YAP Qadınlar Şurasının ilk sədri, Prezident təqaüdçüsü Səriyyə Əbülhəsənovanın 85 yaşı tamam olub

Bakı:

28 °C

54 %

10 m/s

Əlaqə

AZ RU EN

Ana səhifə / Sosial / YAP Qadınlar Şurasının ilk sədri, Prezident təqaüdçüsü Səriyyə Əbülhəsənovanın 85 yaşı tamam olub

YAP Qadınlar Şurasının ilk sədri, Prezident təqaüdçüsü Səriyyə Əbülhəsənovanın 85 yaşı tamam olub

19.01.2018 [10:14]

Qadınlar tarix boyu xalqımızın taleyində əhəmiyyətli rol oynayıblar. Eyni zamanda, tarixi keçmişin ağır sınaqlarından alnıaçıq, üzüağ çıxmış Azərbaycan qadını bu gün öz dövlət müstəqilliyini bərpa etmiş ölkəmizdə gedən ictimai, siyasi, iqtisadi, mədəni proseslərdə fəal iştirak edir. Azərbaycanın müstəqilliyinin möhkəmləndirilməsində, ərazi bütövlüyünün qorunmasında, hüquqi-demokratik dövlət quruculuğunda, iqtisadi yüksəlişin təmin edilməsində qadınlarımız misilsiz xidmətlər göstərirlər.
Ümumiyyətlə, Azərbaycan xalqının tarixində öz milləti üçün fədakarlıq, mübarizlik göstərmiş qadınlar az olmayıb. Müasir tariximizdə də belə qadınlarımızla öyünə bilərik. Məlumdur ki, ötən əsrin 90-cı illərinin əvvəlində Azərbaycan çox ağır sınaqlarla üz-üzə qalmışdı. Yenicə müstəqilliyini bərpa etmiş ölkəmiz parçalanmaq ərəfəsində idi. Cəmiyyətin sağlam düşünən insanları, ümumilikdə bütün xalq Azərbaycanı bu ağır vəziyyətdən yalnız böyük siyasi və dövlət xadimi, Ulu öndər Heydər Əliyevin xilas edə biləcəyini dərk edirdilər. Və bu reallığı xalq arasında təbliğ edən insanlar arasında qadınlarımız da var idi. Səriyyə Əbülhəsənova da məhz belə mübariz qadınların ön sıralarında gedib.
O zamanlar Yeni Azərbaycan Partiyasının (YAP) yaradılması prosesinə hakimiyyət hər vəchlə mane olmağa çalışırdı və Ulu öndər Heydər Əliyevin rəhbərliyi ilə bu partiyanın yaradılmasında iştirak etmək istəyən insanlara hədə-qorxu gəlinirdi, onlar təzyiqlərə məruz qalırdılar. Amma Səriyyə Əbülhəsənova belə təzyiqlərdən qorxmayaraq bu yolda əsl fədakarlıq nümunəsi göstərən insanlardan biridir. Ozamankı hakimiyyətin bütün təzyiqlərinə rəğmən 1992-ci ilin noyabr ayında Ulu öndər Heydər Əliyevin rəhbərliyi ilə Naxçıvan şəhərində Yeni Azərbaycan Partiyası yaradıldı. Xalqın təkidli tələbi ilə 1993-cü ilin iyun ayında hakimiyyətə qayıdan Yeni Azərbaycan Partiyasının qurucusu, Ulu öndər Heydər Əliyev qısa müddətdə xalqımızı üzləşdiyi ağır problemlərdən, dövlətçiliyimizi məhv olmaqdan xilas etdi. Bu prosesdə partiyamızın fəalları, o cümlədən vətənpərvər, Heydər Əliyev siysətinə sadiq qadınlarımız da yaxından iştirak edirdilər.
Belə bir zamanda Yeni Azərbaycan Partiyası təşkilatlanmaqda, sıralarını genişləndirməkdə davam edirdi. Səriyyə Əbülhəsənova qadınların partiyamızın sıralarına cəlb olunmasında, onların partiya həyatında aktivliyinin artmasında fəal iştirak edib. Məhz onun rəhbərliyi ilə 1995-ci ildə Yeni Azərbaycan Partiyasının Qadınlar Şurası yaradıldı. Partiyamızın Qadınlar Şurasının ilk sədri kimi Səriyyə xanım öz fəaliyyəti, mübarizliyi və Heydər Əliyev yolunda fədakarlığı ilə partiyamızın qadınlarına nümunə göstərib. Onun rəhbərliyi dövründə YAP Qadınlar Şurası böyük inkişaf yolu keçərək kəmiyyət və keyfiyyət baxımından xeyli güclənib.
Bu gün də YAP Qadınlar Şurasının fəaliyyətinin əsasında dövlətçiliyimizə xidmət dayanır. YAP Qadınlar Şurası Ümummilli lider Heydər Əliyevin ideyaları əsasında öz fəaliyyətini davam etdirir. Bu gün YAP-ın sıralarında 700 mindən çox insan birləşib və bu, böyük bir ordudur. Bu ordunun sıralarında qadınlar təxminən 50 faiz təşkil edir. Bu gün yüz minlərlə insanı öz ətrafında birləşdirən partiyamızın sıralarında elm xadimləri, həkimlər, müəllimlər, bütövlükdə cəmiyyətimizdə böyük nüfuzu ilə tanınan qadınlar təmsil olunurlar. Buna paralel olaraq hər il çoxsaylı vətənpərvər və ziyalı qadınlarımız YAP Qadınlar Şurasının sıralarına daxil olurlar.
Yanvarın 14-də YAP Qadınlar Şurasının ilk sədri, Prezident təqaüdçüsü Səriyyə Əbülhəsənovanın 85 yaşı tamam olub. Cəmiyyətimiz Səriyyə xanımı Ümummilli liderimiz Heydər Əliyevin müəyyənləşdirdiyi siyasətə sadiq şəxs, əqidəsindən dönməz və mübariz bir insan kimi tanıyır. Onun Ümummilli lider Heydər Əliyevin ideyalarına sədaqət ruhunda köklənmiş fəaliyyəti və prinsipial mövqeyi Yeni Azərbaycan Partiyasının bütün üzvləri, o cümlədən qadınlarımız tərəfindən hər zaman böyük rəğbətlə qarşılanır. Bu gün də YAP Qadınlar Şurasının İdarə Heyətinin və Şurasının üzvü kimi, Səriyyə Əbülhəsənova ictimai-siyasi fəaliyyətini davam etdirir.
Səriyyə xanımı 85 illik yubileyi münasibətilə təbrik edir, ona uzun ömür, möhkəm cansağlığı arzulayırıq!
Yeni Azərbaycan Partiyasının Qadınlar Şurası

Paylaş:

Baxılıb: 704 dəfə