“Praqmatik xarici siyasət kursu nəticəsində Azərbaycanın beynəlxalq nüfuzu daha da artıb”

Bakı:

19 °C

72 %

7 m/s

Əlaqə

AZ RU EN

Ana səhifə / Sosial / “Praqmatik xarici siyasət kursu nəticəsində Azərbaycanın beynəlxalq nüfuzu daha da artıb”

“Praqmatik xarici siyasət kursu nəticəsində Azərbaycanın beynəlxalq nüfuzu daha da artıb”

30.12.2020 [09:21]

“Yeni Azərbaycan” qəzeti KİVDF-nin elan etdiyi müsabiqə üzrə bu mövzuda onlayn “dəyirmi masa” keçirib
“Yeni Azərbaycan” qəzeti Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) elan etdiyi müsabiqə üzrə layihələrin icrası çərçivəsində müvafiq mövzuların müzakirəsi ilə bağlı onlayn “dəyirmi masa”ları davam etdirir. Dekabrın 29-da növbəti “dəyirmi masa” “Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığın inkişaf etdirilməsi” istiqaməti üzrə “Praqmatik xarici siyasət kursu nəticəsində Azərbaycanın beynəlxalq nüfuzu daha da artıb” mövzusunda keçirilib.
“Yeni Azərbaycan” qəzetinin şöbə redaktoru, layihə rəhbəri Nurlan Qələndərlinin moderatorluğu ilə keçirilən “dəyirmi masa”da YAP Suraxanı rayon təşkilatının sədri Vüqar Seyidov və tarix üzrə fəlsəfə doktoru, dosent Mehman Şabanov iştirak ediblər.
Tədbirdə 2020-ci ilin xalqımız üçün Zəfər ili olduğu, Prezident, Müzəffər Ali Baş Komandan İlham Əliyevin rəhbərliyi ilə Azərbaycanın işğal altında olan torpaqlarını azad edərək ərazi bütövlüyünü və tarixi ədaləti bərpa etdiyi vurğulanıb. Bildirilib ki, həyata keçirilən praqmatik, milli maraqlara əsaslanan və çoxvektorlu xarici siyasət kursu Azərbaycanın beynəlxalq mövqeyinin daha da möhkəmlənməsini şərtləndirib.
Ölkəmiz, həmçinin qlobal problemlərin həllinə, regional və beynəlxalq əməkdaşlığın inkişafına, təhlükəsizliyin möhkəmlənməsinə mühüm töhfələr verib. Azərbaycanın təşəbbüsü ilə Türkdilli Dövlətlərin Əməkdaşlıq Şurasının və 120 dövlətin təmsil olunduğu Qoşulmama Hərəkatının COVID-19-a qarşı mübarizəyə həsr olunmuş videoformatda Zirvə görüşünün keçirilməsi bu kontekstdə mühüm əhəmiyyətə malikdir. Eyni zamanda, bu ilin dekabr ayında Qoşulmama Hərəkatının sədri qismində Azərbaycanın təşəbbüsü əsasında və 150-dən artıq dövlətin dəstəklədiyi BMT Baş Assambleyasının koronavirusa qarşı dövlət və hökumət başçıları səviyyəsində Xüsusi sessiyası keçirilib ki, bu da ölkəmizin bəşəriyyət üçün taleyüklü məsələlərin həllində aktiv rol oynadığını göstərən faktlardandır. Həmçinin bütün bu faktlar respublikamızın yüksək nüfuzunun və beynəlxalq miqyasda Azərbaycana böyük etimadın bariz göstəricisidir.
Onlayn “dəyirmi masa”da mövzu ilə əlaqədar geniş fikir mübadiləsi aparılıb.

Paylaş:

Baxılıb: 663 dəfə