“AŞPA əməliyyatı”nın Fransa üzü...

Bakı:

23 °C

51 %

4 m/s

Əlaqə

AZ RU EN

Ana səhifə / Siyasət / “AŞPA əməliyyatı”nın Fransa üzü...

“AŞPA əməliyyatı”nın Fransa üzü...

31.01.2024 [10:23]

Makronun beyinsiz siyasətinə peyin “töhfəsi”...

Avropa Şurası Parlamet Assambleyasının Azərbaycana qarşı nümayiş etdirdiyi qərəz birmənalı şəkildə subyektiv xarakter daşıyır. O baxımdan ki, bu əsassız “təşəbbüs”ün arxasında heç də iddia olunan məqamlar dayanmır - başqa sözlə, Fransa və ya Almaniya öz xoşu ilə Qarabağdan Ermənistana gedən insanlar haqqında heç düşünmürlər belə. Həmin erməniəsilli insanlar indiki məqamda Qərb imperializmi üçün təsir rıçaqından uzağa getmir. Başda Fransa olmaq şərtilə AŞPA-da bu “oyunu” təşkil edən dairələr əllərindən bütün mümkün imkanların çıxdığının fərqindədirlər:

- Separatizmə son verilib;

- Regionda yeni münasibətlər sistemi və reallıqlar formalaşdırılıb;

- Azərbaycan bütün proseslərə (həm siyasi, həm iqtisadi, həm də hərbi) nəzarət və təsir ertmək imkanlarını dəfələrlə artırıb;

- Bölgənin yeni siyasi şəkilləndirilməsi Qərbin təsirindən kənarda baş verir.

AŞPA üzərindən köhnə oyunlar...

Bu deyilənlər həm də siyasi reallığın tablosudur. Azərbaycan ötən ilin sentyabrında keçirdiyi antiterror tədbirləri ilə regiona yeni siyasi-iqtisadi nəfəs verdi. Artıq özünü “hakim” sayan siyasi dairələr (xüsusilə Qərb təsisatları) regionun gələcək inkişaf trayektoriyasının yönləndirilməsinə təsir imkanlarını itirib. Dolayısı ilə, Fransanın timsalında Ermənistan üzərindən Cənubi Qafqazı siyasi basqıda saxlayan ermənipərəst qüvvələr birmənalı şəkildə zərərsizləşdirilib. Azəırbaycanın qəti və beynəlxalq hüquqa əsaslanan mövqeyi isə açıq və şəffadır - bölgədə formalaşacaq sülh Cənubi Qafqazın yeni inkişaf hədsəflərinin müstəqil inkişafını təmin edəcək. Nəzərə alsaq ki, Azərbaycan hər zaman müstəqil və milli maraqlara əsaslanan siyasət yürüdüb, bu tezis Ermənistanın da siyasi-iqtisadi müstəqliyi üçün “xartiya” sayıla bilər. Fransanın əsas qorxusu da budur:

- Bölgənin yüksək aktuallığa malik tranzit imkanlarının istismarı prosesindən kənarda saxlanılır;

- Cənubi Qafqaz kimi strateji bir məkanda Ermənistan kimi sözəbaxan vassal əldən çıxır;

- Yeni siyasi mərhələnin aparıcı ünsürünə çevriləcək Şərq-Qərb dəhlizinin yaratdığı imkanlarla güclənəcək Mərkəzi Asiyaya yönəlik planlaşdırılan siyasət iflasa uğrayacaq.

Bəli, Fransanı əsas “düşündürən” məqamlardan biri məhz böyük bir coğrafiyada Türk dövlətləri konseyinin formalaşmasıdır. Makron anlayır ki, Fransanın imperializmə əsaslanan Orta Şərq - Mərkəzi Asiya siyasəti üçün keçilməz sədd olan Türk amili yenidən və sürətlə beynəlxalq sistemin aparıcı elementinə çevrilməkdədir.

Fransa öz dərdini niyə çəkmir?

AŞPA-nın qərəzinin Fransadan qaynaqlandığı sirr deyil. Müzakirələrdə daha çox “canfəşanlıq” edən Fransa-Almaniya cütlüyünün tutduğu yol isə birmənalı şəkildə dalana doğru sürət yığır. AŞPA-da alınan bu kimi qərəzli qərarlarla, tutduğu ermənipərəst mövqe ilə, özünün dövlət büdcəsi hesabına Ermənistanı silahlahdırmaqla Fransa özünə quyu qazmaqdadır. Son dövrlərdə iqtisadi geriləmə, vergilərin fantastik səviyyəyə çatması, kənd təsərrüfatının iflası, təqaüdlərlə bağlı narazılıqlar Makron hökumətini pis yerdə yaxalayıb. Vəziyyətin gərginliyi və çıxılmaz olması isə bütün çılpaqlığı ilə ortadadır.

Məsələn, artıq bir neçə gündür davam edən fermer etirazları mütəşəkkil hal almaqdadır. Xatırladaq ki, fermerlər inflyasiya səbəbindən gəlirlərinin azalmasına, həmçinin Ukraynadan ölkəyə kənd təsərrüfatı məhsullarının idxalının genişlənməsinə etiraz edirlər.

Fransa polisi Avropanın ən böyük ərzaq bazarı olan Rungi və Paris yaxınlığındakı Roissy-Charlesdə etiraz edən fermerləri zirehli texnikalarla blokadaya alıb. Fermerlər isə artıq magistral yolları bağlamağa başlayıblar. Rungi kənd təsərrüfatı bazarında mühafizə gücləndirilib. Dəstək tədbirləri tələb edən fermerlər bu ölkənin 40 kommunasında etiraz aksiyaları keçirirlər. Eyni zamanda, fransalı fermerlər dövlət binalarına peyin vururlar. Onlar bununla Makron hökumətinin dövləti beyinlə yox, peyinlə idarə etdiyini simvolizə edirlər.

Parisə başucalığı gətirməyəcək

Beləliklə, bu gün Azərbaycana qarşı əssasız “səlib yürüşü” təşkil edən, itaətkar AŞ PA-nı bu oyunların “icraçısı” qismində çıxış etməyə yönləndirən Fransa özünün daxilindəki gərginliklərlə məşğul olsa, daha yaxşıdır. Dövlətin pulu ilə Ermənistana silah peşkəş edən, separatizmə illərlə yardım göstərən Makron hakimiyyəti özünü dalana məhkum edib. Avropanın enerji təhlükəsizliyində aparıcı rol alan, etibarlı tərəfdaş kimi tanınan, yeni dövrün əsas iqtisadi partnyoru kimi şöhrət qazanan, ən əsası isə bütün addımlarında beynəlxalq hüquqa istinad edən Azərbaycana qarşı əsassız və qərəzli addımlar Parisə başucalığı gətirmir. Makron bu işə açıq beyinlə yanaşmayana qədər, onun payı peyin olacaq...

S. İSMAYILZADƏ

Paylaş:

Baxılıb: 520 dəfə