“AstraZeneca” peyvəndi və onun müsbət təsirləri ilə bağlı kifayət qədər elmi tədqiqatlar mövcuddur

Bakı:

25 °C

57 %

1 m/s

AZ RU EN

Ana səhifə / Sosial / “AstraZeneca” peyvəndi və onun müsbət təsirləri ilə bağlı kifayət qədər elmi tədqiqatlar mövcuddur

“AstraZeneca” peyvəndi və onun müsbət təsirləri ilə bağlı kifayət qədər elmi tədqiqatlar mövcuddur

24.04.2021 [09:50]

Azərbaycanda yeni növ koronavirus (COVID-19) infeksiyasına qarşı ardıcıl və məqsədyönlü mübarizə davam etdirilir. Paralel olaraq bu gün ölkəmizdə əhalinin vaksinasiya işləri uğurla həyata keçirilir. Yeri gəlmişkən, bildirək ki, COVAX platforması vasitəsilə ölkəmizə “AstraZeneca” tərəfindən istehsal olunan 84 min doza COVID-19 peyvəndi gətirilib. Bu, ilk partiyadır. Ümumilikdə, “AstraZeneca” şirkətinə məxsus 432 000 doza COVID-19 vaksininin mayın sonunadək Azərbaycana idxalı nəzərdə tutulur.

Vurğulamaq yerinə düşər ki, mütəxəssislər “AstraZeneca” peyvəndi və onun müsbət təsirləri ilə bağlı kifayət qədər elmi tədqiqatların mövcud olduğunu qeyd edirlər. Bildirilir ki, aparılan elmi tədqiqatlarda peyvənd olunan şəxslərdə virus yükünün xeyli aşağı endiyi məlum olub.

Yeri gəlmişkən, həkim-infeksionist Tərlan Osmanov açıqlamasında deyib ki, vaksinasiya daha sürətlə və kütləvi şəkildə davam etdirilməlidir, çünki həmin proses əhali arasında geniş vüsət aldıqca yoluxma halları və əsasən də ağırlaşmalar daha az müşahidə ediləcək: “İndi biz həkim-infeksionistlərin də ən başlıca vəzifəsi bu mühüm və taleyüklü məsələ barəsində əhali arasında daha dolğun və hərtərəfli maarifləndirmə və təşviqat işi aparmaq, peyvəndlənmənin üstünlüklərini onlara başa salmaq və normal həyata qayıtmağın bu prosesdən keçdiyini izah etməkdən ibarətdir”.

O bildirib ki, ilk dozanı qəbul etdikdən yalnız 2 həftə sonra müdafiə sistemi yaranmağa başlayır, peyvənddən maksimal effekt isə ikinci dozadan sonra meydana gəlir: “İmmuniteti formalaşdırmaq üçün orqanizmə müəyyən qədər vaxt lazım olduğundan həmin dövrdə koronavirusa qarşı təhlükəsizlik qaydalarına tam və ciddi surətdə riayət etmək mütləqdir. Tibbi maskadan istifadə etmək və sosial məsafə saxlamaq yenə də riayət edilməli olan ən vacib qaydalar olaraq qalır”.

Mütəxəssis əhalini qaydalara riayət etməyə, qoruyucu maska taxmağa, sosial məsafəni qorumağa, insanlarla az təmasda olmağa, kütləvi toplaşma yerlərindən uzaq olmağa, ictimai-iaşə obyektlərinə mümkün qədər üz tutmamağa çağırır: “Vətəndaşlardan xahiş edirəm ki, bu bəlanın qarşısını almaq üçün öz öhdələrinə düşən vəzifələri yerinə yetirsinlər. Bu bəladan qurtulmaq vəzifəsi təkcə dövlətin, həkimlərin üzərinə düşməməlidir. “Gözəgörünməz düşmən”lə mübarizədə hər kəs birlik nümayiş etdirməlidir. Ona görə də vətəndaşları vaksinasiyada aktiv iştirak etməyə çağırıram”.

MÜŞFİQƏ

Paylaş:

Baxılıb: 759 dəfə