Azərbaycanda Milli Qəhrəmanlara böyük ehtiram göstərilir

Bakı:

26 °C

61 %

1 m/s

Əlaqə

AZ RU EN

Ana səhifə / Sosial / Azərbaycanda Milli Qəhrəmanlara böyük ehtiram göstərilir

Azərbaycanda Milli Qəhrəmanlara böyük ehtiram göstərilir

13.10.2016 [10:03]

Prezident İlham Əliyevin Milli Qəhrəman adı verilmiş şəxslərin sosial müdafiəsinin gücləndirilməsi haqqında bu günlərdə imzaladığı müvafiq Fərman respublikamızda Milli Qəhrəmanlara və onların ailə üzvlərinə dövlət tərəfindən göstərilən yüksək qayğının növbəti ifadəsidir
Xəbər verildiyi kimi, bu günlərdə Prezident İlham Əliyev Azərbaycanın Milli Qəhrəmanı adı verilmiş şəxslərin sosial müdafiəsinin gücləndirilməsi haqqında müvafiq Fərman imzalayıb. Bəhs olunan Fərmana əsasən, Azərbaycan Respublikasının müstəqilliyi, ərazi bütövlüyü və tərəqqisi uğrunda mübarizədə yenilməz rəşadət və misilsiz vətənpərvərlik nümunəsi göstərərək Azərbaycanın Milli Qəhrəmanı adına layiq görülmüş şəxslərin və onların ailə üzvlərinin sosial müdafiəsini daha da gücləndirmək məqsədilə Azərbaycanın Milli Qəhrəmanı adı verilmiş hər bir şəxs üçün Azərbaycan Respublikası Prezidentinin təqaüdünün aylıq məbləği artırılaraq 1300 (min üç yüz) manat müəyyən edilib.
Ümumiyyətlə, respublikamızda Milli Qəhrəmanlara, onların ailə üzvlərinə dövlət tərəfindən göstərilən diqqət və qayğının miqyası kifayət qədər böyükdür. Milli Qəhrəmanların, o cümlədən də müharibə əlilləri və şəhid ailələrinin mənzil-məişət şəraitinin yaxşılaşdırılması daim diqqət mərkəzində saxlanılır. Son illər ərzində təxminən 5200 şəhid ailəsi və müharibə əlilinə dövlət tərəfindən ev verilib. Eyni zamanda, onlara 5 mindən artıq minik avtomobili ayrılıb. Milli Qəhrəmanların və onların ailə üzvlərinin əksəriyyəti hər cür kommunal rahatlıqları olan mənzillərlə təmin olunublar.
Məlum olduğu kimi, Prezident İlham Əliyev 21 dekabr 2015-ci il tarixində “Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin və şəhid ailələrinin sosial-məişət şəraitinin yaxşılaşdırılmasına dair əlavə tədbirlər haqqında” Sərəncam imzalayıb. Sərəncama əsasən, müvafiq kateqoriyadan olan şəxslərin ailələrinin sosial-məişət şəraitinin yaxşılaşdırılması məqsədilə Azərbaycan Respublikasının 2015-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Əmək və Əhalinin Sosial Müdafiəsi Nazirliyinə 10,0 (on) milyon manat ayrılıb. Qeyd olunan vəsait dövlət başçısının 20 iyun 2014-cü il tarixli Sərəncamının icrası, yəni Əmək və Əhalinin Sosial Müdafiəsi Nazirliyi tərəfindən 2014-cü il yanvarın 1-dək yerli icra hakimiyyəti orqanlarında yaşayış sahəsinə ehtiyacı olan qismində uçota alınmış müharibə əlilləri və şəhid ailələrinin 2014-2018-ci illər ərzində mərhələlərlə mənzil və fərdi evlə təmin edilməsi işlərinin davam etdirilməsi üçün nəzərdə tutulub. Layihəyə uyğun olaraq, Əmək və Əhalinin Sosial Müdafiəsi Nazirliyinin sifarişi ilə ölkənin 52 rayonunda 375 fərdi yaşayış evinin tikintisinə başlanılıb. Milli Qəhrəmanların, şəhid ailələrinin və müharibə əlillərinin mənzil-məişət şəraitinin yaxşılaşdırılması məqsədilə mənzillərin inşası respublikanın müxtəlif bölgələrində, o cümlədən də paytaxt Bakıda həyata keçirilir. Əlamətdar haldır ki, mənzillər yüksək səviyyədə təmir olunaraq Milli Qəhrəmanların, şəhidlərin ailələrinə, müharibə əlillərinə verilir.
Prezident İlham Əliyevin “Azərbaycanın Milli Qəhrəmanı adı verilmiş şəxslərin sosial müdafiəsinin gücləndirilməsi haqqında” bu günlərdə imzaladığı müvafiq Fərman respublikamızda Milli Qəhrəmanlara və onların ailə üzvlərinə dövlət tərəfindən göstərilən yüksək qayğının növbəti ifadəsidir. Bəhs olunan Fərman bir daha təsdiqləyir ki, xalq, dövlət, Vətən üçün xüsusi xidmət göstərən insanların sosial müdafiəsinin gücləndirilməsinə Azərbaycan dövləti tərəfindən daim yüksək siyasi iradə nümayiş etdirilir.
Mübariz ABDULLAYEV

Paylaş:

Baxılıb: 693 dəfə