Azərbaycanın şərtləri bəllidir

Bakı:

26 °C

52 %

2 m/s

Əlaqə

AZ RU EN

Ana səhifə / Siyasət / Azərbaycanın şərtləri bəllidir

Azərbaycanın şərtləri bəllidir

03.02.2022 [10:01]

Sülh müqaviləsi beynəlxalq hüquq normalarına, xüsusilə də ərazi bütövlüyü və suverenlik prinsiplərinə əsaslanmalıdır

N.QƏLƏNDƏRLİ

Azərbaycan öz ərazi bütövlüyünü və tarixi ədaləti hərbi-siyasi yolla bərpa edərək regional təhlükəsizliyə və beynəlxalq əməkdaşlığa xidmət edən yeni geostrateji reallıq yaradıb. Artıq Cənubi Qafqazda postmüharibə mərhələsidir və saatlar Bakı vaxtı ilə qurulur. Hazırkı dönəmdə ən aktual mövzulardan biri isə Azərbaycan ilə Ermənistan arasında sülh müqaviləsinin imzalanması məsələsidir. Yeri gəlmişkən, Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “Caspian Policy Center”in təşkil etdiyi “ABŞ-Xəzər Diplomatik Münasibətlərinin 30 ili” adlı vebinarda bu məsələyə toxunaraq deyib ki, hərbi işğal faktı sona çatıb və Azərbaycan güc tətbiq etməklə dövlətlərin beynəlxalq səviyyədə tanınmış sərhədlərinin dəyişdirilməsinə dair yanlış nümunəyə son verib. O vurğulayıb ki, Azərbaycan sülh gündəliyini izləyir və bu, gündəlik qonşu və tərəfdaş ölkələrlə dinc əlaqələrin yaradılması mesajıdır. Prezidentin köməkçisi əlavə edib ki, Ermənistan və Azərbaycan arasında sülh sazişinin imzalanmasına dair danışıqlar beynəlxalq hüquqa uyğun aparılmalıdır. Onun sözlərinə görə, bu saziş beynəlxalq hüququn fundamental norma və prinsiplərinə, xüsusilə də ərazi bütövlüyü və ölkələrin suverenliyi prinsiplərinə əsaslanmalıdır.

İrəvanın yeganə və son şansı

Azərbaycan dövləti sülh müqaviləsinin imzalanması məsələsində qətiyyətli və birmənalı mövqe nümayiş etdirir. Respublikamızın Ermənistan qarşısındakı şərtləri aydındır: İrəvan yeni şəraitdə reallıqlara uyğun davranmalı, ağıllı, konstruktiv mövqe sərgiləməlidir, öz qonşuları ilə normal münasibətlər qurmalı, ərazi iddialarından əl çəkməlidir. Eyni zamanda, Azərbaycanla sərhədlərin müəyyən edilməsi istiqamətində iş aparılmalı, sülh müqaviləsinə hazırlıq işlərinə başlanılmalıdır. Ermənistan siyasi rəhbərliyi yaxşı anlayır və anlamalıdır ki, o, eləcə də ona havadarlıq edən bəzi xarici güc mərkəzləri regional və beynəlxalq proseslərə təsir etmək, yeni geostrateji reallıqları dəyişdirmək iqtidarında deyillər. Ona görə də İrəvan qalib və haqlı Azərbaycanın diktəsi fonunda reallıqlarla tam barışaraq şərtləri qəbul etmək və beynəlxalq hüquq normalarına uyğun davranış sərgiləmək məcburiyyətindədir.

Zaman Ermənistanın əleyhinə işləyir

BMT Nizamnaməsinin 51-ci maddəsində əks olunmuş “sülhə məcburetmə” əməliyyatını 44 gün ərzində uğurla həyata keçirməklə ərazi bütövlüyünün bərpasına nail olan Azərbaycan postmüharibə dönəmində Ermənistana sülh müqaviləsi imzalamaqdan başqa çıxış yolu buraxmayıb. Bu reallıq bir daha təsdiq edir ki, Azərbaycan öz hərbi-siyasi resurslarından və diplomatik imkanlarından istifadə etməklə strateji hədəflərini addım-addım gerçəkləşdirir. Ermənistan hazırkı mərhələdə sülh müqaviləsini imzalamaqdan yayınmağa çalışsa da, birdəfəlik geosiyasi qaçış şansı yoxdur. Yeni gerçəkliklər fonunda regionda təhlükəsizlik və əməkdaşlıq məsələləri ilə əlaqədar şərtləri Azərbaycan diktə edir. Qalib və haqlı Azərbaycanın geostrateji pressinqi qarşısında iqtisadi və siyasi taqətdən düşən Ermənistan sülh müqaviləsinə imza atacaq. Sadəcə, məğlub ölkə və ona havadarlıq edən qüvvələr anlamalıdırlar ki, zaman onların əleyhinə işləyir.

Paylaş:

Baxılıb: 1277 dəfə