Saxtakar piketçi etiraf etdi...

Bakı:

15 °C

94 %

2 m/s

Əlaqə

AZ RU EN

Ana səhifə / Sosial / Saxtakar piketçi etiraf etdi...

Saxtakar piketçi etiraf etdi...

12.10.2019 [10:19]

“Dövlət mənə ikiotaqlı ev verib”
Radikal müxalifətin oktyabrın 8-də keçirdiyi piket bir sıra “özəllik”ləri ilə yadda qaldı. Həmin vaxt şəhər nəqliyyatının işinə, Bakının mərkəzində yerləşən təhsil ocaqlarının fəaliyyətinə, insanların istirahətinə və saymadığımız daha neçə sahəyə yaradılan maneçiliklə “fərqlənən” nüansların qeyd edilməsi kifayətdir ki, piket cəhdinin uğursuz və gərəksiz olduğu anlaşılsın. Yəni yalnız ara qarışdırmağa, qanun pozuntularına yol verməyə, hətta polis əməkdaşlarının təxribata çəkilməsinə xidmət göstərən bu piketin Əli Kərimli və ətrafındakılara xarici anti-azərbaycançı mərkəzlər tərəfindən sifariş edildiyinə heç bir şübhə yoxdur. Elə piketdə səslənən yalanlar, piket iştirakçılarının saxta iddiaları da dediklərimizi təsdiqləyir. Amma saxta piketçilərin saxta iddialarının üstü qısa müddətdə açıldı.
Məsələn, Zəngilan rayonundan olan məcburi köçkün Yaşar Cəfərov sözügedən “piket zamanı” qarşısında “kamera” görən kimi “odlu-alovlu” bir çıxış etmək fürsətini əldən vermək istəməyib. 26 ildir məcburi köçkün həyatı yaşadığını söyləyən Y.Cəfərov iddia edib ki, guya evi yoxdur: “Qaçqınam, 25 ildir, “obşitel”də (yataqxana) yaşayıram, çürüyürəm...”
Bu “piket” qəhrəmanının danışdığı yalanın üstü isə tez açılıb. Belə ki, Qaçqınların və Məcburi Köçkünlərin işləri üzrə Dövlət Komitəsinin sədri Rövşən Rzayev bildirib ki, Yaşar Cəfərov adlı Zəngilan rayonundan olan həmin şəxsə dövlət tərəfindən diqqət və qayğı göstərilib, o, evlə təmin olunub.
Biz də “Yeni Azərbaycan” qəzeti olaraq məsələ ilə bağlı Yaşar Cəfərovun özü ilə əlaqə saxladıq. Y.Cəfərov öncə piketdə kameralar önündə çıxış edən zaman evinin olmadığını, yataqxanada yaşadığını demədiyini iddia etsə də, sonradan etiraf etdi ki, belə bir söz deyib. O hətta “çaşmışam” deyə dediklərindən yayınmağa çalışdı. Bildirdi ki, iki ildir ki, evlə təmin olunub: “İki ildir mənə ev veriblər. İkiotaqlı evdir. Qanuni yolla verilib bu ev mənə. Çaşmışam, demişəm. Bir kəlmə söz demişəm, ağzımdan qaçıb”.
Göründüyü kimi, bu saxtakar piketçinin danışdığı yalan kimlərinsə əlinə “dəstəvuz” verməyə xidmət göstərib. Piketdən sonra bəh-bəhlə bu kadrları öz internet kanallarında yayan, bu “qoca piketçi”nin halına yandığını iddia edən osmanqızılar, qənimətzahidlər və başqaları niyə bu yalanına görə onu qınamırlar? Beləliklə, dövlətin ona göstərdiyi diqqət və qayğını gizlədərək “yataqxanada çürüyürəm” deyə yalanlar söyləyən belələrinin arxasına sığınan Əli Kərimlinin mahiyyətinin üzərinə bir daha “işıq düşür”. Bu piketçinin saxta iddiaları bir daha sübut edir ki, Əli Kərimli və ətrafındakı dağıdıcılar da saxta iddialarla çıxış edən, sifarişlə, göstərişlə işləyənlərdir.
Pərviz SADAYOĞLU

Paylaş:

Baxılıb: 448 dəfə