Mirmahmud Fəttayev: Ali Baş Komandan tərəfindən yürüdülən siyasəti təqdir edirik

Bakı:

26 °C

63 %

8 m/s

Əlaqə

AZ RU EN

Ana səhifə / Siyasət / Mirmahmud Fəttayev: Ali Baş Komandan tərəfindən yürüdülən siyasəti təqdir edirik

Mirmahmud Fəttayev: Ali Baş Komandan tərəfindən yürüdülən siyasəti təqdir edirik

27.10.2020 [09:09]

“Ermənistan silahlı qüvvələrinin sentyabrın 27-də cəbhəboyu zonada yerləşən yaşayış məntəqələrimizə qarşı törətdiyi təxribata cavab olaraq başlayan əks-hücum əməliyyatlarının uğurla davam etdiyi dövrdə işğalçı dövlət terror siyasətinin arealını genişləndirir. Belə ki, Ermənistan Ağdam, Ağcabədi, Bərdə, Beyləqan, Goranboy, Göygöl və Tərtər rayonları ilə yanaşı, Gəncə, Mingəçevir şəhərlərini, Abşeron, Xızı, Qəbələ, Kürdəmir, Siyəzən rayonlarında yerləşən yaşayış məntəqələrini də raket atəşinə tutur. Cəbhə xəttindən uzaqda yerləşən Gəncəyə, digər yaşayış məntəqələrinə raket hücumları nəticəsində mülki əhalinin qətlə yetirilməsi müharibə cinayətidir”.
Bu fikirləri “Yeni Azərbaycan”a açıqlamasında Azərbaycan Klassik Xalq Cəbhəsi Partiyasının sədri Mirmahmud Fəttayev bildirib.
M.Fəttayev deyib ki, Gəncə şəhərinə sonuncu raket hücumundan sonra 50 siyasi partiyanın beynəlxalq və regional təşkilatlara ünvanlanan müraciətində erməni vandalizmi qəti şəkildə pislənilib, işğalçı Ermənistanın məkrli niyyəti ifşa olunub: “Müraciətdə beynəlxalq ictimaiyyətin diqqətinə çatdırılır ki, Gəncə şəhərinin dinc sakinlərinin ballistik raketlərlə atəşə tutulması insan hüquq və azadlıqlarının, ümumilikdə beynəlxalq hüququn norma və prinsiplərinin kobud surətdə pozulmasıdır”.
Bununla yanaşı, dinc əhaliyə qarşı törədilən müharibə cinayətlərinə beynəlxalq səviyyədə hüquqi qiymət verilməsi tələbi ilə Klassik Xalq Cəbhəsi Partiyası adından bütün beynəlxalq təşkilatlara müraciət ünvanlamışıq. “Ermənistana silah satan dövlətlər Azərbaycan şəhərlərində və rayonlarında işğalçı ölkə tərəfindən törədilən cinayətlərə ortaq olmamaq üçün dərhal silah satışını dayandırmalıdır. Təəssüf ki, bu tələblərə seyrçi qalan, susqunluq nümayiş etdirən bəzi dövlətlər və təşkilatlar var. Halbuki təkcə Gəncəyə yox, hər gün Tərtərə, Goranboya və digər rayonlara edilən raket və artilleriya hücumları nəticəsində dinc sakinlər həlak olurlar. Terroru dövlət siyasəti vasitəsinə çevirən Ermənistanın hərbi-siyasi rəhbərliyi dinc əhalini raket atəşinə tutmaq qərarı verdiklərinə görə məsuliyyət daşıyır. Milli və beynəlxalq hüquq mexanizmlərindən istifadə etməklə cinayətkarlar ədalət mühakiməsinə cəlb edilməlidir”, - deyə M.Fəttayev bildirib.
Artıq bir aya yaxındır davam edən Vətən müharibəsinin gedişinə də toxunan M.Fəttayev onu da qeyd edib ki, Azərbaycan xalqı işğal edilən torpaqlarımızın azad olunması uğrunda aparılan əməliyyatların qələbə ilə başa çatmasını səbirsizliklə gözləyir: “Biz də ölkəmizin hər bir vətəndaşı kimi, Ali Baş Komandanın rəhbərliyi altında Azərbaycan Ordusunun Ermənistanın işğalçılıq siyasətinə qarşı genişmiqyaslı əməliyyatları dəstəkləyirik. Tərtər, Cəbrayıl, Füzuli, Xocavənd və Zəngilan rayonları ərazilərinin işğaldan azad edilməsini alqışlayırıq. Əminik ki, Azərbaycanın ərazi bütövlüyünün bərpası üçün aparılan Vətən müharibəsi qəti qələbəyə qədər davam etdiriləcək. Biz Azərbaycanın haqlı davası uğrunda mübarizə aparan dövlətimizin və ordumuzun arxasındayıq. Bu istiqamətdə Ali Baş Komandan tərəfindən yürüdülən siyasəti təqdir edirik”.
Qaşqay ZİYƏDDİNOĞLU

Paylaş:

Baxılıb: 447 dəfə