“Beynəlxalq iqtisadi düzəni yenidən düşünmək”

Bakı:

29 °C

43 %

3 m/s

Əlaqə

AZ RU EN

Ana səhifə / Sosial / “Beynəlxalq iqtisadi düzəni yenidən düşünmək”

“Beynəlxalq iqtisadi düzəni yenidən düşünmək”

06.12.2012 [13:49]

Antalyada bu mövzuda keçirilən beynəlxalq konfransda YAP İdarə Heyətinin üzvü, professor Şahlar Əsgərov elmi məruzə ilə çıxış edib
Dialoq Avrasiya Forumunun təşəbüsü ilə 30 noyabr-1 dekabr tarixlərində Türkiyənin Antalya şəhərində “Beynəlxalq iqtisadi düzəni yenidən düşünmək” mövzusunda beynəlxalq elmi konfrans keçirilib. Konfransda YAP İdarə Heyətinin üzvü, professor Şahlar Əsgərov məruzə ilə çıxış edib. Ş.Əsgərovun verdiyi məlumata görə, tədbirdə 21 ölkədən 400 nəfərə yaxın nümayəndə iştirak edib. Azərbaycandan da bu mötəbər beynəlxalq konfransa böyük nümayəndə heyəti qatılıb. Azərbaycan Yazıçılar Birliyinin sədri, Xalq yazıçısı Anar, Milli Televiziya və Radio Şurasının sədri Nuşirəvan Məhərrəmli, Milli Məclisin Mədəniyyət komitəsinin sədri Nizami Cəfərov, müxtəlif elmi institutların, universitetlərin elm adamları da nümayəndə heyətinin tərkibində olub.
Konfransın aktual mövzuya həsr olunduğunu deyən Ş.Əsgərovun sözlərinə görə, hazırda qloballaşan dünyada bir çox ölkələrdə iqtisadi inkişaf baş verir, yoxsulluq azalır və s. Amma uğurlar olduğu kimi problemlər də var. İqtisadiyyat yüksəldikcə bəzi bəşəri dəyərlər aşınmaya məruz qalır. Belə halların qarşısı dünya alimləri tərəfindən alınmalıdır. Ona görə də, belə tədbirlərin əhəmiyyəti böyükdür.
Konfrans açılış toplantısından sonra 4 bölmədə öz işini davam etdirib və hər bölmədə dörd nəfər məruzə ilə çıxış edib. Ş.Əsgərovun sözlərinə görə, bölmələrdə ABŞ, İngiltərə və Hindistandan, həmçinin, MDB ölkələrindən olan alimlər çıxış ediblər. Azərbaycan nümayəndə heyətindən isə elmi məruzə ilə professor Şahlar Əsgərov konfransın dördüncü bölməsində çıxış edib. Məruzə “Zəif inkişaf etmiş ölkələrin yüksəlməsi yolları və gəlirlərin bölgüsündə ədalətsizlik” mövzusunda olub. “Məruzədə göstərilir ki, necə etmək lazımdır ki, zəif ölkələr inkişaf etsin. Bunun üçün ilk növbədə, idarəetmə mexanizmi təkmilləşməlidir. Eyni zamanda, keyfiyyət faktorunu artırmaq lazımdır. Bu, o deməkdir ki, ölkələr həm ümumi daxili məhsulun artımına, həm də mədəni inkişafa fikir verməlidirlər. Burada insan faktoru vacib rol oynayır. İnsan kapitalının inkişafı gələcəyə xidmət edir. Zəif dövlətlər təhsilə, elmin inkişafına diqqəti artırmalıdır” - deyə, Ş.Əsgərov vurğulayıb. Bu məruzə iştirakçılar tərəfindən maraqla dinlənilib və müzakirə olunub. Xüsusilə, konfransda iştirak edən Qazaxıstan və Qırğızıstanın nümayəndələri bu məruzəni yüksək qiymətləndiriblər.
Ş.Əsgərovun sözlərinə görə, tədbirin ikinci günü Dialoq Avrasiya Forumunun baş katibinin seçilməsi məsələsinə baxılıb və bu vəzifəyə Belarus nümayəndəsi seçilib. “Dialoq Avrasiya Forumunun təşəbbüskarı dünya şöhrətli yazıçı Çingiz Aytmatovdur və toplantıda onun adı tez-tez hallanırdı. Təşkilatın ilk baş katibi isə Azərbaycan Yazıçılar Birliyinin sədri Anar Rzayev olub. Bu forumun ideyası budur ki, Avrasiya məkanında mövcud olan problemlər güc yolu ilə yox, dialoq vasitəsi ilə həll olunmalıdır. Bu ideya indiki dövrün çağırışları ilə səsləşir. Yarananda 40 nəfər üzvü var idisə, indi forumda bu qitənin böyük ziyalı ordusu birləşib. Bu forum çox faydalı fəaliyyətlə məşğul olur. Ümumilikdə isə, hesab edirəm ki, keçirilən beynəlxalq konfrans bütün ölkələr üçün faydalı olacaq. Çünki nüfuzlu elm xadimlərinin, alimlərin təşəbbüsləri həmişə gözəl nəticələr verir” - deyə, Ş.Əsgərov vurğulayıb.
Nardar BAYRAMLI

Paylaş:

Baxılıb: 2678 dəfə