhal tətbiq edilməsi də bunu bir daha əyani şəkildə təsdiqlədi. Xəbər verildiyi kimi, Azərbaycan Respublikası Konstitusiyasının 90-cı maddəsinin ikinci hissəsinə uyğun olaraq, Azərbaycan Respublikasının Baş prokuroru iyulun 30-da Milli Məclisə təqdimatla müraciət edib. Təqdimatda parlamentin deputatı Eldəniz Adil oğlu Səlimovun toxunulmazlığına xitam verilməsi xahiş olunub. Avqustun 3-də Milli Məclisin növbədənkənar sessiyasının iclasında geniş müzakirələr aparıldıqdan sonra deputat Eldəniz Adil oğlu Səlimovun toxunulmazlığına xitam verilməsi haqqında Milli Məclisin qərar layihəsi səsə qoyularaq təsdiqlənib. Milli Məclisin bu qərarı Eldəniz Səlimov barəsində zəruri istintaq hərəkətlərinin həyata keçirilməsi üçün qanuni əsas yaradıb. Sonrakı mərhələdə isə Eldəniz Səlimov barəsində məhkəmənin qərarı ilə həbs qətimkan tədbiri seçilib. Beləliklə, deputat Eldəniz Səlimova münasibətdə törətdiyi əmələ görə adekvat hüquqi tədbirlərin görülməsi bir daha göstərdi ki, Azərbaycanda hamı qanunlarımız qarşısında bərabərdir.
Mübariz ABDULLAYEV

Paylaş:

Baxılıb: 788 dəfə