Bakının mərkəzində bir qrup şəxsin polis orqanlarının əməkdaşları tərəfindən saxlanılması ictimai asayişin qorunmasına xidmət edir

Bakı:

27 °C

55 %

10 m/s

AZ RU EN

Ana səhifə / Sosial / Bakının mərkəzində bir qrup şəxsin polis orqanlarının əməkdaşları tərəfindən saxlanılması ictimai asayişin qorunmasına xidmət edir

Bakının mərkəzində bir qrup şəxsin polis orqanlarının əməkdaşları tərəfindən saxlanılması ictimai asayişin qorunmasına xidmət edir

04.10.2017 [09:50]

Belə tədbirlərin keçirilməsində məqsəd ictimai qaydanı pozmaqla vətəndaşların şikayətlərinə səbəb olan şəxslərin müəyyənləşdirilərək məsuliyyətə cəlb edilməsi və ağır nəticələrə səbəb olan yoluxucu zöhrəvi xəstəliklərin yayılmasının qarşısının alınmasıdır
Azərbaycanda insan hüquq və azadlıqlarının yüksək səviyyədə qorunması hüquqi dövlət quruculuğu prosesinin mühüm amili rolunda çıxış edib. Ölkəmizdə irqindən, milliyyətindən, dinindən, dilindən, cinsindən, mənşəyindən, əqidəsindən, siyasi və sosial mənsubiyyətindən asılı olmayaraq hər bir insanın hüquq və azadlıqlarının müdafiəsi qanunvericilik, icra və məhkəmə orqanları qarşısında ümdə vəzifə kimi qoyulub. Ötən müddət ərzində Azərbaycan dövləti siyasi-hüquqi potensialından tam istifadə etməklə bu məqsədə nail olmaq və müvafiq hüquqi mexanizmlər yaratmaq üçün tədbirlər görüb. Bununla belə, təbii ki, ümumi ictimai qaydalara, qanunlara zidd hərəkətlər hüquqi məsuliyyət yaradır və birmənalı şəkildə ölkə qanunvericiliyini pozan şəxslər haqqında kimliyindən asılı olmayaraq müvafiq tədbirlər görülür. Yeri gəlmişkən, Daxili İşlər Nazirliyinin və Baş Prokurorluğun yaydığı birgə məlumatda da bildirilir ki, Bakının mərkəzi hissəsində, xüsusən də Nəsimi, Nərimanov, Səbail və Yasamal rayonlarının ərazisində axşam saatlarında qrup şəklində yerli vətəndaşlara və əcnəbi turistlərə pul müqabilində intim xidmətlər təklif edən, hətta imtina edənləri təhqir edib münaqişəyə çəkməklə ictimai qaydanı pozan şəxslərin müəyyənləşdirilməsi, onların dəri-zöhrəvi xəstəliklərin daşıyıcısı olub-olmamasının yoxlanılması və digər profilaktiki tədbirlərin görülməsi məqsədilə vətəndaşların çoxsaylı müraciətləri əsasında şəhərin Baş Polis İdarəsinin və ərazi polis orqanlarının əməkdaşları tərəfindən sentyabrın 15-dən 30-dək həyata keçirilmiş tədbirlərlə 83 nəfər saxlanılıb. Yayılan məlumatda göstərilir ki, həmin şəxslər barəsində İnzibati Xətalar Məcəlləsinin müvafiq maddələri ilə protokollar tərtib edilərək məhkəmələrə göndərilib. Həmçinin 56 şəxs barəsində müxtəlif müddətlərə inzibati həbs tənbehi seçilib, 18 nəfərə inzibati qaydada cərimə, 9 nəfərə xəbərdarlıq edilib. Lakin saxlanılan şəxslərin hüquqlarını müdafiə edən vəkillərin müraciətləri nəzərə alınaraq, inzibati həbs olunanlardan 32 nəfəri müalicə üçün dəri-zöhrəvi dispanserlərə göndərilib. Zöhrəvi xəstəlik aşkar edilməmiş 24 nəfər inzibati həbsdən azad olunub. Hazırda tutulmuş şəxslərdən heç biri həbsdə deyil. Eləcə də, tibbi-laborator müayinələrin hazırkı nəticəsinə görə 32 nəfərdə müxtəlif zöhrəvi xəstəliklər, o cümlədən 6-da AIDS, 6-da HİV, 16-da sifilis, 2-də “kəskin uretrit, candida albikas və trixomonias”, 2 nəfərdə isə Hepatit HVC virusu aşkarlanıb. Digərlərində zöhrəvi xəstəliklərin olub-olmamasının müəyyənləşdirilməsi, eləcə də onlar tərəfindən bu xəstəliklərin məqsədli şəkildə yayılmasının qarşısının alınması istiqamətində səhiyyə orqanları ilə birgə təxirəsalınmaz tədbirlər davam etdirilir: “Ayrı-ayrı kütləvi informasiya vasitələrində cinsi azlıqlara qarşı guya təqiblərin olması və onların hüquqlarının pozulması barədə deyilənlər, belə iddialar tamamilə əsassızdır, reallığı əks etdirmir. Bir daha qeyd etməyi vacib hesab edirik ki, belə tədbirlərin keçirilməsində məqsəd yalnız ictimai qaydanı pozmaqla vətəndaşların şikayətlərinə səbəb olan şəxslərin müəyyənləşdirilərək məsuliyyətə cəlb edilməsi və ağır nəticələrə səbəb olan yoluxucu zöhrəvi xəstəliklərin yayılmasının qarşısının alınmasıdır”.
Qeyd edildiyi kimi, bu tədbirlər ümumi ictimai normalara riayət etməyən, insanlara qarşı aqressiv davranışlar sərgiləyən, o cümlədən ölkə qanunlarını pozan, digər vətəndaşların narahatlığına səbəb olan şəxslərə qarşı görülüb. Yayılan məlumatdan göründüyü kimi, bu, kimlərinsə “azadlıqlarının” əlindən alınması deyil, əksinə, həmin insanların hüquqa, qanuna hörmətlə yanaşmasının təmin olunmasına, digər vətəndaşların hüquqlarını pozmasının qarşısını almağa yönəlib. Bu və ya digər şəkildə qanunları pozan şəxslər isə dünyanın hər bir yerində qanun qarşısında məsuliyyət daşıyırlar. Eləcə də hüquq-mühafizə orqanlarının gördüyü tədbirlər yoluxucu, ağır xəstəliklərin yayılmasının qarşısının alınmasına xidmət göstərir ki, burada da qeyri-qanuni hal yoxdur.
Vurğulamaq yerinə duşər ki, ölkə Konstitusiyasının mühüm bir hissəsi insan hüquq və azadlıqlarının qorunmasına həsr olunub. Bununla belə, bu azadlıqlar kimlərəsə ölkə qanunvericiliyinin tələblərini pozmağa, ondan sui-istifadə etməyə, o cümlədən, ictimai qayda-qanuna riayət etməməyə, xəstəliklər yaymağa, qeyri-insani rəftar etməyə imkan vermir. Görülən tədbirlər birmənalı şəkildə ümumi asayişin qorunmasına xidmət göstərir.

Paylaş:

Baxılıb: 523 dəfə