7-ci paketdə nələr var?

Bakı:

24 °C

64 %

12 m/s

Əlaqə

AZ RU EN

Ana səhifə / Siyasət / 7-ci paketdə nələr var?

7-ci paketdə nələr var?

22.07.2022 [10:24]

Nicat PAŞA

Rusiya-Ukrayna müharibəsi səbəbindən Rusiyaya qarşı tətbiq edilən sanksiyaların əhatə dairəsi genişləndirilir. Dünən Aİ ölkələrinin daimi nümayəndələri Rusiyaya qarşı yeddinci sanksiyalar paketini təsdiqləyiblər. Məhdudiyyətlərə yeni ixrac nəzarəti və “Sberbank”ın aktivlərinin dondurulması, eyni zamanda, Rusiya qızılına embarqo qoyulması daxildir. Tətbiq ediləcək yeni sanksiyalar paketi ilə 50-yə yaxın fiziki və hüquqi şəxs sanksiyalara məruz qalacaq. Bununla bağlı Litvanın Aİ-dəki daimi nümayəndəsi Arnoldas Prankeviçius məlumat verib.

“Biz indicə Rusiyaya qarşı qızıl qadağası, yeni ixraca nəzarət tədbirləri, “Sberbank”ın aktivlərinin dondurulması, siyasətçilər, hərbi liderlər, oliqarxlar da daxil olmaqla 50-dən çox yeni fiziki və hüquqi şəxsə qarşı sanksiyaları əhatə edən yeni sanksiyalar paketini təsdiq etdik”, - deyə Arnoldas Prankeviçius bildirib.

Çexiya sədrliyinin məlumatına görə, yeni sanksiyaların təsdiq edilməsi proseduru iyulun 21-də, Moskva vaxtı ilə saat 11:00-da başa çatacaq. Prosedura əsasən, sanksiyaların yeni paketi barədə yazı Aİ-nin rəsmi jurnalında dərc olunacağı gün qadağalar qüvvəyə minəcək. Bəyanatda Rusiya mənşəli qızılın idxalına qoyulan qadağanın zərgərlik məmulatlarına da təsir edəcəyi qeyd olunur.

Bir sıra ölkələrdə, xüsusən də Litva və Estoniyada yeni sanksiyalar paketində Rusiya qazına da embarqonun daxil edilməsini istəyiblər. Lakin sonda Aİ bu qadağanı tətbiq etməmək qərarına gəlib. Çexiyanın Baş naziri Petr Fiala məsələ ilə bağlı açıqlamasında bildirib ki, tətbiq edilən qadağalar daha çox Rusiyaya təsir etmək məqsədi daşıyır. Onun sözlərinə görə, Aİ-yə üzv dövlətlər bu qədər qısa müddətdə məsələ ilə bağlı razılığa gələ bilməyiblər: “Sanksiyalar Rusiyaya həmin qadağaları təqdim edənlərdən daha çox təsir etməlidir”, - deyə P.Fiala izah edib.

Məlum olduğu kimi, ABŞ-dan və Avropa dövlətlərindən Rusiyaya qarşı tətbiq olunan sanksiyalar əsasən bu ölkə üçün strateji önəm daşıyan sahələri əhatə edir. Buna nümunə olaraq Rusiyadan neft və neft məhsullarının idxalına tətbiq edilən qadağanı misal çəkmək olar. Belə ki, sözügedən qadağa şimal qonşumuzun milyardlarla dollar həcmində gəlirlərdən məhrum edilməsi məqsədi daşıyır. Qızıl ixracı da Rusiya üçün strateji sahə və mühüm gəlir mənbəyidir.

Mütəxəssislərin verdiyi məlumatlarda bildirilir ki, Rusiya dünya üzrə ən çox qızıl ehtiyatlarına malik olan ölkələrin top onluğunda beşinci yerdə qərarlaşıb. ABŞ-ın başçılıq etdiyi siyahıda Rusiya öz mövqeyini son 10 ildə yaxşılaşdırmağa nail olub. Bu ölkə 1993-cü ildə 267,2, 2003-cü ildə 387,6 ton qızıl ehtiyatına malik idi. Hazırda isə bu rəqəm təxminən 2292,31 tona yüksəlib. Rəqəmlərdən də göründüyü kimi, artım dinamikası kifayət qədər yüksəkdir. Rusiyaya üstünlüklər qazandıran həm də bu ölkənin qızıl ehtiyatlarını əsasən daxili istehsal hesabına artırması amilidir. Onilliklər ərzində burada böyük dövriyyəsi olan qızıl hasilatı sənayesi formalaşıb. Belə bir reallıq fonunda ABŞ-ın Rusiyadan qızıl idxalına qadağalar tətbiq etməsi şimal qonşumuzu çox ciddi çətinliklərlə üz-üzə qoya bilər.

Paylaş:

Baxılıb: 1135 dəfə