“Bu uğur mənə yeni dostluqlar qazandırdı”

Bakı:

25 °C

59 %

1 m/s

Əlaqə

AZ RU EN

Ana səhifə / Sosial / “Bu uğur mənə yeni dostluqlar qazandırdı”

“Bu uğur mənə yeni dostluqlar qazandırdı”

30.08.2017 [10:12]

İlhamə Hüseynova: Gələcəkdə insan hüquqları və azadlıqlarının müdafiəsinə çalışmaq və hər zaman öz vətənimə layiqli bir hüquqşünas kimi xidmət etmək istəyirəm
Məlum olduğu kimi, 2017-2018-ci tədris ili üçün I-IV ixtisas qrupları üzrə keçirilən qəbul imtahanı başa çatıb. Öz bilik səviyyəsini sınaqdan keçirmiş və müsabiqədə iştirak etmək hüququ qazanmış abituriyentlər yığdıqları bala müvafiq olaraq artıq ixtisas seçimi ediblər.
Yeri gəlmişkən xatırladaq ki, bu dəfə imtahanda I ixtisas qrupu üzrə 7, II ixtisas qrupu üzrə 2, III ixtisas qrupu üzrə 3, IV ixtisas qrupu üzrə isə 3 nəfər olmaqla, ümumilikdə 15 abituriyent onlara təqdim olunmuş bütün test tapşırıqlarına düzgün cavab verib və maksimum nəticə - 700 bal toplayıb. Ənənəyə sadiq qalaraq, bu il də 700 bal toplayan abituriyentləri sizinlə tanış edirik. Belə ki, III ixtisas qrupu üzrə maksimum nəticə əldə edən rekordçulardan biri də Nəsimi rayonu 111 saylı orta məktəbin məzunu İlhamə Hüseynovadır.
Məlumat üçün bildirək ki, İ.Hüseynova ibtidai sinfi Goranboy rayonu Seymur Məmmədov adına Zeyvə kənd orta məktəbdə oxuyub. Daha sonra təhsilini Bakı şəhəri, 111 saylı orta məktəbdə davam etdirib. Məktəb illəri müddətində müxtəlif tədbirlərdə, olimpiadalarda, bilik yarışmalarında iştirak edib. Belə ki, respublika fənn olimpiadasında Azərbaycan tarixi fənni üzrə 2015-ci ildə gümüş, 2016-cı ildə bürünc medal qazanıb. O, IX sinfi xüsusi fərqlənmə şəhadətnaməsi ilə başa vurub. Bununla yanaşı, orta məktəbi əla qiymətlərlə bitirdiyinə görə qızıl medala layiq görülüb.
İmtahanda yüksək nəticə göstərən 17 yaşlı İlhamə redaksiyamızın qonağı olub. Əməkdaşımızın suallarını cavablandıran rekordçu imtahan təəssüratlarını qəzetimizin oxucuları ilə bölüşüb: “Aprelin 30-da keçirilən imtahanda 685 bal topladım. Lakin bu nəticə məni qane etmədi. Daha sonra iyulun 14-də keçirilən imtahanda yenidən iştirak edib biliyimi sınamaq istədim. Özümə söz vermişdim ki, birinci imtahanda etdiyim səhvlərə bu dəfə yol verməyib 700 bal toplayacağam. Hazırlıq müddətində yuxu rejiminə xüsusi önəm verirdim. Səhərin sübh çağında oyanıb ayıq başla dərslərimi oxuyurdum. Asudə vaxtlarımı isə dincəlməklə keçirər, bütün əyləncələrdən məhrum qalardım. Sadəcə, qarşıma qoyduğum məqsəd barədə düşünürdüm. İmtahan zamanı bir saat ərzində bütün sualları cavabladım. Nəhayət ki, gözlədiyim nəticəni əldə etdim. Bir sözlə, 700 bal toplamaq üçün əzmkar olmaq lazımdır. Nəticələr açıqlandıqdan sonra 700 bal toplayan abituriyentlərlə bir-birimizi yaxından tanımaq şansımız oldu. Bu uğur həm də mənə yeni dostluqlar qazandırdı deyə bilərəm”.
Gələcək planlarını bizimlə bölüşən İlhamə ali təhsilini Bakı Dövlət Universiteti (BDU) Hüquq fakültəsinin ingilis dili bölməsində davam etdirəcəyini deyir: “Hazırda hüquqşünaslıq peşəsi dəb halını alsa da, mənim bu sənətə sevgim kiçik yaşlarımdan başlayıb. Mən uşaqlıqdan atam kimi hüquqşünas olmaq istəyirdim. Hər zaman özümü hakimin geyimində təsəvvür edirdim. Tez-tez atamla çalışdığı yerə gedər, iş mühiti ilə tanış olardım. O qədər gözəl təəssüratlarla qayıdırdım ki, sevincimi dostlarımla da paylaşırdım. Elə o vaxtlardan hüquqşünas olmağa qərar vermişdim. Artıq arzumun bir addımlığındayam. Gələcəkdə insan hüquqları və azadlıqlarının müdafiəsinə çalışmaq və hər zaman öz vətənimə layiqli bir hüquqşünas kimi xidmət etmək istəyirəm”.
Müşfiqə BAYRAMLI

Paylaş:

Baxılıb: 467 dəfə