Sədaqət Vəliyeva: Torpaqlarımızın işğaldan azad olunması xalqın istəyidir

Bakı:

26 °C

78 %

9 m/s

Əlaqə

AZ RU EN

Ana səhifə / Siyasət / Sədaqət Vəliyeva: Torpaqlarımızın işğaldan azad olunması xalqın istəyidir

Sədaqət Vəliyeva: Torpaqlarımızın işğaldan azad olunması xalqın istəyidir

08.10.2020 [09:37]

“Bu gün Azərbaycan Ordusu tarix yazır. Ali Baş Komandanın güclü siyasi iradəsinə əsaslanaraq Ordumuz haqq, ədalət missiyasını yerinə yetirir”. Bu sözləri Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva deyib.
Ermənistan silahlı qüvvələrinin mülki vətəndaşlarımızı qətlə yetirməsindən sonra başlanan genişmiqyaslı əks-hücumun davam etdiyi bir neçə gün ərzində Azərbaycanın qardaş, dost Türkiyədən, Pakistandan, Ukraynadan, İsraildən və bir sıra başqa ölkələrdən, beynəlxalq təşkilatlardan tam dəstək gördüyünü bildirən S.Vəliyeva deyib: “Bununla belə, bir sıra dövlətlər və təşkilatlar növbəti dəfə ikili yanaşma tətbiq etdilər, “məsləhətlər” verdilər. Məgər həmin dövlətlər və beynəlxalq təşkilatlar Ermənistanın uşaqları, qadınları, qocaları qətlə yetirdiyini görmürlərmi? Yaxud Naftalanda üzvlərinin ikisi uşaq olmaqla bir ailənin tamamilə məhv edilməsini görmürlərmi? Məgər Ermənistan silahlı qüvvələri Tərtəri, Goranboyu, Daşkəsəni, Ağdamı və digər əraziləri bombardman edərkən beynəlxalq hüququn pozulması baş vermirmi? Lakin, Azərbaycan əhalisini qoruyarkən və işğal edilmiş tarixi torpaqlarını geri qaytararkən qanunu, hüququ pozmuş olur? Buradan da görünür ki, Azərbaycana qarşı qərəzli mövqe, ikili standartlı yanaşma açıq-aşkar ortadadır”.
Bu gün xalq-Ali Baş Komandan-Ordu birliyinin öz sözünü dediyini bildirən deputat vurğulayıb: “İnanmayanlar, Azərbaycanı “militarist” adlandıranlar gəlib öz gözləri ilə Qan Bankının qarşısında könüllü olaraq qan vermək istəyən minlərlə insanı, yaxud səfərbərlik idarələri qarşısında döyüşə könüllü getmək istəyən minlərlə vətənpərvəri görə bilərlər”.
“Torpaqlarımızın işğaldan azad olunması xalqın istəyidir. Otuz ildir, məsləhət verdikləri kifayətdir. Azərbaycan xalqı 30 il səbr etdi. Artıq işğal edilmiş torpaqlarımızın azad olunması bütün vətəndaşlarımızın əsas arzusudur”, - deyən Sədaqət Vəliyeva əlavə edib ki, döyüşlərlə, tətbiq olunmuş hərbi vəziyyətlə, şəhidlərimiz və yaralılarımızla bağlı yanlış məlumat yayanlar, xüsusilə də, Ermənistan mətbuatının və sosial mediasının yaydığı saxta xəbərləri tirajlayan radikal müxalifətçilər nəzarətə götürülməlidir. Görünür, onlar müharibə şəraitindən istifadə edib ölkədə ictimai-siyasi sabitliyi poza bilmədiklərindən sosial şəbəkələrdə təxribat törətməyə çalışırlar.
Azərbaycan xalqının Ordusuna və Ali Baş Komandanına inandığını, güvəndiyini diqqətə çatdıran Sədaqət Vəliyeva deyib: “İnanıram ki, yaxın zamanda işğal altındakı bütün torpaqlarımızın azad olunması münasibətilə bir-birimizi təbrik edəcəyik”.

Paylaş:

Baxılıb: 382 dəfə