Müharibə əlilləri və şəhid ailələrinə növbəti dövlət qayğısı

Bakı:

25 °C

55 %

5 m/s

Əlaqə

AZ RU EN

Ana səhifə / Sosial / Müharibə əlilləri və şəhid ailələrinə növbəti dövlət qayğısı

Müharibə əlilləri və şəhid ailələrinə növbəti dövlət qayğısı

15.05.2025 [10:21]

İmtiyazlı kateqoriyaya aid bütün şəxslər 2030-cu ilə qədər mənzillə təmin olunacaqlar

Prezident İlham Əliyev “Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında” 2021-ci il 25 yanvar tarixli Sərəncamına dəyişiklik edib. Sərəncama edilmiş dəyişiklərə əsasən, ölkəmizin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması tədbirləri 2030-cu ilə qədər davam etdiriləcək.

Sənəddə nəzərdə tutulmuş tədbirlərə əsasən, qeyd edilən sosial kateqoriyaların ailə üzvlərinə pulsuz evlərin və mənzillərin verilməsi qarşıdakı illərdə diqqətdə saxlanılacaq. Həmin müddətdə bütün imtiyazlı şəxslərin dövlət hesabına mənzil təminatı öz həllini tapacaq. Bu sosial siyasət tədbirləri çərçivəsində, 2014-cü il yanvarın 1-dən 2023-cü il yanvarın 1-dək yaşayış sahəsinə ehtiyacı olan qismində uçota alınmış şəhid ailələrinin və müharibə ilə əlaqədar əlilliyi olan şəxslərin, habelə uçota alınma tarixindən asılı olmayaraq, Çernobıl AES-də qəzanın ləğvi , o cümlədən hərbi xidmət vəzifələrinin yerinə yetirilməsi ilə əlaqədar əlilliyi müəyyən edilmiş şəxslərin mərhələlərlə mənzil və ya fərdi evlə təmin edilməsi davam etdiriləcək.

Qanunvericiliyə əsasən, qeyd edilənlərlə yanaşı, 16 avqust 2021-ci il tarixə kimi uçota alınmış gözdən əlilliyi olan şəxslər və uşaqlar üçün sosial xidmət müəssisələrinin və təhsil müəssisələrinin valideynlərini itirmiş və valideyn himayəsindən məhrum olmuş məzunları üçün də pulsuz mənzillər nəzərdə tutulub. 2020-ci ildə aparılan hərbi əməliyyatlar zamanı Azərbaycanın ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi müəyyən edilmiş şəxslər və şəhid ailələri, “Vətən Müharibəsi Qəhrəmanı” adı verilmiş şəxslər, eləcə də ölümündən sonra həmin ad verilmiş şəxslərin ailə üzvləri də imtiyazlı ailələr hesab olunurlar.

Şəhid ailələri və müharibə əlillərinə 16 min mənzil və fərdi ev təqdim edilib

Müharibə əlilləri və şəhid ailələrinə davamlı sosial qayğı dövlətin həyata keçirdiyi sosial siyasətin əsas istiqamətlərindən biridir. Qarabağ müharibəsi əlilləri və şəhid ailələrinin mənzil və məişət şəraitinin yaxşılaşdırılması üçün fərdi və çoxmənzilli yaşayış binalarının tikilib istifadəyə verilməsi, eləcə də bu kateqoriyadan olan insanların avtomobillərlə təmin olunması bunun əyani təsdiqidir. 2021-2025-ci illər ərzində şəhid ailələri, müharibə əlilləri və digər həssas qrupa aid olan insanların mənzillə tam təminatının həyata keçirilməsi üçün Dövlət Proqramı çərçivəsində indiyə qədər Əmək və Əhalinin Sosial Müdafiəsi Nazirliyi tərəfindən şəhid ailələri və müharibə ilə əlaqədar əlilliyi olan şəxslərə postmüharibə dövründə 6,8 min, ümumən ötən dövrdə 16 min mənzil və fərdi ev təqdim edilib. Bu sahə hər il xüsusi olaraq dövlət büdcəsinin sosial xərclər bölməsində diqqətdə saxlanılır və imtiyazlı şəxslərin mənzil təminatı üçün zəruri həcmlərdə maliyyə təminatı ayrılır. 2025-ci ildə isə həmin məqsədlər üçün ayrılmış maliyyə vəsaitinə əsasən, daha 1000 imtiyazlı şəxsə mənzillərin verilməsi nəzərdə tutulub.

Təqaüd və müavinətlər davamlı olaraq artırılır

Dövlətin həmin sosial kateqoriyaya olan sosial qayğısının təzahürü olaraq “Şəhid ailəsi üçün Azərbaycan Respublikası Prezidentinin təqaüdü”nün aylıq məbləği 2023-cü il yanvarın 1-dən 500 manatdan 600 manata qaldırılıb. Həmçinin, “20 Yanvar şəhidinin ailəsi üçün Azərbaycan Respublikası Prezidentinin təqaüdünün təsis edilməsi haqqında” Fərmanına əsasən 20 Yanvar şəhidinin ailəsi üçün Azərbaycan Prezidentinin təqaüdünün aylıq məbləği 2023-cü il yanvarın 1-dən 600 manat müəyyənləşdirilib. Eləcə də, müharibə əlilərinin və Çernobıl AES-də qəzada əlilliyi müəyyən edilmiş şəxslərin təqaüd və müavinətləri artırılıb. Hazırda beşinci sosial paket çərçivəsində həmin sosial qrupa aid bütün şəxslərin təqaüd və müavinətlərinin yenidən artırılması ilə bağlı təkliflər yekunlaşıb və yaxın günlərdə artımlar təmin olunacaq. Bütün bunlar onu təsdiqləyir ki, şəhid ailələri, qazilər və əhalinin digər həssas qruplarına aid insanlara diqqət və qayğının göstərilməsi, onların rifah halının yaxşılaşdırılması dövlətimizin yürütdüyü siyasətin prioritet istiqamətlərindən biridir.

E.CƏFƏRLİ

Paylaş:

Baxılıb: 376 dəfə