“Kitabi-Dədə Qorqud” dastanı türkdilli xalqların ortaq mədəniyyətidir

Bakı:

16 °C

82 %

2 m/s

Əlaqə

AZ RU EN

Ana səhifə / Sosial / “Kitabi-Dədə Qorqud” dastanı türkdilli xalqların ortaq mədəniyyətidir

“Kitabi-Dədə Qorqud” dastanı türkdilli xalqların ortaq mədəniyyətidir

01.03.2017 [10:06]

Fevralın 28-də Bakı Dövlət Universitetində (BDU) bu ali məktəbin və Bakı Yunus Əmrə İnstitutunun birgə təşkilatçılığı ilə “Qorqud atadan günümüzə aşıqlıq ənənəsi” mövzusunda beynəlxalq simpozium işinə başlayıb.
AZƏRTAC xəbər verir ki, BDU-nun rektoru, akademik Abel Məhərrəmov tədbirin türk xalqları üçün əhəmiyyətli mövzuya həsr olunduğunu diqqətə çatdırıb. Rektor bildirib ki, rəhbərlik etdiyi ali təhsil müəssisəsində hər zaman xalqımızın milli mənəvi dəyərləri, həmçinin qardaş türk xalqları ilə ortaq tariximiz və mədəniyyətimiz araşdırılır. Universitetdə “Dədə Qorqud” elmi-tədqiqat laboratoriyası fəaliyyət göstərir. Bu işlərin ən dəyərli nümunəsi olan “Kitabi-Dədə Qorqud” abidəsinin zəngin tarixini, onun mifologiyadan yazıya, eposdan kitaba çevrilmək qüdrətini tədqiq etmək baxımından alimlərimiz böyük işlər görüblər.
Akademik türkdilli xalqların ortaq simvolu olan “Kitabi-Dədə Qorqud”a həsr edilən tədbirin əhəmiyyətindən söz açıb, bu mövzunun hər zaman aktual olduğunu söyləyib. Vurğulanıb ki, türkdilli xalqların hamısına aid edilən və hər birinin də izi olan “Kitabi-Dədə Qorqud” dastanlarının daha çox Azərbaycan əraziləri, toponimikası və bədii təfəkkürü ilə bağlılığı tədqiqatçılar tərəfindən təbii hesab edilir.
Rektor diqqətə çatdırıb ki, Ümummilli lider Heydər Əliyevin təşəbbüsü ilə 1990-cı ildə “Kitabi-Dədə Qorqud” dastanının 1300 illik yubileyi beynəlxalq səviyyədə qeyd olunub və bu tədbirlərdə BDU-nun kollektivi fəal iştirak edib.
Qeyd edilib ki, simpoziumda Azərbaycanla yanaşı, Türkiyə, Qazaxıstan, Qırğızıstan və digər ölkələrdən alimlər, tədqiqatçılar və mədəniyyət nümayəndələri iştirak edirlər. Simpoziumun bölmə iclaslarında aşıq sənəti və ənənələrinə, müxtəlif el sənətkarlarına həsr olunan mövzular ətrafında müzakirələr aparılacaq.
Türkiyənin Azərbaycandakı səfiri Erkan Özoral ölkələrimiz, xüsusilə türkdilli dövlətlər arasında dostluq və qardaşlıq münasibətlərinin uğurla inkişaf etdiyini söyləyib. Vurğulanıb ki, “Kitabi-Dədə Qorqud” dastanı tarixdə türkdilli xalqları yaşadan, türk dünyası vəhdətini qoruyub saxlayan ortaq mədəniyyətimiz və ədəbiyyatımızdır. Bizi birləşdirən, bir araya gətirən bu qədim abidənin öyrənilməsinə, araşdırılmasına hər zaman böyük önəm verməliyik.
Türk Dil Qurumunun rəhbəri, professor Mustafa Kaçalin, Bayburt Universitetinin rektorunun köməkçisi Süleyman Ciydem, Qırğızıstan-Türkiyə Manas Universitetinin rektoru, professor Səbahəddin Balcı, Qazaxıstan Respublikası Qorqud Ata Elmi Araşdırmalar İnstitutunun müdiri Şirinbəy Koylibayev, Milli Məclisin deputatı Hikmət Babaoğlu, Azərbaycan Milli Elmlər Akademiyası Folklor İnstitutunun direktoru Muxtar İmanov və Bakı Yunus Əmrə İnstitutunun rəhbəri İbrahim Yıldırım dastanın zəngin və qədim tarixi köklərə malik olması baxımından xalqlarımızın tarixi, mədəni, ədəbi irsinin, eləcə də dilinin qorunub saxlanılmasında və gənc nəslə çatdırılmasında əhəmiyyətini vurğulayıblar. Qeyd edilib ki, türkdilli xalqların ortaq mədəniyyəti olan “Kitabi-Dədə Qorqud” dastanı birgə milli mənəvi dəyərimiz, sərvətimizdir. Dədə Qorqud boylarının əsas mahiyyətini yurdun və xalqın qorunması, xeyir qüvvələri təmsil edən qədim oğuzların yadelli işğalçılara - şər qüvvələrə qarşı ölüm-dirim savaşı, öz əhəmiyyətini indi də itirməyən bir çox əxlaqi-didaktik görüşlər təşkil edir.
Simpozium işini bölmə iclasları ilə davam etdirib. İclaslarda alim və tədqiqatçıların “Kitabi-Dədə Qorqud” dastanı ilə bağlı məruzələri dinlənilib.
Martın 1-dək davam edəcək tədbir çərçivəsində BDU ilə Türkiyənin Bayburt Universiteti arasında əməkdaşlıq haqqında müqavilə imzalanıb.

Paylaş:

Baxılıb: 1668 dəfə