Çin-Azərbaycan münasibətləri: sabit inkişaf, siyasi qarşılıqlı etimad...

Bakı:

23 °C

51 %

4 m/s

Əlaqə

AZ RU EN

Ana səhifə / Siyasət / Çin-Azərbaycan münasibətləri: sabit inkişaf, siyasi qarşılıqlı etimad...

Çin-Azərbaycan münasibətləri: sabit inkişaf, siyasi qarşılıqlı etimad...

23.12.2023 [10:10]

Çin Xalq Respublikasının Sədri Si Cinpin Prezident İlham Əliyevə təbrik məktubu ünvanlayıb

Regionun aparıcı iqtisadi-siyasi aktoru olan Azərbaycan dünyanın bütün ölkələri ilə yaxın ikitərəfli əlaqələrin inkişafında maraqlıdır. Bu mənada, yürüdülən çoxvektorlu və praqmatik xarici siyasət kursu qarşılıqlı maraqlar çərçivəsində əməkdaşlıqların inkişafını və müstəvisini daha da genişləndirir. Ölkəmizin xarici siyasət strategiyasının əsas istiqamətlərini həm də dünya dövlətləri ilə səmərəli əlaqələr və əməkdaşlıq platformaları reallaşdırmaq, mühüm iqtisadi inteqrasiya prosesinin dinamizmini təmin etmək, beynəlxalq münasibətlər sisteminin nüfuzlu milli dövlətlər ilə qarşılıqlı-faydalı münasibətləri davam etdirmək kimi amillər təşkil edir. Bu mənada, Azərbaycan ilə Çin arasındakı əlaqlər xüsusi əhəmiyyət daşıyır. Qeyd edək ki, dünyanın mühüm iqtisadi güc mərkəzi statusuna malik Çin də Azərbaycanla münasibətlərin dostluq və qarşılıqlı maraqlar müstəvisində inkişafının tərəfdarı qismində çıxış edir.

Əməkdaşlıq müvəffəqiyyətlə irəliləyir

Təsadüfi deyil ki, Çin Xalq Respublikasının Sədri Si Cinpin Azərbaycan Respublikasının Prezidenti İlham Əliyevə ünvanladığı təbrik məktubunda da Çin ilə Azərbaycan arasında ənənəvi dostluq və tərəfdaşlığın olması vurğulanır. Doğum günü münasibətilə Prezident İlham Əliyevə səmimi təbriklərini və ən xoş arzularını ünvanlayan ÇXR lideri Çin-Azərbaycan münasibətlərinin çox yaxşı və sabit inkişafa malik olduğunu diqqətə çatdırıb: “Çin və Azərbaycan ənənəvi dost tərəfdaşlardır. Hazırda Çin-Azərbaycan münasibətləri çox yaxşı və sabit inkişaf edir, siyasi qarşılıqlı etimad daim möhkəmlənir, müxtəlif sahələrdə əməkdaşlıq müvəffəqiyyətlə irəliləyir. Sizin ikitərəfli münasibətlərin möhkəmləndirilməsi üzrə səylərinizi yüksək qiymətləndirirəm”.

Vurğulamaq lazımdır ki, Azərbaycanın 2020-ci il Vətən müharibəsində əldə etdiyi qələbə Cənubi Qafqazda sülhün və sabitliyin formalaşmasına zəmin yaradıb. Bu mənada, regionun geocoğrafi imkanlara bütün dünya üçün mühüm cəlbediciliyini artırmaqdadır. Azərbaycanın Şərq-Qərb tranzitinin yeni dinamizm qazanması, əlaqələrin intensivliyinin təşkili, müasir logistik imkanlardan istifadə etməklə əlaqələrin şaxələndirilməsinin təşkili istiqamətində atdığı addımlar bütövlükdə, təqdir edilir. Bütün bu üstünlüklər və yeni strateji imkanlar Azərbaycan ilə Çin arasındakı əlaqələrdəki dinamizmin artmasına da müsbət təsirini göstərir. Öz növbəsində, Çin də Cənubi Qafqazın ən güclü aktoru olan, regional və beynəlxalq təhlükəsizliyə mühüm töhfələr verən Azərbaycanla əməkdaşlığa xüsusi əhəmiyyət verir. ÇXR liderinin məktubunda bu məqam xüsusi olaraq vurğulanır. Qeyd edildiyi kimi, tərəflər arasındakı əlaqələr çoxşaxəlidir və siyasi, iqtisadi münasibətlər, o cümlədən təhlükəsizlik nöqteyi-nəzərindən mühüm əhəmiyyət kəsb edir. İqtisadi əlaqələrdən bəhs edərkən ilk növbədə vurğulamaq gərəkdir ki, iqtisadiyyatın bütün sahələrində uğurlu inkişaf edən əməkdaşlıq münasibətləri bütün dövrlərdə ticari əlaqələrin perspektivi üçün mühüm strateji baza formalaşdırır. Ümumilikdə, mövcud olan mühüm siyasi-iqtisadi əməkdaşlıq əlaqələri regionlararası əməkdaşlıq və inteqrasiyanın sürətləndirilməsində önəmli rol oynayır.

Münasibətləri yeni səviyyəyə yüksəltmək üçün...

Çin lideri Si Cinpin Prezident İlham Əliyevə ünvanladığı təbrik məktubunda ötən ilin sentyabrında Səmərqənddə baş tutmuş görüşü də xatırladıb: “Ötən ilin sentyabrında biz Səmərqənd şəhərində yeni dövrdə ikitərəfli münasibətlərin inkişafına dair mühüm razılaşmaların əldə olunduğu uğurlu görüş keçirdik. Mən Çin ilə Azərbaycan arasında münasibətlərin inkişafına böyük əhəmiyyət verirəm, ölkələrimizin və xalqlarımızın rifahı naminə ikitərəfli dostluq və əməkdaşlıq münasibətlərini yeni səviyyəyə yüksəltmək üçün Sizinlə birgə səylərimi davam etdirməyə hazıram”.

Xatırladaq ki, 2022-ci ilin sentyabrın 15-də Səmərqənddə Azərbaycan Respublikasının Prezidenti İlham Əliyevin Çin Xalq Respublikasının Sədri Si Cinpin ilə görüşü olub. Görüşdə Sədr Si Cinpin Azərbaycan ilə Çin arasında diplomatik münasibətlərin qurulmasının, həmçinin Yeni Azərbaycan Partiyasının yaradılmasının otuz illiyi münasibətilə Prezident İlham Əliyevə təbriklərini çatdırıb. Çin lideri bildirib ki, Azərbaycan ilə Çin arasında əlaqələr strateji tərəfdaşlıq xarakteri daşıyır və yüksək səviyyədə inkişaf edir. “Sizin Azərbaycan ilə Çin arasında əlaqələrin inkişafına mühüm əhəmiyyət verməyinizi çox yüksək qiymətləndiririk. Biz əlaqələrimizin strateji səviyyədə hərtərəfli inkişafını dəstəkləyirik”, - deyə Si Cinpin qeyd edib. Prezident İlham Əliyev Azərbaycan ilə Çin arasındakı münasibətlərin strateji tərəfdaşlıq xarakteri daşıdığını, ölkələrimizin bir çox sahələrdə uğurla əməkdaşlıq etdiyini diqqətə çatdırıb.

Nəticə etibarilə, çoxtərəfli, bərabərsəviyyəli əməkdaşlıq əlaqələrinə malik olan Çin-Azərbaycan münasibətləri hər iki tərəfin milli maraqlarına xidmət etməklə yanaşı, müasir geostrateji reallıqların fonunda Cənubi Qafqaz bölgəsinin, Avrasiyanın və bütövlükdə, dünyanın hərbi-siyasi, iqtisadi, ekoloji, demoqrafik və enerji təhlükəsizliyinin təmin olunmasına strateji töhfələr verir. Ən əsası isə bu əməkdaşlıq əlaqələri parlaq geostrateji perspektivə malikdir və Çin liderinin də vurğuladığı kimi, hər iki ölkənin siyasi, iqtisadi potensialı əməkdaşlıq səylərini davam etdirməyə zəmin yaradır.

Pərviz SADAYOĞLU

Paylaş:

Baxılıb: 674 dəfə