Vətən müharibəsinin qəhrəmanları: Hər şey yaxşıdır, təminatımız da yüksək səviyyədədir, evdəkilər bizdən narahat olmasınlar

Bakı:

27 °C

48 %

2 m/s

AZ RU EN

Ana səhifə / Sosial / Vətən müharibəsinin qəhrəmanları: Hər şey yaxşıdır, təminatımız da yüksək səviyyədədir, evdəkilər bizdən narahat olmasınlar – Tərtərdən reportaj

Vətən müharibəsinin qəhrəmanları: Hər şey yaxşıdır, təminatımız da yüksək səviyyədədir, evdəkilər bizdən narahat olmasınlar – Tərtərdən reportaj

26.12.2020 [09:09]

Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə Heydər Əliyev Fondu və “Bravo” supermarketlər şəbəkəsinin işğaldan azad olunmuş ərazilərdə xidmət edən hərbi qulluqçularımız üçün dəstək aksiyası davam edir.

AZƏRTAC-ın bölgə müxbiri xəbər verir ki, növbəti belə tədbir Tərtər rayonunda təşkil edilib. Dekabrın 25-də Tərtər rayonunun işğaldan azad edilmiş Suqovuşan kəndinə səfər edərkən yeni yolun inşa edilməsinin, təmir və abadlıq işlərinin aparıldığının şahidi olduq. Ali Baş Komandan İlham Əliyevin rəhbərliyi ilə müzəffər ordumuzun işğaldan azad etdiyi digər yaşayış məntəqələrimiz kimi, Suqovuşana da həyat yenidən qayıdır. Çox keçməyəcək ki, Suqovuşan sakinləri doğma kəndlərinə dönəcəklər.

Azərbaycan əsgəri qəhrəmanlıq və şücaət göstərərək işğaldan azad etdiyi Vətən torpaqlarında xidmətini yüksək əhval-ruhiyyə ilə aparır. Çünki onlar qalib ordunun əsgərləridirlər. Silahlı qüvvələrimiz dövlətin hərtərəfli qayğısı ilə əhatə olunub. Ən ucqar məntəqədə xidmət edən hərbi qulluqçuların yemək, geyim və digər təminatı da daim diqqətdə saxlanılır.

“Bravo” supermarketlər şəbəkəsinin nümayəndələri əsgər və zabitlərlə səmimi söhbət edib, onların istəklərini qeydə alıblar. Gətirilən müxtəlif qida məhsulları, fərdi qulluq və gigiyenik ləvazimatlardan ibarət bağlamalar hərbi qulluqçularımıza çatdırılıb.

Hərbçilər onlara göstərilən diqqət və qayğıya görə Birinci vitse-prezident Mehriban Əliyevaya, Heydər Əliyev Fonduna və “Bravo” supermarketlər şəbəkəsinə minnətdarlıqlarını bildiriblər.

Əsgərlərlə söhbət edərkən hər birində yenilməz əzmin, məğrurluğun, Vətən sevgisinin və qələbə sevincinin şahidi olduq. Əsgər Emin Abbasov Vətən müharibəsinin iştirakçısı olduğu, torpaqlarımızın azad edilməsində iştirak etdiyi üçün qürur duyduğunu bildirib: "Suqovuşan uğrunda gedən döyüşlərdə iştirak etmişəm. Yaralansam da, sağaldıqdan sonra yenidən döyüşlərə qayıtdım. Hazırda da Suqovuşanda xidmətimi davam etdirirəm. Əhval-ruhiyyəmiz yüksəkdir. Qarabağ Azərbaycandır".

Əsgər Emil Məmmədzadə isə deyib: "Tək istəyimiz işğal altında olan torpaqlarımızı azad etmək idi. Buna da nail olduq. Suqovuşan uğrunda döyüşdə iştirak etdim. Şükür Allaha ki, qələbə qazandıq, torpaqlarımızı azad etdik”.

Hərbçilərimizin təminatı ilə maraqlanarkən hər birinin dilindən eyni sözləri eşitdik: “Hər şey yaxşıdır, təminatımız da yüksək səviyyədədir. Evdəkilər bizdən narahat olmasınlar". Beləliklə, bir daha şahidi olduq ki, Vətən müharibəsinin qəhrəmanları azad etdikləri doğma torpaqlarımızda xidmətlərini qələbə əhval-ruhiyyəsi ilə aparırlar.

Paylaş:

Baxılıb: 702 dəfə