BDYPİ ilə NİİM Bilik Günü ilə əlaqədar valideyn və tələbələrə müraciət edib

Bakı:

25 °C

57 %

11 m/s

Əlaqə

AZ RU EN

Ana səhifə / Sosial / BDYPİ ilə NİİM Bilik Günü ilə əlaqədar valideyn və tələbələrə müraciət edib

BDYPİ ilə NİİM Bilik Günü ilə əlaqədar valideyn və tələbələrə müraciət edib

11.09.2025 [11:26]

Daxili İşlər Nazirliyinin Baş Dövlət Yol Polisi İdarəsi (BDYPİ) və Nəqliyyatı İntellektual İdarəetmə Mərkəzi (NİİM) 15 Sentyabr-Bilik Günündə yollarda tıxac və sıxlığın yaranmaması üçün müvafiq tədbirlər görür və bu istiqamətdə işlər həmin gün də həyata keçiriləcək.

Bu barədə adıçəkilən qurumlardan AZƏRTAC-ın mövzu ilə bağlı sorğularına verilən cavablarda bildirilib.

BDYPİ-dən diqqətə çatdırılıb ki, sentyabrın 15-də yeni tədris ilinin başlaması ilə əlaqədar yollarda hərəkət intensivliyinin artacağını nəzərə alaraq, polis, o cümlədən DYP tərəfindən zəruri təşkilati-əməli işlər görüləcək, şəxsi heyət gücləndirilmiş iş rejimində çalışacaq. “Lakin yollarda sıxlığın azaldılmasına xidmət edən qabaqlayıcı tədbirlər, yalnız hərəkət iştirakçılarının məsələyə adekvat yanaşması ilə səmərəli nəticə verə bilər. Təsadüfi deyil ki, təhsil müəssisələrinin yerləşdiyi küçə və prospektlərdə sıxlığın, tıxacların yaranması, məhz həmin təhsil ocaqlarına fərdi avtomobillə gələn şəxslərin dayanma, durma və parklama qaydalarını kobud şəkildə pozmasından qaynaqlanır. BDYPİ bununla yanaşı, təhsil müəssisələrinə şəxsi nəqliyyat vasitələrində gələn sürücülərə, ələlxüsus övladlarını məktəbə fərdi minik avtomobilində aparıb-gətirən valideynlərə müraciət edərək onlardan digər hərəkət iştirakçılarına süni maneələr yaratmamağı, xüsusilə paytaxtda nəqliyyat sıxlığını nəzərə alaraq, mümkün qədər ictimai nəqliyyatdan istifadə etməyi, yaxın məsafələri piyada qət etməyə üstünlük verməyi xahiş edir, gənc nəsli isə yol hərəkəti mədəniyyətinin formalaşmasına töhfə verməyə, bu işdə şəxsi nümunə göstərməyə çağırır”, - deyə idarədən bildirilib.

NİİM-dən vurğulanıb ki, təcrübə hər yeni tədris ili başlananda övladlarını təhsil ocaqlarına avtomobillə gətirən bir çox valideynlərin və ya özü sükan arxasında əyləşən əksər tələbələrin yol hərəkəti qaydalarına əməl etmədiyini göstərib. Bu isə paytaxtın küçə və prospektlərində, təhsil müəssisələrinin yaxınlığında olan yollarda süni sıxlığa səbəb olur. Bu cür hallar ictimai nəqliyyatdan istifadə edən digər hərəkət iştirakçılarının da yolda əlavə vaxt itirməsinə səbəb olur. “NİİİM-in əməkdaşları tərəfindən paytaxtda yerləşən təhsil müəssisələrinin ətrafında, yaxın küçə və prospektlərdə müşahidə kameraları vasitəsilə yollar nəzarətdə saxlanılır. Məktəblərdə dərslərlə əlaqədar nəqliyyat sıxlığının yaranmasına səbəb olan hallar olduğu zaman yol polisinə məlumat verilməsi ilə yanaşı, müxtəlif istiqamətlər üzrə svetoforlara “yaşıl dalğa” rejimi tətbiq ediləcək. Bütün bunları nəzərə alaraq, şəxsi minik avtomobilləri ilə övladlarını məktəbə gətirən valideynlərə, eləcə də tələbələrə tövsiyə edirik ki, avtomobillərini mümkün qədər yeraltı və yerüstü dayanacaqlarda, xüsusi olaraq ayrılmış yerlərdə park etsinlər, nəqliyyat vasitəsini dayanma və durmanın qadağan olunduğu yerlərdə saxlamasınlar”, - deyə mərkəzdən bildirilib.

Paylaş:

Baxılıb: 589 dəfə