“Vaksinasiyanın alternativi yoxdur”

Bakı:

26 °C

53 %

9 m/s

Əlaqə

AZ RU EN

Ana səhifə / Sosial / “Vaksinasiyanın alternativi yoxdur”

“Vaksinasiyanın alternativi yoxdur”

05.03.2021 [08:58]

Hazırda ölkəmizdə yeni növ koronavirus (COVID-19) infeksiyası əleyhinə peyvəndləmə aparılır. İndiyədək Azərbaycanda 337 mindən çox vətəndaş COVID-19 əleyhinə vaksinasiyadan keçib. Mütəxəssislərin qənaəti budur ki, yeni növ koronavirus (COVID-19) infeksiyasına qarşı tətbiq edilən peyvəndlər uğurlu nəticələr verir.
Öz növbəsində həkim-terapevt Rəmziyyə Əliyeva qəzetimizə açıqlamasında bildirib ki, Azərbaycan Cənubi Qafqazda vaksinasiyaya ilk başlayan və ən təhlükəsiz, ən effektli vasitələrin gətirilməsini təmin edən ölkədir. Onu sözlərinə görə, Azərbaycanın koronavirus əleyhinə vaksini qısa müddət ərzində ölkəyə gətirməsi nəzərəçarpacaq uğurdur.
Rəmziyyə Əliyeva bildirib ki, tərəddüd etmədən peyvəndi vurdurmaq və bununla da həm özümüzü, həm də cəmiyyətimizi narahat edən bu bəladan xilas olmaq lazımdır: “Sözsüz ki, pandemiya ilə mübarizədə çox mühüm bir mərhələyə gəlib çatmışıq. Vaksinasiya pandemiya ilə mübarizə üçün çox önəmlidir. Buna görə də hər kəsin peyvənd olunmasını tövsiyə edirəm. Mən peyvəndin ikinci dozasını da vurdurmuşam. Vətəndaşlar vaksinin yeganə çıxış yolu olduğunu dərk edir və prosesə sürətli şəkildə qoşulurlar. İndi biz oturub nə virusun mutasiyaya uğrayıb zəifləməsini, nə də əhalinin çox böyük bir hissəsinin virusa yoluxaraq immunitet qazanmasını gözləyə bilərik. Ona görə də vaksinasiyanın alternativi yoxdur”.
Mütəxəssis peyvənd vurduranlara gün ərzində hamama girməməyi, yumurta və sitrus meyvələri ilə qidalanmamağı məsləhət görür: “Kişilərə alkoqollu içkilər qəbul etməmək və siqaret çəkməmək barədə xəbərdarlıq edilir. Peyvənd vurulandan sonra üç gün ərzində terapevt və sahə tibb bacıları evlərə zəng edərək əlaqə saxlayır, inyeksiya edilənlərin özlərini necə hiss etmələri, temperatur, öskürək, boğaz və baş ağrıları olub-olmaması ilə maraqlanırlar. Şükürlər olsun ki, indiyədək belə əlavə təsirlər müşahidə edilməyib”.
“Xatırlayırsınızsa, keçən ilin yayında vətəndaşlar arxayınlaşdı və bu da rəqəmlərin pik həddə çatması ilə nəticələndi. Həmin səhvi bir daha təkrarlamamaq lazımdır. Çünki yoluxma hallarının və aktiv xəstələrin sayının az olması pandemiyanın bitməsi demək deyil. Xəstəliyin yayılması və artması həm də əhalinin sanitar-gigiyenik qaydalara necə əməl etməsi ilə əlaqədardır. Vətəndaşlar arxayınlaşmamalı, qoyulan tələblərə, mütəxəssislərin tövsiyələrinə əməl etməlidirlər. Kütləvi toplanma yerlərindən uzaq olmaq, tibbi maska taxılması, sosial məsafənin gözlənilməsi, əl gigiyenasına əməl edilməsi, dezinfeksiyaedici vasitələrdən istifadə edilməsi vacibdir”, - deyə R.Əliyeva xatırladıb.
MÜŞFİQƏ

Paylaş:

Baxılıb: 708 dəfə