Araik Arutyunyan İrəvana çağırılır

Bakı:

21 °C

60 %

7 m/s

Əlaqə

AZ RU EN

Ana səhifə / Siyasət / Araik Arutyunyan İrəvana çağırılır

Araik Arutyunyan İrəvana çağırılır

22.06.2023 [11:00]

Qarabağ separatçılarının başçısı necə gedəcək, necə gələcək...

Nardar BAYRAMLI

Ermənistanda daxili siyasi vəziyyət gərgin olaraq qalır. İkinci Qarabağ müharibəsində məğlubiyyətə görə, erməni siyasi dairələri bir-birilərini ittiham edirlər. Hazırda isə Ermənistan parlamentində müharibədə məğlubiyyətin səbəblərini araşdıran istintaq komissiyası müəyyən şəxslərin dindirilməsini davam etdirir. Artıq iyunun 20-də komissiyada baş nazir Nikol Paşinyan dindirilib.

Ermənistan parlamentinin müdafiə və təhlükəsizlik üzrə daimi komissiyasının rəhbəri, istintaq komissiyasının sədri Andranik Köçəryan deyib ki, Ermənistan silahlı qüvvələrinin baş qərargahının keçmiş rəisi Onik Qasparyan 44 günlük müharibənin araşdırılması məqsədilə parlamentin istintaq komissiyasına dəvət edilə bilər: “Biz eyni adamları ikinci və ya üçüncü dəfə də çağıra bilərik. Məsələn, biz ikinci dəfə Arşak Karapetyanı dəvət etdik. Onik Qasparyanın komissiyada səsləndirdiyi sözlər Nikol Paşinyanın bəyanatı ilə ziddiyyət təşkil etmir”. Diqqət çəkən məqamlardan biri odur ki, Andranik Köçəryan istintaq komissiyasına Qarabağ separatçılarının başçısı Araik Arutyunyanın da çağırılacağını bildirib.

Məlumdur ki, aprel ayından etibarən Azərbaycan Laçında sərhəd-buraxılış məntəqəsi yaradıb. Qarabağdan Ermənistana və əks istiqamətə gediş-gəliş sərhədçilərimiz tərəfindən yoxlanılır. Belə olan halda, A.Arutyunyan Ermənistana necə gedə və qayıda bilər? Nəzərə alaq ki, Qarabağdakı erməni separatçılarının başçısı beynəlxalq axtarışa verilib. Üstəlik, bütün separatçıların başı dərddədir. Buna nümunə kimi separatçı rejimin keçmiş “dövlət naziri”, erməni milyarder Ruben Vardanyanın da Ukrayna tərəfindən beynəlxalq axtarışa verilməsini göstərmək olar. Vardanyanın adı bu ölkənin hüquq-mühafizə orqanları tərəfindən “dərhal saxlanılaraq Ukrayna və NATO ölkələrinin hüquq-mühafizə orqanlarına təhvil verilməli” şəxs kimi qeyd edilib. Bu barədə yayılan xəbərlərdə erməni iş adamının Ukraynanın milli təhlükəsizliyinə, sülhə, insan təhlükəsizliyinə və beynəlxalq düzənə qarşı fəaliyyət göstərdiyi, habelə digər qanun pozuntuları törətdiyi qeyd olunub.

Bununla yanaşı, Vardanyanın ən yaxın adamları Xankəndidən qaçmağa başlayıblar. Belə ki, Ermənistanda nəşr olunan “Joqovurd” qəzetinin yaydığı məlumata görə, Ruben Vardanyanın müşaviri Arman Hakobcanyan bugünlərdə Qarabağı tərk edib. Qəzet bununla bağlı Hakobcanyanın özü ilə də əlaqə saxlayıb. Sözügedən şəxs faktı təsdiqləyib. Lakin o, Qarabağdan necə və kimlərin köməyi ilə qaçdığı barədə danışmayıb. Qəzet yazır ki, Hakobcanyanın Qarabağdan Rusiya sülhməramlılarının maşınları vasitəsilə çıxarılması şübhə doğurmur.

Bütün bunların fonunda Arayik Arutyunyanın İrəvana istintaq komissiyasının iclasına gedəcəyi nə dərəcədə realdır? Mövzu ilə bağlı qəzetimizə açıqlama verən politoloq Tural İsmayılov bildirib ki, Ermənistanda guya hansısa komissiyalar yaradılaraq əhalinin gözünə kül üfürülür. Hamı bilir ki, uzun illər Azərbayanın sülhlə bağlı çağırışları nəticəsiz qaldı. Nikol Paşinyan üçün əslində tarixi bir şərait yetişmişdi. O, bütün imkanlardan istifadə edərək özündən əvvəlki Sarkisyan və Koçaryan xuntasının səhvlərini düzəldə bilərdi. Amma biz gördük ki, Paşinyanın hakimiyyət dövründə daha çox aqressiv yanaşmalar müşahidə edilir.

Politoloqun fikrincə, bu gün 2020-ci il hadisələrini araşdıran komissiyaların heç bir hüquqi və siyasi əhəmiyyəti yoxdur: “Araik Arutyunyanın “dindirlməsi” də erməni xalqını aldatmaq prosesinin davamı sayıla bilər. Ola bilsin ki, onu hansısa onlayn “dindirməyə”, yaxud virtual açıqlamalara sövq etsinlər. Həmçinin sülhməramlıların hansısa maşınlarında dağ-dərə ilə onu daşıya bilərlər. Lakin bu gün Azərbaycan ordusunun, sərhədçisinin gözündən heç nə qaça bilməz. Araikin Xankəndidən çıxarılması böyük “risk” kimi dəyərləndirilə bilər. Paşinyanın belə bir məqamda Araikdən “imtina”sı real görünmür”.

Paylaş:

Baxılıb: 646 dəfə