Abdal Gülablının anım günü keçirilib

Bakı:

20 °C

60 %

1 m/s

Əlaqə

AZ RU EN

Ana səhifə / Sosial / Abdal Gülablının anım günü keçirilib

Abdal Gülablının anım günü keçirilib

08.07.2014 [10:27]

Ağdam rayonunun Quzanlı qəsəbəsində yerləşən Ağdam Dövlət Dram Teatrının binasında Qarabağın dilbər guşələrindən biri və 22 ildir ki, ermənilərin işğalı altında olan Abdal-Gülablı kəndinin anım günü keçirilib. Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi və Ağdam rayon İcra Hakimiyyətinin təşkilati dəstəyi ilə “Azadlıq Hərəkatçıları” İctimai Birliyinin həyata keçirdiyi “Abdal-Gülablının anım ili” layihəsi çərçivəsində gerçəkləşən musiqili-ədəbi axşamda əvvəlcə Qulu Ağsəsin müəllifliyi ilə AzTV-də istehsal olunmuş “Yurd yeri: Abdal-Gülablı” filmi nümayiş olunub. Tədbiri respublikanın Əməkdar artisti, tanınmış diktor Əli Məmmədov açıb. Daha sonra layihənin rəhbəri Təhmasib Novruzov layihənin əsas məqsədlərindən və qarşıya qoyulan vəzifələrdən danışıb. T.Novruzov tədbir iştirakçılarına layihə çərçivəsində görülmüş işlər haqqında ətraflı məlumat verib. Qeyd olunub ki, layihə çərçivəsində “Yurd yeri: Abdal-Gülablı” adlı kitab çap olunub, “SəsTV” onlayn televiziyası ilə birlikdə 30 dəqiqəlik “Abdal-Gülablısız 22 il” adlı film hazırlanıb, Abdal-Gülablı əsilli tarixi şəxsiyyətlər və müasir dövrdəki ziyalılar haqqında geniş məlumatlar əldə edilib, kəndin tarixi ilə bağlı bir sıra yeni faktlar aşkar olunub. T.Novruzov əlavə edib ki, hələ 1970-ci illərdə Ulu öndər Heydər Əliyevin dilçilik elminin bir sahəsi olan Anomastikanın, xüsusilə Toponomika bölməsinin inkişafına göstərdiyi qayğının əsl mahiyyəti və əhəmiyyəti bu layihənin icrası zamanı bir daha təsdiqini tapıb. Sevindirici haldır ki, Ulu öndərin layiqli davamçısı, Azərbaycan Respublikasının Prezidenti İlham Əliyev də bu sahəyə daim diqqət və qayğı göstərir. Bu gün gerçəkləşən bu və buna bənzər layihələr məhz bu qayğının təzahürüdür.
Musiqili - ədəbi axşamda filologiya üzrə fəlsəfə doktoru Almara Nəbiyeva, şair Abdal Qəhrəman (Qəhrəman Hüseynov) çıxış edərək Abdal-Gülablının yerləşdiyi məkanın heyrətamiz gözəlliyindən, bu kəndin səfalı təbiətindən, təbii sərvətlərindən, tarixindən, yetirdiyi görkəmli tarixi simalardan söhbət açıblar.
Səxavət Məmmədov adına “Qarabağ” İnstrumental Ansamblının və ansamblın solistləri, Azərbaycan Respublikasının Əməkdar artisti Fehruz Səxavətin, Əliyar Məmmədovun, gənc xanəndə, “Muğam” Respublika Festivalının qalibi Səbinə Ərəbovanın ifalarında səslənən musiqi nömrələri tədbir iştirakçılarının zövqünu oxşamaqla yanaşı, vətənpərvərlik hisslərini tərənnüm edib. Gənc Qiraətçilərin Ümumrespublika Müsabiqəsinin qalibləri Əsmər Qasımovanın, Ofelya Nəbiyevanın, Arif və Fidan İsmayılovların, Şölə Kərimovanın Abdal-Gülablı əsilli şairlərin yaradıcılığından ifa etdikləri şeirlər tədbirə xüsusi rəng qatıb.
Sonda Ağdam rayon İcra Hakimiyyətinin başçısı Raqub Məmmədov çıxış edərək bu səpkidə keçirilən tədbirlərin əhəmiyyətindən söz açıb və belə bir tədbirin gerçəkləşməsində əməyi olan hər kəsə Ağdam ictimaiyyəti adından təşəkkürünü bildirib.

Paylaş:

Baxılıb: 1295 dəfə