Zaqatala sakinləri təyyarə qəzasından sonra görülən tədbirləri yüksək qiymətləndirirlər

Bakı:

28 °C

48 %

11 m/s

Əlaqə

AZ RU EN

Ana səhifə / Sosial / Zaqatala sakinləri təyyarə qəzasından sonra görülən tədbirləri yüksək qiymətləndirirlər

Zaqatala sakinləri təyyarə qəzasından sonra görülən tədbirləri yüksək qiymətləndirirlər

26.12.2024 [21:18]

Ötən gün Qazaxıstanın Aktau şəhəri yaxınlığında baş verən təyyarə qəzasında Zaqatala rayonunun sakinləri də olub. Onların arasında ölən də var, xoşbəxtlikdən sağ qalanlar da. Sərnişinlərdən 8 nəfəri Danaçı kəndinin, iki nəfər isə Paşan və Höytəla kəndlərinin sakinləri olub.

AZƏRTAC -ın bölgə müxbiri Danaçı kəndində olub, təyyarə qəzasında yaralanan sakinlərin yaxınları, qohumları və ailə üzvləri ilə görüşüb, onların son durumu və vəziyyətləri ilə maraqlanıb.

Danaçı kəndinin sakinləri zəhmətkeş, alın təri ilə ailəsini dolandıran insanlardır. Burada elə ailə olmaz ki, müxtəlif ölkələrə iş dalınca getməsin. Əsasən də Rusiyanın şəhərlərində qohumu olanlar, ailə üzvləri yaşayanlar az deyil. Bu kənd həm də ölkəmizdə ən çox velosiped və motosikleti ilə tanınan bir yaşayış məntəqəsidir. Lakin dünəndən kənddə sakitlik hökm sürür. Həmkəndlilərinin, qohum-əqrəbanın təyyarə qəzasına düşməsi hamını narahat edib. Sosial şəbəkələrin məlumatları insanlarda təşviş yaratsa da, Prezident İlham Əliyevin səfərini yarıda kəsərək ölkəyə qayıtması və təcili müşavirə keçirməsi bütün zaqatalalılar kimi Danaçı sakinlərinin də ürəyindən xəbər verib.

Kənddə olduğumuz bir neçə saat ərzində sakinlərlə əsasən təyyarə faciəsi haqqında fikir mübadiləsi apardıq, yaralıların vəziyyəti ilə maraqlandıq. Təyyarədə qəzaya düşənlər arasında ata Xızrı və qızı Səliyyət Geerovlar da var. Ötən gün Səliyyətin anası ilə telefon söhbəti ürəklərə su səpsə də, qızın atasından hələlik xəbər yoxdur. Qohum-əqrəba dünəndən onların evinə axın edir. Geerovların qonşusu və qohumu Şaban Əliyev ailənin üç uşağı olduğunu və hər birinin zəhmətlə yaşadığını deyir: “Mehriban ailədirlər. Qızından xəbər çıxdı, amma qonşu Xızrıdan hələ xəbər yoxdur. Biz yaxşı xəbər gözləyirik”. Şaban Əliyev dövlət başçısının müşavirədə çıxışını izlədiklərini və onun xalqla olduğunu inam və qürurla söylədi.

Bakı-Qroznı təyyarəsində uçanlar arasında bu kəndin qocaman sakinləri Nurulla və Müslümət Sıracovlar da olub. Ailənin yaxın qohumu Sabir Əhmədov bildirir ki, valideynlərin üç oğlu var və onların hamısı Qroznıda yaşayır. Valideynlər də Yeni ili qarşılamaq, həm də qışı övladlarının yanında keçirmək üçün gedirmiş. Sabir Əhmədov hadisələri, xəbərləri daha çox rəsmi kanallar vasitəsilə izlədiklərini və dövlətin lazım olan bütün tədbirləri görməsini yüksək qiymətləndirib.

Qəzada yaralanan Mahir Carayevin qardaşı Məzahir Carayev, eləcə də Nizami Cəlilovun atası Fizuli Cəlilovla da görüşüb söhbətləşirik. Onlar da yaxınlarının müalicə və müayinəsinin uğurla davam etdirildiyini bildirirlər. Fizuli Cəlilov bir valideyn olaraq dövlətin hadisə yerinə böyük bir heyət göndərməsini, Prezident İlham Əliyevin müşavirə keçirərək bütün tədbirlərin görülməsi barədə tapşırıq verməsini ürəkdən alqışladıqlarını ifadə edib.

Xatırladaq ki, baş vermiş faciə ilə əlaqədar bu gün Azərbaycanda matəm elan olunub.

Paylaş:

Baxılıb: 559 dəfə