“Qəbul imtahanlarında 700 bal toplamaq mənim üçün sürpriz oldu”

Bakı:

22 °C

67 %

8 m/s

Əlaqə

AZ RU EN

Ana səhifə / Sosial / “Qəbul imtahanlarında 700 bal toplamaq mənim üçün sürpriz oldu”

“Qəbul imtahanlarında 700 bal toplamaq mənim üçün sürpriz oldu”

24.07.2014 [09:59]

Samir Rzayev II ixtisas qrupu üzrə qəbul imtahanında maksimal nəticəyə imza atıb
İyulun 22-də Tələbə Qəbulu üzrə Dövlət Komissiyası (TQDK) II və III ixtisas qrupunun abituriyentləri üçün keçirilmiş qəbul imtahanının nəticələrini elan edib. TQDK-nın qəbul imtahanının nəticələri barədə açıqlamasına görə, imtahanda iştirak etmiş abituriyentlərdən iki nəfəri maksimum nəticə əldə edib. Belə ki, II ixtisas qrupu üzrə keçirilmiş qəbul imtahanında Samir Rzayev və Qoşqar Qədimbəyli ən yüksək nəticəyə imza atıblar. III ixtisas qrupu üzrə keçirilən qəbul imtahanında isə 700 bal toplayan olmayıb.
II ixtisas qrupu üzrə imtahandan 700 bal toplayan abituriyentlərdən biri-Samir Rzayev Bakı Dövlət Universitetinin nəzdində yaradılmış Türkiyə Dəyanət Vəqfi Bakı Türk liseyinin məzunudur. O, imtahan zamanı cavabları yaxşı yazsa da, nəticələrin maksimum olacağını gözləmirmiş. S.Rzayev bildirib ki, 700 bal toplayaraq maksimal nəticəyə imza atmaq çox gözəl, fərqli hissdir: “Sualların cavablarını yaxşı yazdığımı bilirdim, amma 700 bal mənim üçün sürpriz oldu. 700 balı gözləmirdim. Eşidəndə əvvəlcə, heç bir şey hiss etmədim. Sonra əlbəttə ki, böyük sevinc hissi yaşadım. Ailəm də xəbəri eşidəndə çox sevindi”.
Samir deyib ki, imtahanlara oxuduğu liseydə hazırlaşıb. O, artıq ixtisas seçimi haqda da fikrini qətiləşdirdiyini və ADA Universitetində təhsilini davam etdirmək niyyətində olduğunu söyləyib: “İstədiyim ixtisas “Biznesin idarə edilməsi”dir. ADA Universitetində təhsil almaq istəyirəm”.
Qeyd edək ki, əslən Şuşa rayonundan olan Samir bu gün ölkəmizdə təhsilin inkişafına göstərilən diqqət və qayğıdan razı olduğunu bildirib. Onun sözlərinə görə, Prezident İlham Əliyevin apardığı uğurlu siyasət Azərbaycanda müasir texnologiyaların geniş şəkildə tətbiqinə yol açıb.
Təbii ki, bu şad xəbər Samir Rzayevin ailəsində də böyük sevinclə qarşılanıb. Qəzetimizə danışan Samirin atası-Zahid Rzayev bildirib ki, bəzi hisslər var ki, onu sözlə izah etmək mümkün deyil. Hazırda gözəl və fəxr ediləsi hisslər keçirdiyini söyləyən Z.Rzayev Samirin hər zaman dərslərinə məsuliyyətlə yanaşdığını bildirib. Onun sözlərinə görə, qrup və ixtisas seçimində də oğluna heç bir təsir göstərməyib: “II ixtisas qrupunu seçməsi də özünün istəyi ilə olub. Təbii ki, Samirin bu cür gözəl nəticəyə imza atmasında təhsil aldığı məktəbin də rolu böyükdür”.
Vergilər Nazirliyinin əməkdaşı olan Z.Rzayev dövlətimizin təhsilə qayğısını olduqca yüksək qiymətləndirib. O bildirib ki, Prezident İlham Əliyev hər zaman təhsilin səviyyəsinin artırılmasına, o cümlədən, təhsil ocaqlarının maddi-texniki bazasının yeni dövrə uyğun şəkildə müasirləşdirilməsinə xüsusi diqqət göstərib. Z.Rzayev Heydər Əliyev Fondunun ölkəmizdə təhsilin inkişafı istiqamətində həyata keçirdiyi layihələrə də toxunub. Qeyd edib ki, yaradılan gözəl, müasir mühit gənclərimizin daha yaxşı oxumasına, təhsilə daha diqqətlə yanaşmasına şərait yaradır.
PƏRVİZ

Paylaş:

Baxılıb: 1124 dəfə