“İlin könüllüsü-2017” mükafatına ərizə qəbulu başlayıb

Bakı:

28 °C

47 %

4 m/s

Əlaqə

AZ RU EN

Ana səhifə / Sosial / “İlin könüllüsü-2017” mükafatına ərizə qəbulu başlayıb

“İlin könüllüsü-2017” mükafatına ərizə qəbulu başlayıb

05.12.2017 [12:07]

Gənclər və İdman Nazirliyinin, Gənclər Təşkilatları Milli Şurasının təşkilatçılığı ilə “İlin Könüllüsü-2017” mükafatı üçün ərizələrin qəbuluna start verilib.
Şuradan AZƏRTAC-a bildiriblər ki, mükafatın verilməsində məqsəd ölkədə könüllü gənclər arasında fəal, təcrübəli, işgüzar, bacarıqlı və fərqlənən gənclərin seçilməsi, mükafatlandırılması, bu yolla gənclərin könüllülük fəaliyyətinə cəlb olunmasına imkan yaratmaqdır.
“İlin Könüllüsü-2017” müsabiqəsində hər nominasiya üzrə I yerə layiq görülmüş şəxslər min manat məbləğində pul mükafatı, diplom və “İlin Könüllüsü” döş nişanı ilə təltif olunacaq. Sonuncu mərhələyə keçən və digər yerlərə layiq görülən gənclərə diplom və hədiyyələr təqdim ediləcək.
“İlin Könüllüsü-2017” mükafatı 5 nominasiya üzrə fərqlənmiş gənclərə təqdim olunacaq. Bunlar “Dövlət qurumlarında könüllülük”, “Genişmiqyaslı tədbirlərdə könüllülük”, “Qeyri-hökumət təşkilatlarında könüllülük”, “Ekoloji könüllülük” və “Sosial könüllülük”dür.
Mükafata namizədliyini irəli sürmək və layihə haqqında ətraflı məlumat almaq istəyən gənclər www.ilinkonullusu.az elektron portalına daxil ola bilərlər.
Müraciət etmək istəyən gənc könüllülərdən xüsusi ərizə formasını doldurmaq və “Nəyə görə mən İlin Könüllüsü olmalıyam?” sualını iki dəqiqəlik video çəkərək cavablandırması tələb olunur. İlkin mərhələdən uğurla keçən gənclər ekspertlərin iştirakı ilə təşkil olunacaq müsahibə mərhələsinə dəvət alacaqlar.
Gənclər 2018-ci il yanvarın 5-dək müraciət edə bilərlər.
Ərizə qəbulunun məhz bu gün elan olunması təsadüfi deyil. Belə ki, 1985-ci ildən 5 dekabr - Beynəlxalq Könüllülər Günü kimi qeyd olunur.
“İlin Könüllüsü-2017” “Azərbaycan Könüllülük Xidməti” proqramı çərçivəsində həyata keçirilir. “Azərbaycan Könüllülük Xidməti” Avropa Könüllülük Xidmətinin (European Voluntary Service) Azərbaycan modelidir və Gənclər Təşkilatları Milli Şurasının təşəbbüsü, Gənclər və İdman Nazirliyinin dəstəyi ilə 2013-cü ildə yaradılıb. Proqramın məqsədi gənclər arasında könüllülüyün təbliği və onları könüllü fəaliyyətə həvəsləndirməklə Azərbaycanda könüllülük hərəkatının inkişafına təkan vermək, qeyri-maddi motivasiya əsasında region gənclərini könüllülük fəaliyyətinə cəlb etmək, bölgələrdəki Gənclər evlərində könüllülərin fəaliyyətlərini genişləndirməkdir.

Paylaş:

Baxılıb: 487 dəfə