“Azərbaycan tarixən tolerantlığın ünvanı olub”

Bakı:

28 °C

45 %

9 m/s

Əlaqə

AZ RU EN

Ana səhifə / Sosial / “Azərbaycan tarixən tolerantlığın ünvanı olub”

“Azərbaycan tarixən tolerantlığın ünvanı olub”

13.02.2018 [09:58]

Azərbaycan tarixən tolerantlığın ünvanı olub. Bu ölkədəki dini dözümlülük bütün xalqlara nümunə olmalıdır.
AZƏRTAC xəbər verir ki, Müqəddəs Taxt-Tacın xarici dövlətlərlə əlaqələr üzrə katibi arxiyepiskop Paul Riçard Gallager Qafqaz Müsəlmanları İdarəsində keçirilən görüşdə belə deyib.
Görüşdə Qafqaz Müsəlmanları İdarəsinin sədri şeyxülislam Allahşükür Paşazadə İslam aləmində dünyəvi dövlətin nümunəvi modellərindən biri kimi tanınan Azərbaycanın dünyada vəhdətin yaradılması prosesinə öz töhfəsini verdiyini söyləyib. O bildirib ki, etnik və dini müxtəliflik ölkəmizin sərvəti kimi dəyərləndirilir. Tarixən çoxmillətli və çoxkonfessiyalı ölkə olan Azərbaycanda məscidlərlə yanaşı, kilsə və sinaqoqlar da fəaliyyət göstərir. Kilsə və sinaqoqların tikintisinə və təmirinə dövlət tərəfindən maliyyə yardımı edilir.
Şeyxülislam bildirib ki, Prezident Əliyevin sərəncamları ilə 2016-cı il ölkəmizdə “Multikulturalizm İli”, 2017-ci il isə “İslam Həmrəyliyi İli” elan olunmuşdu. Bu illər çərçivəsində keçirilən çoxsaylı tədbirlər bütün dini icmaların bir araya gəlmələrinə hesablanmışdı. Allahşükür Paşazadə deyib ki, Qafqaz Müsəlmanları İdarəsi bütün tədbirlərdə katolik, pravoslav və yəhudi icmalarının rəhbərləri ilə birgə fəaliyyət göstərir.
Papa Fransiskin 2016-cı ildə ölkəmizə səfərini xatırladan şeyxülislam ali qonağın Bakıdakı Katolik Kilsəsində olduğunu, Heydər məscidində bütün dini icmaların rəhbərləri ilə görüşdüyünü bildirib. Şeyxülislam əlavə edib ki, səfəri zamanı Vatikan rəhbəri Azərbaycanı tolerant ölkə kimi gördüyünü vurğulayıb.
Azərbaycan-Vatikan münasibətlərindən danışan şeyxülislam əsası Ümummilli lider Heydər Əliyev tərəfindən qoyulmuş əlaqələrimizin bu gün Prezident İlham Əliyevin apardığı uğurlu siyasət nəticəsində yüksək səviyyədə olduğunu vurğulayıb. O deyib ki, Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın fəaliyyəti sayəsində Vatikanla humanitar əlaqələrdə mühüm nailiyyətlər əldə olunub.
Azərbaycana ilk dəfədir səfər etdiyini deyən arxiyepiskop Paul Riçard Gallager ölkəmiz haqqında çox məlumatlı olduğunu qeyd edib, bu səfərindən məmnunluğunu bildirib. Papa Fransiskin fərmanı ilə Roma Katolik Kilsəsinin Azərbaycandakı ordinarisi Vladimir Feketenin yepiskop rütbəsinə yüksəldilməsinin çox sevindirici hadisə olduğunu deyən Paul Riçard Gallager bunu Müqəddəs Atanın Azərbaycandakı katolik icmasına, eləcə də Azərbaycan ilə əlaqələrə verdiyi önəmin mühüm göstəricisi kimi dəyərləndirib. Ölkəmizdə mövcud olan dinlərarası dialoqun Müqəddəs Taxt-Tac tərəfindən yüksək qiymətləndirildiyini söyləyən qonaq bildirib ki, arxiyepiskop və ravvinin eyni tədbirdə iştirakı Azərbaycanda dini dözümlüyün olmasının daha bir göstəricisidir.
Görüşdə Bakı və Azərbaycan Yeparxiyasının arxiyepiskopu Aleksandr İşein, Bakı Dağ yəhudiləri dini icmasının rəhbəri Milix Yevdayev və ordinari Vladimir Fekete çıxış edərək ölkəmizdəki dini dözümlüyün yüksək səviyyədə olduğunu bildiriblər.

Paylaş:

Baxılıb: 675 dəfə