Səbail rayonunda əhalinin tibbi müayinədən keçirilməsi vəziyyəti müzakirə olunub

Bakı:

15 °C

63 %

5 m/s

Əlaqə

AZ RU EN

Ana səhifə / Sosial / Səbail rayonunda əhalinin tibbi müayinədən keçirilməsi vəziyyəti müzakirə olunub

Səbail rayonunda əhalinin tibbi müayinədən keçirilməsi vəziyyəti müzakirə olunub

03.04.2014 [09:41]

Prezident İlham Əliyevin tapşırığına uyğun olaraq fevralın 17-dən mayın 1-dək ölkəmizdə əhalinin tibbi müayinədən keçirilməsi tədbirləri Səbail rayonunda da yüksək səviyyədə təşkil olunub.
Bu mühüm aksiyanın keçirilməsi vəziyyətini müzakirə etmək üçün Səbail rayon İcra Hakimiyyəti başçısının yanında Şuranın geniş yığıncağı keçirilib.
Rayon İcra Hakimiyyətindən AzərTAc-a bildiriblər ki, iclasda çıxış edən rayon icra hakimiyyətinin başçısı Asif Əsgərov Prezident İlham Əliyevin diqqət və qayğısının məntiqi nəticəsi olaraq ölkəmizdə iqtisadiyyatın inkişafının səhiyyə sahəsində də görülən işlərin daha böyük vüsətlə davam etdirilməsinə imkan yaratdığını diqqətə çatdırıb. Vurğulanıb ki, əhalinin sağlamlığı məsələlərini hər zaman diqqətdə saxlayan dövlət başçısının imzaladığı Dövlət Proqramlarına, Sərəncam və tapşırıqlarına əsasən müxtəlif profilli yeni səhiyyə müəssisələrinin tikintisi, mövcud tibb ocaqlarının yüksək standartlara cavab verə biləcək səviyyədə təmir olunması, yenidən qurulması, bu müəssisələrin müasir tibb avadanlıqları ilə təchizatı məsələləri aparılır.
Bildirilib ki, rayonda fəaliyyət göstərən 25 tibb müəssisəsinin böyük əksəriyyəti əsaslı təmir olunub. Təkcə son iki il ərzində Səbail rayonunda MTN-nin yeni hərbi hospitalı istifadəyə verilib, 1, 2, 15, 33 saylı şəhər poliklinikaları, 3 saylı vərəm əleyhinə dispanser, 3 saylı təcili tibbi yardım stansiyası əsaslı təmir olunub, yeni 19 saylı köməkçi təcili yardım stansiyası açılıb.
Qeyd edilib ki, dövlət başçısının tapşırığı ilə əlaqədar rayon İcra Hakimiyyətində müşavirə keçirilib, əlaqədar qurumlara müvafiq tapşırıqlar verilib.
Məlumat verilib ki, fevral ayının 17-dən aprel ayının 1-dək rayon üzrə 42.084 nəfər müayinədən keçib. Müayinə zamanı bəzi şəxslərdə arterial təzyiq, şəkərli diabet, qan, ürək-damar, tənəffüs sistemi və oynaq xəstəlikləri aşkarlanmış xəstələr ambulator, stasionar müalicəyə cəlb olunub və dispanser qeydiyyata götürülüb, onlara ixtisaslı həkimlər tərəfindən müalicə təyin olunub. Bu müddətdə 143 nəfər stasionar müalicəyə götürülüb, 5649 nəfərə ambulator müalicə təyin edilib. Görülən işlər rayon icra hakimiyyətində yaradılmış komissiya tərəfindən əlaqələndirilir.
Şura iclasında çıxış edən 1 saylı poliklinikanın baş həkimi Kübra Cabbarova, 33 saylı poliklinikanın baş həkimi Nazim İldırımzadə, 34 saylı poliklinikanın baş həkimi Vəfa Əliyeva, 2 saylı poliklinikanın baş həkim müavini Şahin Quliyev çalışdıqları tibb müəssisələrində əhalinin profilaktik müayinəsi, həmçinin nəzərdə tutulan tədbirlərlə bağlı məlumat veriblər.
Bildirilib ki, rayon ərazisində yerləşən bütün müəssisələrin, idarə və təşkilatların, orta və ali təhsil müəssisələrinin, digər təşkilatların işçilərinin, ərazidə məskunlaşmış məcburi köçkünlərin də tibbi müayinələrə qatılması üçün işlər həyata keçirilir. Bir sıra hallarda isə səhiyyə müəssisələrində təşkil olunmuş səyyar həkim briqadaları tərəfindən iş yerlərində müayinələrin keçirilməsi aparılır, həmçinin xəstə vətəndaşlar evlərində müayinə olunurlar.
Tədbirdə bir sıra təkliflər də səsləndirilib.
Sonda bu mühüm aksiyanın uğurla başa çatdırılması üçün əlavə tədbirlərin həyata keçirilməsi ilə bağlı qarşıda duran vəzifələrdən danışılıb, təşkilat rəhbərlərinə tapşırıqlar verilib.

Paylaş:

Baxılıb: 1138 dəfə