COVID-19-a qarşı mübarizə: özümüzü qoruyaq, cəmiyyəti xilas edək

Bakı:

17 °C

72 %

2 m/s

Əlaqə

AZ RU EN

Ana səhifə / Sosial / COVID-19-a qarşı mübarizə: özümüzü qoruyaq, cəmiyyəti xilas edək

COVID-19-a qarşı mübarizə: özümüzü qoruyaq, cəmiyyəti xilas edək

03.12.2020 [09:55]

Hər gün minlərlə ölkə vətəndaşı yeni növ koronavirus (COVID-19) infeksiyasına yoluxur. Ümumilikdə, yoluxma dinamikası ciddi narahatlıq doğurur. Ona görə də hər bir insana potensial virus daşıyıcısı kimi yanaşmalı və özümüzü ondan qorumalıyıq. Eyni zamanda, hər kəs müəyyən olunmuş bütün qaydalara əməl etməlidir. Unutmamalıyıq ki, sağlamlığımız öz əlimizdədir və biz özümüzü qorumaqla bütövlükdə cəmiyyəti bu qlobal bəladan mühafizə edə bilərik.
Ekspertlər tibbi maska taxmaq, sosial məsafə saxlamaq və sanitar-gigiyenik normalara əməl etməklə yanaşı, qidalanmaya da xüsusi diqqət göstərilməsini vurğulayırlar. Xüsusilə də, COVID-19 xəstələri həkim nəzarətində olmaqla yanaşı, qidalanmalarına fikir verməlidirlər.
Qida rejimi müstəsna əhəmiyyət daşıyır
Məsələ ilə bağlı qəzetimizə açıqlama verən həkim-dietoloq Ləman Süleymanovanın fikrincə, koronavirusa yoluxanların gündəlik qida rasionuna bitki mənşəli yağların əlavə olunması zəruridir: “Lakin kətan, zeytun və kərə yağı da daxil olmaqla yeməklərin tərkibində müxtəlif növ yağların miqdarına xüsusi diqqət yetirmək lazımdır. Bundan başqa, hüceyrələri yeniləyən, bağırsaq iltihabını aradan qaldıran, xolesterini azaldan avakado belə vaxtda ən faydalı meyvələrdən biri hesab olunur. Un məmulatları, o cümlədən müxtəlif növ şirniyyatlarla qidalanmaq koronavirusdan sağalma prosesini ləngidir. Orqanizmi zəiflədən şirin məhsullardan, xəmir xörəklərindən və digər oxşar qidalardan tamamilə imtina edilməli, daha faydalı qidalara üstünlük verilməlidir. Əks halda, xəstəlik daha uzun müddət davam edə bilər”.
Onun sözlərninə görə, koronavirusa yoluxanların masasında toyuq, balıq və krevetlər, müxtəlif növ dənli bitkilər, tərəvəz salatları, göyərti və C vitamini ilə zəngin olan meyvələr əskik olmamalıdır. Narıngi, portağal, kök və kividən istifadə etmək də faydalıdır. Tərkibində bol vitaminlər və zülallar olan həmin qidalar xəstəliyə qalib gəlməyə kömək edir.
COVID-19 testi verənlər nəyi bilməlidirlər?
Mərkəzi Gömrük Hospitalının həkim-pediatrı Təranə Göyüşova isə yeni növ koronavirus (COVID-19) infükaiyası ilə əlaqədar verilən testlərinin nəticələri barədə söhbət açıb. Bildirib ki, həmin testlər kütləvi müayinə üçün nəzərdə tutulub və əksər hallarda düzgün nəticə verir. İki gün sonra əlamətlər davam etsə və şübhə yaranarsa, yenidən test vermək olar: “Testdən üç saat əvvəl su içmək, qida qəbul etmək, siqaret çəkmək və burun boşluğuna heç bir sprey istifadə etmək olmaz. Burun keçidlərində kifayət qədər dərindən nümunə götürülməyibsə və yaxud xəstə burnunu silmiş və ya yumuşsa, o zaman testin cavabı səhv ola bilər. Həmçinin boğazdan yaxma götürülməzdən əvvəl xəstə ağzını antiseptik məhlulla yaxalamamalı, dişlərini fırçalayanda, ağız boşluğunu yaxalayanda su çox dərinə getməməli və qida qəbul edilməməlidir. Bununla yanaşı, laboratoriya qaydaları da var”.
MÜŞFİQƏ

Paylaş:

Baxılıb: 642 dəfə