Dövlət İdarəçilik Akademiyasında Nobel mükafatı laureatı ilə görüş keçirilib

Bakı:

15 °C

67 %

5 m/s

Əlaqə

AZ RU EN

Ana səhifə / Sosial / Dövlət İdarəçilik Akademiyasında Nobel mükafatı laureatı ilə görüş keçirilib

Dövlət İdarəçilik Akademiyasında Nobel mükafatı laureatı ilə görüş keçirilib

02.10.2014 [09:52]

Oktyabrın 1-də Azərbaycan Respublikasının Prezidenti yanında Dövlət İdarəçilik Akademiyasında (DİA) IV Bakı Beynəlxalq Humanitar Forumunun iştirakçısı, ABŞ-ın Stanford Universitetinin professoru, fizika üzrə Nobel mükafatı laureatı Robert Betts Laflin ilə görüş keçirilib.
AzərTAc xəbər verir ki, professor-müəllim heyətinin və tələbələrin iştirakı ilə keçirilən görüşdə DİA-nın rektoru, akademik Urxan Ələkbərov Nobel mükafatçısının elmi fəaliyyətindən, qazandığı uğurlardan və fizika elminin inkişafına verdiyi töhfələrdən danışıb.
Akademik U.Ələkbərov qonağa görüşdə iştirak etdiyi üçün təşəkkürünü bildirib, onun DİA-da olmasını yüksək qiymətləndirib. Həmçinin akademiyada belə görüşlərin keçirilməsinin bu ali təhsil müəssisəsinin elmi potensialının səviyyəsinin yüksəlməsinə müsbət təsir etdiyini bildirib.
Rektor Prezident İlham Əliyev tərəfindən həyata keçirilən strategiyaya əsasən, Azərbaycan Respublikasında səmərəli dövlət idarəçiliyi, davamlı inkişaf, ekoloji sivilizasiya, insan potensialının yüksəldilməsi kimi sahələrin inkişaf etdirilməsi istiqamətlərinin ölkə rəhbərinin diqqətində olduğunu vurğulayıb.
Görüşdə çıxış edən Robert Betts Laflin son illər Azərbaycanın daha da inkişaf etdiyini və dünya reytinqlərində xeyli irəlilədiyini və ölkədə səmərəli dövlət idarəçiliyi, davamlı inkişaf sahəsində mühüm addımların atıldığını diqqətə çatdırıb.
DİA-da növbəti görüşdən məmnunluğunu ifadə edən qonaq bildirib ki, Bakıda keçirilən Beynəlxalq Humanitar Forum Avropa səviyyəsində tədbirdir. Bu, humanitar və eyni zamanda, siyasi forumdur. Çünki Forumda nüfuzlu elm adamları ilə yanaşı, görkəmli ictimai və siyasi xadimlər də iştirak edəcəklər. Ölkəniz müstəqilliyinin bərpasından sonra sürətli inkişaf yoluna qədəm qoyub. Azərbaycan neftlə zəngin ölkədir, qədim neft tarixiniz var və respublikanız dünyada belə tanınır. Azərbaycanda qeyri-neft sektorunun dinamik inkişafını da müşahidə etmək çox xoşdur.
Qonaq cəmiyyətin, eləcə də dünyanın gələcəyinin bilik, təhsil üzərində qurulacağını qeyd edərək, tələbələri öz gələcəkləri haqqında indidən düşünməyə çağırıb.
Nobel mükafatçısı deyib ki, Bakı Beynəlxalq Humanitar Forumu ən geniş humanitar əməkdaşlıq məsələlərinin müzakirə edildiyi nüfuzlu bir məkandır. O, mədəniyyətlər, sivilizasiyalar və konfessiyalar arasında zəngin əməkdaşlıq ənənələri olan Azərbaycanın bu formatda tədbirlərin keçirilməsi üçün ideal yer olmaqla yanaşı, Forumun ən mühüm məsələlərə dair geniş spektrli dialoqlar, fikir mübadilələri və müzakirələr aparmaq üçün beynəlxalq miqyasda nüfuzlu elmi-siyasi platforma olduğunu xüsusi vurğulayıb.
Sonra Robert Betts Laflin tələbələri maraqlandıran sualları cavablandırıb.

Paylaş:

Baxılıb: 932 dəfə