Əli Əhmədov: "Siyasi partiyalar haqqında" Qanuna edilən dəyişikliklər Azərbaycanda siyasi islahatların tərkib hissəsi kimi qiymətləndirilməlidir

Bakı:

21 °C

74 %

5 m/s

AZ RU EN

Ana səhifə / Siyasət / Əli Əhmədov: "Siyasi partiyalar haqqında" Qanuna edilən dəyişikliklər Azərbaycanda siyasi islahatların tərkib hissəsi kimi qiymətləndirilməlidir

Əli Əhmədov: "Siyasi partiyalar haqqında" Qanuna edilən dəyişikliklər Azərbaycanda siyasi islahatların tərkib hissəsi kimi qiymətləndirilməlidir

23.04.2012 [10:58]

“Siyasi partiyalar haqqında” Qanuna edilən dəyişikliklər Azərbaycanda siyasi islahatların tərkib hissəsi kimi qiymətləndirilməlidir. İnanıram ki, bu dəyişikliklər Azərbaycanın siyasi sisteminin daha da təkmilləşdirilməsinə, siyasi sistemdə partiyaların rolunun artırılmasına əhəmiyyətli təsir göstərəcək. Beləliklə də, siyasi partiyalar daha sivil, səmərəli və ictimai dəstəyi qazanmaq imkanı yaradan formada fəaliyyət göstərə biləcək”. Bu fikirləri Milli Məclisin dünən keçirilən iclasında Yeni Azərbaycan Partiyasının (YAP) Sədr müavini-İcra katibi, millət vəkili Əli Əhmədov “Siyasi partiyalar haqqında” Qanuna təklif olunan dəyişikliklərin müzakirəsi zamanı çıxış edərkən deyib.
Əli Əhmədov bildirib ki, dəyişikliklərin digər bir mühüm əhəmiyyəti partiyaların dövlət tərəfindən maliyyə dəstəyi alması ilə əlaqədardır. Onun fikrincə, həm siyasi islahatların davam etdirilməsi, həm də siyasi partiyaların cəmiyyətdəki rolunun artırılması baxımından dövlət tərəfindən partiyalara maliyyə dəstəyinin göstərilməsi əhəmiyyət kəsb edir. Amma bu zaman çox vacib məqam ortaya çıxır ki, bu dəstək hansı meyarlar əsasında reallaşmalıdır. Millət vəkili deyib ki, dünya təcrübəsində maliyyələşmədə ictimai etimad prinsipi əsas götürülür.
“Mən qəbul edə bilmərəm ki, partiyaların dövlət tərəfindən maliyyələşməsinə ünvanlı sosial yardım kimi yanaşılsın. Yəni, hamıya ehtiyacına uyğun şəkildə dövlət maliyyə yardımı ayıraraq paylamamalıdır. Əks halda, partiyalara dövlət yardımının mahiyyətini kökündən təhrif etmiş olarıq. Bu prosesdə parlamentdə partiya təmsilçiliyinə görə bölgü aparılmalıdır. Layihədə də məsələ müəyyən qədər öz əksini tapıb. YAP Azərbaycan parlamentində təmsil olunan bütün siyasi partiya nümayəndələrinin 84,5 faizini təşkil edir. Parlamentdə 71 millət vəkili Yeni Azərbaycan Partiyasına, 13 deputat digər partiyalara mənsubdurlar. Təklif edilən prinsiplə ümumilikdə maliyyə yardımının 44,6 faizi Yeni Azərbaycan Partiyasına, 54,4 faizi digər partiyaların payına düşür. Hesab edirəm ki, bu prinsip ədalətli deyil. Amma mən hörmətli Prezidentimiz tərəfindən parlamentə göndərilmiş bu layihənin məqsədini də başa düşürəm. Bu da ondan ibarətdir ki, burada kompromis variant ortaya qoyulur ki, Milli Məclisdə təmsil olunan və bəzi hallarda təmsil olunmayan partiyaların maliyyə cəhətdən dəstəklənməsində dövlət daha yaxından iştirak etsin. Təbii ki, bu dəstək YAP-a veriləcək dəstəyin hesabına reallaşacaq. Yəni, YAP-a düşəcək payın hesabına digər partiyalara dövlətimiz tərəfindən dəstək verilmiş olur. Biz YAP olaraq prinsip etibarilə buna etiraz etmirik, güzəştli bir variant kimi qəbul edirik. Opponentlərimiz də bunu belə qəbul etməlidirlər” - deyə, YAP Sədrinin müavini vurğulayıb.
Əli Əhmədov onu da qeyd edib ki, 3 faizlik baryeri aşıb, amma parlamentdə təmsil olunmayan partiyalara 10 faiz maliyyə verilməsi düzgün deyil. “Parlamentdə nümayəndəsi təmsil olunan bir partiya 3-7 faiz alırsa, amma bunun müqabilində 3 faizdən çox səs toplayıb parlamentə düşməyən partiyaya 10 faiz maliyyə ayrılması ədalətsizdir” - deyə, millət vəkili qeyd edib.

Paylaş:

Baxılıb: 959 dəfə