Ölkə ərazisində payız-qış mövsümünə hazırlıqla əlaqədar hansı işlər görülür?

Bakı:

21 °C

60 %

2 m/s

Əlaqə

AZ RU EN

Ana səhifə / Sosial / Ölkə ərazisində payız-qış mövsümünə hazırlıqla əlaqədar hansı işlər görülür?

Ölkə ərazisində payız-qış mövsümünə hazırlıqla əlaqədar hansı işlər görülür?

09.10.2015 [10:05]

“Azəryolservis” ASC: Qarlı-şaxtalı hava şəraitində yollarda yarana biləcək problemlərin aradan qaldırılması məqsədilə bir sıra qabaqlayıcı tədbirlər həyata keçirilib və demək olar ki, qurumun nəzarətində olan yollar qışa tam hazırdır
Sirr deyil ki, bəzən payızda havaların mövsüm normalarından artıq yağmurlu, yaxud da, qışda soyuq və şaxtalı hava şəraitinin uzun müddət davam etməsi, güclü qar bir sıra hallarda şəhər təsərrüfatlarında müəyyən çətinliklər yaradır. Buna görə də problemlərin yaranmaması üçün soyuq havalar qapını döyməmişdən əvvəl hazırlıq görülür. Biz də ölkəmizdə, o cümlədən paytaxt Bakıda payız-qış mövsümünə hazırlıqla bağlı görülən işlər haqqında məlumat almaq üçün əlaqədar qurumlara müraciət etdik. İlk olaraq, Nəqliyyat Nazirliyinin “Azəryolservis” Açıq Səhmdar Cəmiyyətinin yağışlı payız, qarlı qış günlərinə necə hazırlaşdığını öyrənməyə çalışdıq. Qışın gəlməsilə bağlı yollarda hansı tədbirlər görülür? Ümumiyyətlə yollarımız qışa hazırdırmı?
Suallarımızı cavablandırmaq üçün “Azəryolservis” ASC-nin mətbuat xidməti ilə əlaqə saxladıq. Qurumun mətbuat xidmətindən qəzetimizə verilən açıqlamaya əsasən, qarlı-şaxtalı hava şəraitində yollarda yarana biləcək problemlərin aradan qaldırılması məqsədilə artıq “Azəryolservis” Açıq Səhmdar Cəmiyyəti tərəfindən bir sıra qabaqlayıcı tədbirlər həyata keçirilib və demək olar ki, qurumun nəzarətində olan yollar qışa tam hazırdır. Payız-qış mövsümünə hazırlıqla bağlı işlərin mütəmadi nəzarətdə saxlanıldığını deyən qurumun mətbuat xidmətinin rəhbəri Anar Nəcəfli bu istiqamətdə ciddi addımlar atıldığını bildirib: “Azəryolservis” sürüşmə zonasına düşən yollarda yol yatağının bərkidilməsi işlərini həyata keçirir. Bu ərazilərdə yolun hərəkət olan hissəsinin təhlükəsizliyi üçün beton hasarlar tikilir. Bu yollarda növbəli rejimlə iş davam edir, hər hansı hadisə baş verərkən tez bir zamanda aradan qaldırılır. Eyni zamanda, payız-qış mövsümü ilə əlaqədar tədbirlər planı hazırlanıb, həmin yollarda qərargah yaradılacaq”.
Qeyd edək ki, payız-qış mövsümü ilə əlaqədar “Azəryolservis” Açıq Səhmdar Cəmiyyətinin mərkəzi aparatında yaradılmış qərargah payız-qış mövsümündə avtomobil yollarının və yol qurğularının normal istismarını, hərəkətin fasiləsizliyini və təhlükəsizliyini təmin edəcək. Qurumdan, həmçinin onu da bildiriblər ki, artıq yol istismar idarələri xidmət etdiyi avtomobil yolları üzrə tədbirlər planı hazırlayaraq icrasına başlayıblar. Buraya avtomobil yollarının və yol avadanlıqlarının texniki vəziyyətinə baxış, yol texnikasının, maşın-mexanizmlərin, nəqliyyat vasitələrinin hazır vəziyyətə gətirilməsi, körpülər yerləşən ərazidə çayların yataqlarının, yollarda suötürücü boruların və yol kənarlarındakı suaxıdıcı xəndəklərin təmizlənməsi, qum, texniki duz, yanacaq-sürtkü materialları ehtiyatının yaradılması və s. daxildir. İlkin mərhələdə 24885 kubmetr qum, 1160 ton texniki duz ehtiyatı yaradılıb. Əlavə 500 ton texniki duzun alınması üçün müqavilə bağlanılıb. Həmçinin 1047 maşın-mexanizm və nəqliyyat vasitəsi hazır vəziyyətə gətirilib. Hava şəraiti ilə bağlı zərurət yaranarsa, texniki duz, qum ehtiyatı, maşın-mexanizmlər və nəqliyyat vasitələrinin sayı artırılacaq.
Yeri gəlmişkən, Nəqliyyat Nazirliyi “Azəryolservis” ASC tərəfindən yol təsərrüfatında daha bir yeniliyə imza atılıb. Qurumun mətbuat xidmətindən qəzetimizə verilən açıqlamaya görə, yol təsərrüfatında, asfalt-beton örtüyünün ömrünün uzadılması məqsədilə yolun hərəkət hissəsinə xüsusi maddənin çəkilməsinə başlanılıb. Sözügedən işlərə Bakı-Ələt-Qazax sərhədi avtomobil yolunun 14-cü kilometrliyindən Qobustan qəsəbəsi istiqamətinə doğru start verilib. İlkin mərhələdə 800 min kvadratmetr sahənin, təqribi olaraq yolun Qobustan qəsəbəsinə qədər olan 60-65 kilometrlik hissəsinin asfalt-beton örtüyünün üzərinə 3-4 millimetr qalınlığında “E-Krete polimer kompozit” adlı maddənin çəkilməsi planlaşdırılır. Bu səbəbdən də Bakı-Ələt-Qazax sərhədi avtomobil yolunun 14-cü kilometrliyindən Qobustan qəsəbəsinə qədər olan ərazidə işlər bitənə qədər hissə-hissə nəqliyyat vasitələrinin hərəkəti məhdudlaşdırılacaq.
Vüsalə

Paylaş:

Baxılıb: 1050 dəfə