Bolqarıstan kanalında Azərbaycanın mədəni irsinin Ermənistan tərəfindən dağıdılması barədə məlumat verilib

Bakı:

27 °C

60 %

9 m/s

AZ RU EN

Ana səhifə / Siyasət / Bolqarıstan kanalında Azərbaycanın mədəni irsinin Ermənistan tərəfindən dağıdılması barədə məlumat verilib

Bolqarıstan kanalında Azərbaycanın mədəni irsinin Ermənistan tərəfindən dağıdılması barədə məlumat verilib

18.11.2020 [09:13]

Noyabrın 17-də Azərbaycanın Bolqarıstandakı səfiri Nərgiz Qurbanova bu ölkənin aparıcı televiziya kanallarından olan “Televiziya Evropa”nın “Svobodna zona” verilişinin aparıcısı, tanınmış telejurnalist Qeorqi Koritarovun canlı efirdə qonağı olub.
AZƏRTAC xəbər verir ki, bir saat davam edən müsahibə zamanı səfir Ermənistanın ölkəmizə qarşı 30 il davam edən hərbi təcavüzü, Qarabağ bölgəsi daxil olmaqla ölkəmizin işğal altındakı bütün ərazilərinə dəymiş ziyan, aparılmış qanunsuz məskunlaşma, Azərbaycan xalqının mədəni irsinin Ermənistan tərəfindən talan olunması barədə məlumat verib.
Noyabrın 10-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan arasında imzalanmış üçtərəfli bəyanata uyğun olaraq Kəlbəcər, Laçın və Ağdam rayonlarının müvafiq cədvələ uyğun olaraq Azərbaycana geri qaytarılmalı olduğunu bildirən səfir münaqişənin tarixi barədə məlumat verib. O, Azərbaycan ərazilərinin Ermənistan tərəfindən işğalı nəticəsində 1 milyondan artıq qaçqın və məcburi köçkünün öz doğma torpaqlarından didərgin düşdüyünü deyib. Diplomat konkret şəkillər göstərməklə 1993-cü ildə Ermənistan tərəfindən Kəlbəcər rayonunun işğalı zamanı azərbaycanlı mülki əhaliyə, sadəcə, 10 saat vaxt verildiyini, onların yaşadıqları evlərdən ayaqyalın getmək məcburiyyətində qaldıqlarını, indi isə Azərbaycan tərəfindən humanizm nümayiş etdirərək Kəlbəcərdə qanunsuz yaşayan şəxslərin bu bölgəni tərk etmələri üçün əlavə 10 gün möhlətin onlara verildiyini diqqətə çatdırıb.
Hazırda Ermənistan tərəfindən işğal olunan ərazilərə və cəbhə zonasından uzaqda yerləşən şəhər və kəndlərə vurulmuş ziyanın hesablandığını bildirən səfir 44 gün ərzində aparılan hərbi əməliyyat zamanı Azərbaycan tərəfindən həlak olmuş mülki əhalinin sayına və mülki infrastruktura dəymiş ziyana diqqət çəkib.
Sentyabrın 27-də Ermənistan silahlı qüvvələrinin atəşkəs rejimini kobud şəkildə pozaraq təmas xətti boyunca Azərbaycanın mövqelərini atəşə tutduğunu bildirən səfir BMT Nizamnaməsinin 51-ci maddəsinə uyğun olaraq Azərbaycanın özünümüdafiə və işğal olunmuş ərazilərini azad etmək hüququna sahib olduğunu vurğulayıb.
Türkiyənin regiondakı rolu barədə sualı cavablandıran səfir Türkiyənin son hərbi əməliyyatlar zamanı ölkəmizə yaxın və dost ölkə olaraq yalnız siyasi dəstək verdiyini, ölkəmizin 100 min nəfərdən ibarət nizami orduya və ən müasir hərbi texnikaya malik olduğunu və hər hansı kənar qüvvənin hərbi yardımına ehtiyacının olmadığını qeyd edib.
Bununla yanaşı, Azərbaycanın işğal olunmuş ərazilərində tarixi və dini abidələrə qarşı Ermənistan tərəfindən törədilmiş vandalizm aktları müvafiq şəkillərdən istifadə etməklə bolqar tamaşaçılarının diqqətinə çatdırılıb. Bu xüsusda, Azərbaycanın xristian mirası və ölkəmizdə mövcud multikulturalizm ənənələri barədə ətraflı məlumat verilib.

Paylaş:

Baxılıb: 577 dəfə