Azərbaycan Gənclərinə Dəstək Proqramı layihəsi çərçivəsində regionlarda görüşlər keçirilib

Bakı:

16 °C

94 %

5 m/s

Əlaqə

AZ RU EN

Ana səhifə / Sosial / Azərbaycan Gənclərinə Dəstək Proqramı layihəsi çərçivəsində regionlarda görüşlər keçirilib

Azərbaycan Gənclərinə Dəstək Proqramı layihəsi çərçivəsində regionlarda görüşlər keçirilib

26.11.2016 [09:33]

BMT Uşaq Fondunun və onun yerli tərəfdaşı Beynəlxalq Avrasiya Mətbuat Fondunun nümayəndələri Azərbaycan Gənclərinə Dəstək Proqramı layihəsi çərçivəsində Goranboy, Tərtər və Bərdə rayonlarının icra hakimiyyəti başçıları ilə görüşlər keçiriblər.
BAMF-dan AZƏRTAC-a verilən məlumata görə, görüşdə BMT Uşaq Fondunun yeniyetmə və gənclərin işləri üzrə mütəxəssisləri xanım Aida Aylarova və Natiq Umarov, Beynəlxalq Avrasiya Mətbuat Fondunun sədri Umud Mirzəyev, fondun əməkdaşı və Azərbaycan Gənclərinə Dəstək Proqramı layihəsinin koordinatoru Qiyas Abasov iştirak ediblər.
Səfərin məqsədi Azərbaycan Gənclərinə Dəstək Proqramı layihəsi çərçivəsində yaradılan Yeniyetmə və Gənclərdən İbarət Məşvərət şuraları ilə icra hakimiyyətləri arasında qarşılıqlı əməkdaşlıq və birgə layihələrin növbəti il üçün icra hakimiyyətlərinin fəaliyyət planına əlavə olunmasıdır. Görüşlərdə Goranboy Rayon İcra Hakimiyyətinin başçısı Nizaməddin Quliyev, Tərtər Rayon İcra Hakimiyyətinin başçısı Müstəqim Məmmədov, Bərdə Rayon İcra Hakimiyyətinin başçısı Vidadi İsayev, icra hakimiyyəti aparatlarının digər rəsmi şəxsləri, Yeniyetmə və Gənclərdən ibarət Məşvərət şuralarının üzvləri iştirak ediblər.
Görüş çərçivəsində iştirakçılara Azərbaycan Gənclərinə Dəstək Proqramı layihəsi haqqında məlumat verən BAMF sədri Umud Mirzəyev və BMT Uşaq Fondunun rəsmisi Aida Aylarova layihə çərçivəsində seçilən rayonların cəbhə xətti yaxınlığında yerləşməsinin heç də təsadüfi olmadığını qeyd ediblər. Layihə çərçivəsində həmin rayonların cəbhə xəttinə yaxın olan yaşayış məntəqələrində məskunlaşan yeniyetmə və gənclər fövqəladə hallarla bağlı psixoloji hazırlıq, mina təhlükəsizliyi kimi təlimlərə cəlb olunacaqlar.
BMT Uşaq Fondunun rəsmisi Aida Aylarova BMT-nin Uşaq Hüquqları Konvensiyası haqqında iştirakçılara məlumat verib və bu konvensiyaya qoşulan ölkələrdən birinin də Azərbaycan olduğunu qeyd edib. Azərbaycan hökuməti, yerli icra hakimiyyəti orqanlarının bu cür layihələrə dəstək olmalarının və qoşulmalarının həmin konvensiyada qeyd olunan uşaqların cəmiyyətdə fəal iştirak etmək və eşidilə bilmək hüquqlarının təmin olunması istiqamətində önəmli addım olduğunu bildirib. O, yerli icra hakimiyyətləri tərəfindən edilən bu cür təşəbbüslərin, eyni zamanda, bu təcrübənin dünya ölkələrinə model olaraq təqdim olunmasının vacibliyini vurğulayıb.
Görüşlərdə icra başçıları layihə çərçivəsində icra hakimiyyətləri ilə on minlərlə region gənci arasından seçilmiş Məşvərət Şurası üzvlərinin birgə həyata keçirəcəyi fəaliyyətlərin cəbhəyanı rayonların inkişafına müsbət təsir göstərəcəyini qeyd ediblər. Bu cür layihələrin regionlarda ixtisaslı kadrların yetişdirilməsi və istedadlı gənclərin üzə çıxarılması istiqamətində mühüm addım olduğu vurğulanıb.
Görüşdə Tərtər, Bərdə və Goranboy rayonlarının gəncləri arasından seçilmiş üç fəal gənc layihənin regionlar üzrə koordinatoru təyin olunub. Onlarla əməkdaşlıq haqda müqavilə imzalanıb.
Sonda Məşvərət şuraları ilə birgə fəaliyyətlərin Goranboy, Tərtər və Bərdə rayonlarının növbəti il üçün illik fəaliyyət planına salınması ilə bağlı razılıq əldə olunub.

Paylaş:

Baxılıb: 615 dəfə