Siyasi təzyiqlərə start verildi

Bakı:

22 °C

54 %

0 m/s

Əlaqə

AZ RU EN

Ana səhifə / Siyasət / Siyasi təzyiqlərə start verildi

Siyasi təzyiqlərə start verildi

18.03.2022 [10:28]

Qərb Rusiya ətrafında çəmbəri daraldır

PƏRVİZ

Rusiya rəsmi şəkildə Avropa Şurasından çıxarıldı. Ölkənin üçrəngli bayrağı Avropa Şurasının bayraqlar xiyabanından endirilib. 26 il Avropa Şurasının üzvü olmuş Rusiya Ukrayna ilə müharibə başlayandan sonra qurumdan və Avropa İnsan Haqları Konvensiyasında fəaliyyətini dondurmağını bəyan etmişdisə də, qurum artıq rəsmi şəkildə rəsmi Moskvanı öz sıralarından xaric edib.

Bu isə Rusiyanın digər beynəlxalq təşkilat və birliklərdən ixracı ilə bağlı məsələni də aktuallaşdırıb. Yeri gəlmişkən, Polşanın xarici işlər naziri Zbiqnev Rau Polşa televiziyasında çıxışı zamanı bildirib ki, Rusiya Federasiyasının G20-də mümkün dəyişdirilməsi ilə bağlı müzakirələr gedir. Buna cavab olaraq Rusiya XİN - in sözcüsü Mariya Zaxarova vurğulayıb ki, indi bu cür bəyanatlara münasibət bildirmək mənasızdır, çünki məsləhət deyil: “Əgər onların iradəsində olsaydı, Yer kürəsində yalnız özləri qalardılar”.

Göründüyü kimi, artıq Qərb Rusiyaya iqtisadi təzyiqlərlə yanaşı, siyasi təzyiqlərlə də təsir göstərmək niyyətindədir. Bu, qarşıdakı müddətdə Rusiyanın BMT və ya digər Avropa təsisatlarından da uzaqlaşdırılmasına zəmin yarada bilərmi?

Məsələ ilə bağlı fikirlərini “Yeni Azərbaycan”a bölüşən politoloq İlqar Vəlizadə bildirib ki, Rusiyanın AŞ-dan çıxarılması daha çox Qərbin Rusiyanı siyasi boykot etməsidir. Bu onu göstərir ki, Qərb artıq Rusiya ilə danışmaq istəyində deyil: “Avropa Şurası bir dialoq platforması idi. Bu platforma çərçivəsində müxtəlif məsələlər müzakirə olunurdu. Burada həm Rusiyanın daxili, həm də xarici siyasəti ilə bağlı addımları haqqında fikir mübadilələri aparılırdı. Bu müzakirələr dialoqa bənzər formada həyata keçirilirdi. Düzdür, bu müzakirələrdə qarşılıqlı ittihamlar da, ziddiyyətli bəyanatlar da yer alırdı. Bütün hallarda bu müzakirə danışıq yolu idi. Demək ki, Qərb artıq dialoqu aparmaq istəmir və ya danışıqdan imtina edir. Bu isə Rusiyanın diplomatik manevr imkanlarını azaldır. Rusiyanın ətrafındakı onsuz da effektsiz olan diplomatik meydança əlindən alınır”.

Rusiyanın G-20-dən uzaqlaşdırılmasına gəldikdə isə, İ.Vəlizadə bunu imkansız sayır. Prosedur imkanları bunu mümkünsüz edir. “Polşa G-20-nin üzvü deyil və bu barədə nəsə deməyə haqqı yoxdur. G-20-də Qərb ölkələri azlıq təşkil edir. Qərb Rusiyanı oradan uzaqlaşdırmaq üçün səsçoxluğu qazana bilməyəcək. Bu baxımdan, polşalı nazirin iddiası əsassızdır və real siyasi addım kimi görünmür”, - deyən politoloq onu da əlavə edib ki, rəsmi Kremlin digər siyasi təsisatlardan - BMT-dən və ya ATƏT-dən çıxarılması da mümkün deyil. Bu qurumların əsasnaməsi də Rusiyanın həmin birliklərdən uzaqlaşdırılmasına imkan vermir: “Bu qərarlar kvorum əsasında verilə bilər. Bunun üçün isə məsələn, ATƏT-ə üzv olan bütün ölkələr Rusiyadan imtina etməlidirlər. Bu isə mümkün deyil. BMT TŞ-dan isə ixrac heç cür mümkün ola bilməz. Çünki bu şura daimi xarakterlidir. Əsasnamədə isə daimi üzv ölkənin üzvlükdən kənarlaşdırma mexanizmi yoxdur”.

Paylaş:

Baxılıb: 674 dəfə