Həmrəy olaq, COVID-19-a birlikdə qalib gələk!

Bakı:

15 °C

88 %

0 m/s

Əlaqə

AZ RU EN

Ana səhifə / Sosial / Həmrəy olaq, COVID-19-a birlikdə qalib gələk!

Həmrəy olaq, COVID-19-a birlikdə qalib gələk!

24.11.2020 [08:54]

“Xəstəlik nə qədər erkən aşkar olunarsa və ona qarşı doğru müalicə aparılarsa, effektivliyi bir o qədər yüksək olar”
Dünya ölkələrində yeni növ koronavirus (COVID-19) infeksiyasına yüksək yoluxma dinamikası müşahidə olunur. Məlumat üçün bildirək ki, hazırda dünyada 57 milyon insan koronavirusa yoluxub, 1,4 milyon insan isə bu virusun qurbanı olub. Bu səbəbdən bir çox ölkələrdə yenidən sərt karantin qaydaları tətbiq edilir, müvafiq məhdudlaşdırıcı tədbirlər həyata keçirilir. Bütün dünyada olduğu kimi, Azərbaycanda da COVID-19 xəstəliyinə yoluxma halları davam etməkdədir. Nazirlər Kabineti yanında Operativ Qərargahın məlumatına əsasən, Azərbaycanda virusun yayılması və onun törədə biləcəyi fəsadların qarşısının alınması məqsədilə ölkə ərazisində xüsusi karantin rejiminin müddəti 2020-ci il 28 dekabr saat 06:00-dək uzadılıb. Bununla belə, son günlərdə COVID-19 virusuna yüksək yoluxma dinamikası qeydə alındığından bir sıra qadağaların tətbiq edilməsinə qərar verilib. Ekspertlər ölkəmizdə həyata keçirilən bütün tədbirlərin vətəndaşların sağlamlığının qorunmasına xidmət etdiyini bildirirlər. Eyni zamanda, sosial məsafənin qorunması və tibbi maskalardan istifadənin zəruriliyi, sanitar-gigiyenik qaydalara düzgün riayət olunması, kütləvi toplaşmamağın vacibliyi ilə bağlı mütəmadi olaraq çağırışlar edilir.
Koronavirusla mübarizədə həmrəy olmağa səsləyən Azərbaycan Tibb Universitetinin Ağciyər xəstəlikləri kafedrasının müdiri, dosent Rafiq Bayramov bildirib ki, son günlər dünyanın bir çox ölkələrində olduğu kimi, ölkəmizdə də koronavirusa yoluxanların sayında ciddi artım var. Onun sözlərinə görə, buna havaların soyuması və həm də bununla bağlı insanların daha çox qapalı məkanlarda olmasının təsiri böyükdür: “Koronavirus və digər infeksiyalara qarşı mübarizənin əsas yollarından biri qorunmadır. Bu məqsədlə hər kəs həmrəy olaraq karantin qaydalarına ciddi əməl etməli, qoruyucu maskadan düzgün istifadə etməli, ciddi ehtiyac olmadığı halda evdən çıxmamalı və qapalı, insanların sıx toplaşdığı yerlərdən kənar olmağa çalışmalıdır. Amma yaddan çıxarmamalıyıq ki, tənəffüs infeksiyalarına yoluxmadan qorunmaq sözlə ifadə edildiyi qədər asan deyil və bu infeksiyalara yoluxanların hamısı xəstələnmir və ya xəstələnənlərin hamısında xəstəliyin gedişi və ağırlığı eyni olmur. Burada orqanizmin fərdi xüsusiyyətlərinin (genetik, yaş, yanaşı xəstəlik və s.) rolu böyükdür. Ona görə də karantin qaydalarına əməl edərək koronavirusa yoluxmadan qorunmaqla yanaşı, orqanizmin bu infeksiyaya qarşı mübarizə qabiliyyətinin də normal saxlanılması vacibdir”.
Vurğulanıb ki, bu məqsədlə də normal gün rejimi (normal yuxu, istirahət), kəmiyyət və keyfiyyətcə normal qidalanma ( xüsusilə, Vitamin C və zülallarla zəngin qidalar - meyvə-tərəvəz, ət, balıq və s.), soyuqlamadan və stressdən qorunmaq lazımdır: “Əgər hərarətin yüksəlməsi, kürəkdə ağrı, iybilmə-dadbilmə hissinin pozulması, halsızlıq, tərləmə, təngnəfəslik, öskürək və s. olarsa, koronavirusa görə müayinədən keçmək lazımdır. Hər kəs unutmamalıdır ki, xəstəlik nə qədər erkən aşkar olunarsa və ona qarşı doğru müalicə aparılarsa, effektivliyi bir o qədər yüksək olar”.
MÜŞFİQƏ

Paylaş:

Baxılıb: 763 dəfə