Ukraynada Azərbaycan dili kursu açılıb

Bakı:

27 °C

52 %

13 m/s

Əlaqə

AZ RU EN

Ana səhifə / Sosial / Ukraynada Azərbaycan dili kursu açılıb

Ukraynada Azərbaycan dili kursu açılıb

16.09.2024 [11:46]

Ukraynada ödənişsiz əsasda Azərbaycan dili kursu açılıb. Burada ölkənin müxtəlif bölgələrindən olan insanlar dilimizi öyrənirlər. Məşğələlər “zoom” onlayn platformasında keçirilir.

AZƏRTAC xəbər verir ki, Azərbaycan dili kursu vəkil Şəmsi Məhərrəmovun dəstəyi ilə Ukrayna-Türk Mərkəzinin himayəsi altında təşkil olunub.

Kursun müəllimi Kiyev Milli Linqvistik Universitetində Heydər Əliyev adına Azərbaycan Dili və Mədəniyyəti Mərkəzinin rəhbəri və bu ali təhsil ocağında Azərbaycan dili fənnini tədris edən İntiqam Şıxızadədir.

Azərbaycan dili kursunun təşəbbüskarı olan Ukrayna-Türk Mərkəzinin həmtəsisçisi Marına Qonçaruk qeyd edib ki, hazırda burada 50-dən çox ukraynalı iştirak edir, onların əksəriyyəti gənclər, bəziləri isə əslən Azərbaycandan olan sakinlərdir. Bununla yanaşı, müdavimlər arasında Azərbaycan dilini öyrənmək istəyən bir neçə universitet müəllimi də var.

O əlavə edib: “Gənclər xalqlar arasında dialoqun inkişafı, yeni ideyalar və layihələr üçün çox mühüm resursdur. İstəyirəm ki, seçmə imtahanda iştirak edən gənclər ikitərəfli əlaqələrə inteqrasiya etsinlər, habelə yeni konstruktiv ideya və təşəbbüslər irəli sürsünlər”.

Şəmsi Məhərrəmov qeyd edib: “Bu layihə Ukrayna-Azərbaycan münasibətlərinin dərinləşməsi istiqamətində mühüm addımdır. Azərbaycan dilinin öyrənilməsi üzrə kursun açılması xalqlarımız arasında mədəni əlaqələrin və qarşılıqlı anlaşmanın möhkəmlənməsinə kömək edir, Azərbaycan haqqında daha çox məlumat almaq və ikitərəfli dialoqa töhfə vermək istəyən ukraynalı gənclər üçün şərait və imkanlar yaradır”.

Kursda iştirak edən tələbələr dilimizi öyrənməklə yanaşı, həm də Azərbaycanın zəngin mədəniyyəti, tarixi, coğrafiyası, xalqımızın mentaliteti və adət-ənənələri ilə tanış olurlar.

Azərbaycan dili kursunun iştirakçıları da təəssüratlarını bölüşüblər: “Mənim üçün bu kurs təkcə yeni dil öyrənmək deyil, həm də Azərbaycan mədəniyyəti ilə yaxından tanış olmaq üçün unikal imkandır. Bu, eyni zamanda, dünyanı dərk etmək üçün yeni perspektivlər açan bir təcrübədir. Bu yay Heydər Əliyevin Ukrayna-Azərbaycan münasibətlərində roluna həsr olunmuş Ümumukrayna Esse Müsabiqəsinin qalibi oldum. Mən Bakıya səfər etməyi, həmçinin gələcəkdə Azərbaycan Respublikasındakı səfirlikdə Ukraynanın diplomatı olmağı arzulayıram”, -deyə Kiyev Mədəniyyət Universitetinin Beynəlxalq əlaqələr fakültəsinin tələbəsi Daniil Sivak bildirib.

Layihə həm iştirakçılar, həm də müəllimlər tərəfindən müsbət rəy alıb. Onlar Ukrayna ilə Azərbaycan arasında ikitərəfli münasibətlərin inkişafı üçün belə təşəbbüslərin əhəmiyyətini vurğulayıblar.

Paylaş:

Baxılıb: 513 dəfə