Lənkəranda “Mətbuatda ədəbi dilin qorunması: problemlər və perspektivlər” mövzusunda konfrans keçirilib

Bakı:

33 °C

25 %

4 m/s

AZ RU EN

Ana səhifə / Sosial / Lənkəranda “Mətbuatda ədəbi dilin qorunması: problemlər və perspektivlər” mövzusunda konfrans keçirilib

Lənkəranda “Mətbuatda ədəbi dilin qorunması: problemlər və perspektivlər” mövzusunda konfrans keçirilib

06.08.2015 [00:41]

Avqustun 5-də Lənkəran şəhərindəki Mədəniyyət Mərkəzində Lənkəran şəhər İcra Hakimiyyəti və Azərbaycan Respublikası Mətbuat Şurasının birgə təşkilatçılığı ilə “Mətbuatda ədəbi dilin qorunmasi: problemlər və perspektivlər” mövzusunda konfrans keçirilib.
AZƏRTAC xəbər verir ki, tədbirdə cənub bölgəsində fəaliyyət göstərən kütləvi informasiya vasitələrinin təmsilçiləri, dilçi alimlər, müəllimlər və ictimaiyyət nümayəndələri iştirak ediblər.
Konfransda çıxış edən Lənkəran şəhər İcra Hakimiyyəti aparatının ərazi idarəetmə və yerli özünüidarəetmə orqanları ilə iş şöbəsinin müdiri Əlimərdan Əliyev müzakirə olunan mövzunun aktuallığını diqqətə çatdıraraq, rayonda KİV-lərin nümayəndələri üçün yaradılan şəraitdən, Azərbaycan dilinin saflığının qorunması naminə jurnalistlərin qarşısında duran vəzifələrdən danışıb.
Mətbuat Şurasının sədri Əflatun Amaşov çıxışında Lənkəranda 10-a yaxın kütləvi informasiya vasitəsinin fəaliyyət göstərdiyini vurğulayıb. Ə.Amaşov Azərbaycan ədəbi dilinin mətbuatda işlənməsi mövzusuna həsr olunan konfransların bundan sonra Şəki və Qubada keçiriləcəyini bildirib, medianın üzərinə düşən mühüm vəzifələri diqqətə çatdırıb.
Konfransda Mətbuat Şurasının monitorinq qrupunun rəhbəri İlham Abbasovun mövzu ilə bağlı məruzəsi dinlənilib. Qeyd olunub ki, Azərbaycan ədəbi dilinin qorunması, inkişafı və düzgün tətbiqi dövlətimizin prioritet istiqamətlərindən biridir. Azərbaycan dili böyük bir inkişaf yolu keçmiş qədim dillərdən biridir və “Kitabi Dədə Qorqud”dan bəri 1300 illik tarixə malikdir.
Diqqətə çatdırılıb ki, hələ 1978-ci ildə Azərbaycan SSR-nin Konstitusiyasında Ulu öndər Heydər Əliyevin sayəsində Azərbaycan dili dövlət dili kimi təsbit olunmuşdu. 1995-ci ildə qəbul edilmiş və Ümummilli liderimizin müəllifi olduğu Əsas Qanunumuzun 21-ci maddəsində Azərbaycan dili dövlət dili kimi yenidən təsdiqləndi. Son 10 ildə isə Prezident İlham Əliyevin Fərman və sərəncamları ilə Azərbaycan dili ilə bağlı 20-dən artıq normativ sənəd qəbul olunub.
İlham Abbasov Azərbaycan dilinin qloballaşma şəraitində zamanın tələblərinə uyğun inkişafı, qorunması, elektron məkanda daha geniş istifadəsi və ölkədə dilçiliyin inkişaf etdirilməsi mexanizminin yaradılması, Azərbaycan dilinin lüğət tərkibinin və qrammatik normalarının sistemləşdirilməsi və digər məsələlər barədə də geniş məlumat verib.
Sonda konfrans iştirakçılarını maraqlandıran suallar cavablandırılıb.

Paylaş:

Baxılıb: 830 dəfə