KİVDF-də Şimali Kiprin təhsil və mədəniyyət naziri ilə görüş keçirilib

Bakı:

23 °C

94 %

2 m/s

Əlaqə

AZ RU EN

Ana səhifə / Sosial / KİVDF-də Şimali Kiprin təhsil və mədəniyyət naziri ilə görüş keçirilib

KİVDF-də Şimali Kiprin təhsil və mədəniyyət naziri ilə görüş keçirilib

28.09.2017 [10:17]

Özdemir Berova: Biz təhsil sahəsində Azərbaycanla əlaqələrin, əməkdaşlığın daha da gücləndirilməsinin tərəfdarıyıq
Sentyabrın 27-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunda (KİVDF) Şimali Kipr Türk Cümhuriyyətinin (ŞKTC) təhsil və mədəniyyət naziri Özdemir Berova ilə KİV rəhbərlərinin görüşü keçirilib.
Görüşdə KİVDF-nin icraçı direktoru Vüqar Səfərli çıxış edərək, qonaqları salamlayıb, onları Azərbaycanda görməkdən məmnunluğunu ifadə edib. Ardınca o, ŞKTC-nin təhsil və mədəniyyət naziri Ö.Berova, onun müavini Ziya Öztürkler, təhsil müşaviri Ahmet Simitçioğlu və ŞKTC-nin Bakı nümayəndəliyinin rəhbəri Ufuk Turganeri media mənsublarına təqdim edib. V.Səfərli bildirib ki, qonaqların Azərbaycana səfərinin, həmçinin bu görüşün məqsədi təhsil və turizm sahəsində qarşılıqlı əməkdaşlığı daha da inkişaf etdirməkdir.
Təhsil və mədəniyyət naziri Ö.Berova ŞKTC-nin son 15 ildə təhsil və turizm sahəsində böyük inkişaf yolu keçdiyini diqqətə çatdırıb. Deyib ki, hazırda ŞKTC-dəki ali təhsil müəssisələrində 95 min tələbə təhsil alır ki, onlardan 500-ü Azərbaycandan olan gənclərdir. O, eyni zamanda, vurğulayıb ki, tələbələrin təhsil alması ilə yanaşı, 30 azərbaycanlı müəllim də ŞKTC-dəki ali təhsil ocaqlarında fəaliyyətini davam etdirməkdədir: “Şübhə etmirəm ki, qarşılıqlı əlaqələrimiz sayəsində Şimali Kiprdə təhsil alan tələbələrin, eyni zamanda, müəllim kimi fəaliyyət göstərən azərbaycanlıların sayı gələcək illərdə artacaq. Çünki biz təhsil sahəsində Azərbaycanla əlaqələrin, əməkdaşlığın daha da gücləndirilməsinin tərəfdarıyıq. Bir məlumatı da bildirmək istərdim ki, müxtəlif ölkələrdən gəlmiş ümumilikdə 120 tələbə Şimali Kipr universitetlərində pulsuz təhsil alır. Həmin tələbələrdən 30 nəfərini azərbaycanlılar təşkil edir. Sözügedən fakt Şimali Kiprdə azərbaycanlılara, azərbaycanlı tələbələrə göstərilən diqqəti özündə ifadə edən bir nümunədir. Bu, bizləri sevindirir. Eyni zamanda, Şimali Kiprdən olan 3 tələbənin Azərbaycandakı ali təhsil ocağında musiqi sahəsi üzrə təhsil alması, bir sıra uğurlara imza atması da bizlərdə sevinc və fərəh hissi yaradır”.
Millət vəkili, “Ədalət” qəzetinin təsisçisi Aqil Abbas Şimali Kiprdəki ali təhsil müəssisələrinin yüksək səviyyədə təhsil verməsini diqqətə çatdıraraq, azərbaycanlı tələbələrin bu ölkədə təhsil almağa böyük maraq göstərdiklərini vurğulayıb.
Millət vəkili, “Yeni Azərbaycan” qəzetinin baş redaktoru Hikmət Məmmədov ŞKTC-nin sülh və təhsil adası olduğunu söyləyib. Qeyd edib ki, Şimali Kiprdə olduğu kimi, Azərbaycanda da insanlar təhsilə çox böyük diqqət yetirirlər. Ona görə də Şimali Kiprdə xarici tələbələrə yaradılan şəraitlə yaxından tanış olan azərbaycanlı valideynlər öz övladlarını tərəddüdsüz Şimali Kiprə təhsil almaq üçün göndərirlər.
Görüşdə “Səs”, “Şərq”, “Xalq cəbhəsi” qəzetlərinin baş redaktorları Bəhruz Quliyev, Akif Aşırlı, Elçin Mirzəbəyli, “Trend” İnformasiya Agentliyinin direktor müavini Arzu Nağıyev, KİVDF Müşahidə Şurasının sədri, “Xalq qəzeti”nin baş redaktoru Həsən Həsənov da çıxış edərək öz fikirlərini bildiriblər.

Paylaş:

Baxılıb: 583 dəfə