Pentaqon: Azərbaycan regionda ABŞ-ın mühüm tərəfdaşıdır

Bakı:

26 °C

65 %

7 m/s

Əlaqə

AZ RU EN

Ana səhifə / Siyasət / Pentaqon: Azərbaycan regionda ABŞ-ın mühüm tərəfdaşıdır

Pentaqon: Azərbaycan regionda ABŞ-ın mühüm tərəfdaşıdır

30.11.2022 [10:33]

Ölkələr arasında ikitərəfli əlaqələr müzakirə edilib

Azərbaycan dövləti hər zaman dünyanın bütün ölkələri və beynəlxalq təşkilatları ilə yüksək səviyyəli münasibətlərin qurulması istiqamətində mühüm addımlar atır. Təcavüzkar Ermənistan istisna olmaqla dünyanın bütün ölkələri ilə normal iqtisadi-siyasi münasibətlərə malik Azərbaycan aparıcı dövlətlərlə də yaxın tərəfdaşlıq əlaqələri qurulması istiqamətində əsaslı irəliləyişlərə nail olub. Bu mənada, Azərbaycanın Amerika Birləşmiş Ştatları ilə də bir sıra sahələr üzrə mühüm tərəfdaşlıq əlaqələri mövcuddur.

Pentaqonda Azərbaycan və ABŞ arasında hərbi əməkdaşlığın perspektivləri müzakirə olunub. Amerika Birləşmiş Ştatlarında səfərdə olan müdafiə nazirinin birinci müavini - Azərbaycan Ordusunun Baş Qərargah rəisi general-polkovnik Kərim Vəliyev ABŞ-ın Birləşmiş Qərargahlar Rəisləri Komitəsi rəisinin birinci müavini admiral Kristofer Qreydi ilə görüşüb. Görüşdə regional təhlükəsizlik məsələləri ilə bağlı fikir mübadiləsi aparılıb. Görüşlə bağlı ABŞ Müdafiə Nazirliyinin (Pentaqon) məlumatında bildirilib ki, Azərbaycan regionda ABŞ-ın mühüm tərəfdaşıdır. Qeyd olunub ki, tərəflər görüşdə regional təhlükəsizlik məsələləri ilə yanaşı, ikitərəfli əlaqələri və onun inkişafı perspektivlərini də müzakirə ediblər.

Beynəlxalq terrorizmə qarşı mübarizədə yaxın əməkdaşlıq...

Qeyd edilməlidir ki, ABŞ ilə Azərbaycan arasında beynəlxalq terrorizmə qarşı mübarizə sahəsində yaxın əməkdaşlıq mövcuddur. Azərbaycan bu ölkənin terrora qarşı apardığı mübarizədə yaxından iştirak edir. Eyni zamanda, respublikamız NATO ilə də sıx əlaqələrə malikdir. Bu səbəbdən, Azərbaycan ABŞ üçün çox vacib regional tərəfdaş hesab edilir. Qarşılıqlı etimad və maraqlar əsasında qurulan Azərbaycan-ABŞ əlaqələri hər iki tərəfin mənafeyinə cavab verməklə yanaşı, beynəlxalq sülh və təhlükəsizliyin təmin olunmasına da töhfədir. Dünyada gedən bir sıra siyasi proseslər, müxtəlif ölkələr daxilində yaranan gərginlik, beynəlxalq cinayətkar qruplaşmaların, terrorçu təşkilatların fəaliyyətini genişləndirməsi hər iki dövlətin təhlükəsizlik sahəsində ikitərəfli və çoxtərəfli əməkdaşlığının əhəmiyyətini dəfələrlə artırıb. Bu vaxtadək Azərbaycan Silahlı Qüvvələrinin bölmələri Kosovada, İraqda, Əfqanıstanda gerçəkləşdirilən sülhyaratma əməliyyatlarında uğurla iştirak edərək bu mübarizəyə öz töhfələrini verib. Birləşmiş Ştatlarla ikitərəfli əlaqələr və NATO ilə tərəfdaşlıq çərçivəsində görülən işlər ABŞ rəhbərliyi tərəfindən hər zaman müsbət qarşılanıb. ABŞ prezidentləri və digər rəsmi şəxslər Azərbaycanın bu ölkənin Cənubi Qafqazdakı mühüm tərəfdaşı olduğunu dəfələrlə vurğulayıblar.

Azərbaycan - ABŞ münasibətlərinin mühüm istiqamətlərindən birini isə hərbi-siyasi və təhlükəsizlik sahəsində əməkdaşlıq təşkil edir. Buraya Təhdidlərin Birgə Azaldılması proqramı və ABŞ-ın İxraca Nəzarət və Sərhəd Təhlükəsizliyi proqramı, NATO çərçivəsində, eləcə də, beynəlxalq terrorizmə qarşı mübarizədə birgə səylər, Azərbaycan sərhədlərinin, xüsusən də, dəniz sərhədlərinin möhkəmləndirilməsi, ABŞ-ın Avropada raketlərdən müdafiə sistemi və Avropada Adi Silahlı Qüvvələr Müqaviləsi sahəsində əməkdaşlıq və digər məsələlər daxildir.

Baş Qərargah rəisinin ABŞ-a səfəri yaddaqalan ola bilər

Bu səfərlə bağlı “Yeni Azərbaycan”a danışan politoloq İlqar Vəlizadə bildirib ki, bu səfər olduqca mühüm əhəmiyyət kəsb edir. Onun fikrincə, bu səfər regional məsələlərin müzakirəsi üçün əsaslı zəmin formalaşdırır: “Son zamanlar Ermənistanın hərbi nümayəndələri, o cümlədən müdafiə naziri, təhlükəsizlik şurasının katibi ABŞ-a səfərlər ediblər, danışıqlar aparıblar. Azərbaycanın Baş Qərargah rəisinin ABŞ-a səfəri isə daha yaddaqalan ola bilər. Hazırda regional dinamika olduqca yüksəkdir. Eyni zamanda, İranda vəziyyət gərgin olaraq qalır. İran - Azərbaycan münasibətləri son vaxtlar daha da kəskinləşib və bu amil də Azərbaycanın təhlükəsizliyi ilə bağlı təhdidlər yaradır. Qeyd etməliyəm ki, Baş Qərargah rəisinin bu səfəri həmin təhdidləri müzakirə etmək, regionda təhlükəsizliyin qorunub saxlanılması prizmasından da aktualdır və vacibdir. ABŞ-ın regionda böyük maraqlarının olması şübhəsizdir. Rəsmi Vaşinqton bu maraqların İranın hərəkətləri ucbatından sual altına alınması ilə razılaşa bilməz”.

P.İSMAYILOV

Paylaş:

Baxılıb: 560 dəfə