Təkidlə tələb olunur!

Bakı:

20 °C

77 %

0 m/s

Əlaqə

AZ RU EN

Ana səhifə / Siyasət / Təkidlə tələb olunur!

Təkidlə tələb olunur!

01.09.2023 [10:10]

Xəbər verildiyi kimi, avqustun 31-də Fransanın Azərbaycandakı səfiri Ann Buayon Azərbaycanın Xarici İşlər Nazirliyinə (XİN) çağırılıb. Nazirliyin Mətbuat xidməti idarəsindən bildirilib ki, görüş zamanı Paris şəhərinin meri Ann İdalqo daxil olmaqla Fransanın bir neçə şəhərinin rəhbər şəxslərinin müşayiəti ilə “humanitar yük” adı altında “Laçın” dövlət sərhədindən buraxılış məntəqəsi istiqamətinə nəqliyyat vasitələrinin göndərilməsi və həmin şəxslər tərəfindən Azərbaycana qarşı təxribatçı bəyanatlar səsləndirilməsi ilə bağlı XİN-in etiraz notası Fransa səfirinə təqdim edilib.

Fransadan təhrikçi və utancverici addımlar

Məğlub Ermənistan postmüharibə mərhələsində revanşizm iddialarından çıxış edir və sülh prosesini əngəlləməkdən ötrü müxtəlif manipulyativ əməllərə əl atır. Bu ölkənin baş naziri Nikol Paşinyan vasitəçilərin iştirakı ilə müxtəlif məkanlarda baş tutan yüksəksəviyyəli görüşlərdə Azərbaycanın ərazi bütövlüyünü tanıdığını bəyan etsə də, ölkəmizin Laçın-Xankəndi yolunun üzərində suveren hüquqlarından istifadə etməklə nəzarət-keçid məntəqəsi qurmasına etiraz edir. Ermənistan rəhbərliyi və separatçılar ona nail olmaq istəyirlər ki, bu ölkədən Xankəndinə - Azərbaycan ərazisinə keçid hansısa bir yoxlama, nəzarət həyata keçirilmədən təmin edilsin. Azərbaycan müstəqil dövlətdir və onun sərhədləri də beynəlxalq səviyyədə təsbit olunan prinsiplərə uyğun olaraq qorunmalıdır. Sərhəddə, öz ərazisində bəhs olunan məntəqəni qurmaqla ölkəmiz də məhz bunu edir. Lazımdır ki, hər kəs, o cümlədən də Ermənistan respublikamızın suveren hüquqlarına hörmətlə yanaşsın.

Bəs 44 günlük müharibədə acınacaqlı məğlubiyyət acısı yaşadığına görə onun üçün kapitulyasiya aktı sayılan üçtərəfli Bəyanatı imzalayan və üzərinə öhdəliklər götürən Ermənistanı postmüharibə dövründə, xüsusilə də son vaxtlarda sülhyaratma prosesini daha açıq-aydın pozmağa cəsarətləndirən hansı qüvvələrdir? Hər kəsə bəllidir ki, Ermənistan öz mövqeyi olmayan bir dövlətdir. Bu ölkənin siyasi hakimiyyəti fəaliyyət istiqamətlərini, o cümlədən də sülhyaratma prosesində sərgilədiyi destruktiv mövqeyi məhz ayrı-ayrı mərkəzlərdən aldığı direktivlər əsasında müəyyənləşdirir. Bu dövlətə, onun lideri Nikol Paşinyana “otur-dur” deyən qüvvələr ölkə hüdudlarından kənardadırlar. Ermənistan xaricdəki havadarlarına arxalanmaqla tez-tez təxribatlara əl atır.

Məğlub Ermənistanı revanşizmə, pozuculuq əməllərinə ruhlandıran xarici havadarları sırasında Fransa xüsusi canfəşanlığı ilə fərqlənir. Fransanın prezidenti Emmanuel Makron və bir sıra digər yüksəksəviyyəli rəsmiləri erməni lobbisinin girovluğunda qalıblar, desək, əsl həqiqəti ifadə etmiş olarıq. E.Makron dəfələrlə Ermənistanın yanında olduğunu, bu ölkəni daim dəstəkləyəcəyini dilə gətirib. Elə bu günlərdə o, eləcə də Fransanın Avropa və xarici işlər naziri Katrin Kolona səfirlər konfransında reallıqdan uzaq, sülhyaratma prosesinə xələl gətirməyə hesablanan absurd fikirlər səsləndiriblər. Fransa prezidentinin növbəti dəfə bölgədə humanitar vəziyyət barədə iddiaları əsas götürərək fikirlər səsləndirməsi bu ölkənin siyasətinin yanlış olduğunu bir daha sübut edir. Ermənistan 30 ilə yaxın müddətdə Azərbaycan torpaqlarının 20 faizini işğal altında saxlayıb və burada ağlasığmaz dağıntılar, vandalizm əməlləri törədib. Azərbaycanlılara qarşı etnik təmizləmə siyasəti, soyqırımı və kütləvi qırğınlar həyata keçirilib, bir milyona yaxın soydaşımız qaçqın və məcburi köçkünə çevrilib, onların hüquqları ən kobud şəkildə tapdalanıb. 44 günlük müharibədən sonra da Ermənistan hərbi-siyasi təxribatlara son qoymur. Bu ölkə Azərbaycan ərazilərindən silahlı qüvvələrinin tam çıxarılması öhdəliyinə əməl etməyib. Bütün bu kimi faktlara göz yuman Fransanın siyasi rəhbərliyinin “humanitar böhran” xoruna qoşulması qeyri-əxlaqi yanaşmanın təcəssümüdür. Emmanuel Makrondan, Katrin Kolondan sonra sözün əsl mənasında ağlaşma quran bu xorda Paris merinin də yer alması və “Laçın” sərhəd-keçid məntəqəsi yaxınlığında ona aid olmayan məsələlərdən danışması, erməni lobbisinin xoşuna gəlmək üçün hansısa vədlər verməsi Fransa cəmiyyətində deqradasiya prosesinin geniş vüsət aldığını göstərir. Açıq-aydın görünür ki, bu ölkənin rəsmiləri gələcəkdə də vəzifədə qalmalarını təmin etməkdən ötrü Avropa maraqlarını lobbi maraqlarına qurban verirlər.

Azərbaycanın prinsipial mövqeyi

Azərbaycan ədalətli mövqeyini qətiyyətlə qorumağa qadir olan ölkədir. Buna həm respublikamızın gücü, həm də siyasi iradəsi çatır. Fransa tərəfinin addımları Azərbaycanın daxili işlərinə birbaşa müdaxilə olmaqla yanaşı, ölkəmizin beynəlxalq hüquqla qorunan suverenliyi və ərazi bütövlüyünə qarşı qəsd olduğu vurğulanıb.

Qeyd olunub ki, Ermənistanın yalan və manipulyasiya kampaniyasına alət olan bu təxribatçı əməlləri bölgədə vəziyyətin gərginləşməsinə yönələn və Fransa tərəfindən Ermənistanı revanşist mövqeyini davam etdirməyə həvəsləndirən və son günlər daha da intensivləşən addımların növbəti nümunəsidir.

Azərbaycan tərəfi, beynəlxalq humanitar yardımın göndərilməsi ilə bağlı beynəlxalq hüquqi çərçivəyə zidd olaraq nümayişkaranə şəkildə Azərbaycan tərəfi ilə razılaşdırmadan, onun iradəsinin əksinə Azərbaycanın beynəlxalq tanınmış ərazisinə hər hansı bir ad altında yüklərin göndərilməsi cəhdini təxribatçı əməl kimi qiymətləndirib və buna qəti etiraz qarşı tərəfin diqqətinə çatdırılıb.

Azərbaycanın beynəlxalq hüquqla qorunan suverenliyi və ərazi bütövlüyünə qarşı yönələn, regionda beynəlxalq aktorların fəal səyləri ilə irəlilədilən kövrək normallaşma prosesini təhlükə altına alan addımlara son qoyulması Fransa tərəfindən təkidlə tələb olunub.

M.ABDULLAYEV

Paylaş:

Baxılıb: 640 dəfə