Koronavirus pandemiyası davam edir

Bakı:

17 °C

82 %

0 m/s

Əlaqə

AZ RU EN

Ana səhifə / Sosial / Koronavirus pandemiyası davam edir

Koronavirus pandemiyası davam edir

18.11.2020 [08:55]

Ekspertlərin qeyd etdikləri kimi, COVID-19-a qarşı mübarizənin səmərəli olması üçün müəyyən olunmuş bütün qaydalara ciddi əməl edilməlidir
Məlum olduğu kimi, hazırda dünya ölkələri koronavirus pandemiyasının yeni dalğasını yaşayır. Təəssüf ki, son həftələr bütün dünya ölkələrində olduğu kimi, Azərbaycanda da COVID-19-a gündəlik yoluxma və ölüm halları artıb. Ekspertlər hesab edirlər ki, bu dönəm hər birimiz üçün çox həssas bir dövrdür.
Həkim-endokrinoloq Gülay Məmmədova qəzetimizə açıqlamasında bildirib ki, ilk növbədə, gigiyena qaydalarına əməl edilməli, ara məsafəsi saxlanılmalıdır: “Qanda şəkərin səviyyəsi tez-tez yoxlanılmalı, onun yüksəlməsi və enməsi zamanı tədbirlər görülməlidir. Hər gün lazımi qədər su içilməlidir. Koronavirus infeksiyasından qorunmaq üçün heç bir köməkçi dərman müalicəsi və ya vitaminlər kömək etmir. Lazımsız və hətta ziyan edə biləcək həmin dərmanların tətbiq edilməsindən çəkinmək lazımdır. Evdə olan müddətdə balanslı, düzgün qidalanmaya və hərəkətli olmağa diqqət yetirilməlidir. Ev içində və ya başqaları ilə təmasın olmaması şərtilə gündə ən azı 5 min addım atmaq lazımdır, həmçinin həmin müddətdə çəkiyə və şəkərə ciddi nəzarət edilməlidir”.
Həkim-endokrinoloq onu da deyib ki, ürək, böyrək və ağciyər xəstəliyi kimi yanaşı gedən xəstəliklər olduqda həkimlərin məsləhətləri nəzərə alınmalıdır.
Tibb Universitetinin Daxili Xəstəliklər kafedrasının əməkdaşı Könül İsmayılova isə deyib ki, üç əsas şərtə əməl olunmalıdır: “Tibbi maska taxılmalı, məsafə gözlənilməli və əl gigiyenasına əməl olunmalıdır. İnsanların kütləvi toplaşdıqları yerlərə lazım olmadıqca getməyək. Getməyə məcbur olduqda isə məsafə saxlayaq və tibbi maska taxaq. Əllərimizi spirtdən və ya digər dezinfeksiya məhlullarından istifadə edərək təmizləyək. Müvəqqəti olaraq özümüzün və yaxınlarımızın sağlamlığı naminə onlarla az-az görüşək”.
O deyib ki, əgər xəstəlik yoxdursa, profilaktik tədbirlər məqsədilə virus əleyhinə preparatlar istifadə olunmaz: “Bundan başqa, açıq havada uzun müddət olmaq, aktiv hərəkət etmək, təbii qidalarla qidalanmaq, bol çiy meyvə və tərəvəz istifadə etmək lazımdır. Bunların hamısı orqanizmi möhkəmləndirən vasitələrdir. Əhval-ruhiyyəmizi gözəl saxlayaq, nikbin olmağa çalışaq, yüksək əhval-ruhiyyə olarsa, orqanizmdə xüsusi maddələr əmələ gəlir ki, onlar immunitet sistemini gücləndirməyə kömək edir. Bu qaydalara əməl etsək, koronavirusla mübarizəyə öz töhfəmizi vermiş olarıq”.
Müşfiqə

Paylaş:

Baxılıb: 745 dəfə