İspaniya qəzeti Ermənistanın Azərbaycana qarşı hərbi təcavüzündən yazıb

Bakı:

25 °C

50 %

6 m/s

Əlaqə

AZ RU EN

Ana səhifə / Siyasət / İspaniya qəzeti Ermənistanın Azərbaycana qarşı hərbi təcavüzündən yazıb

İspaniya qəzeti Ermənistanın Azərbaycana qarşı hərbi təcavüzündən yazıb

20.08.2020 [08:28]

İspaniyanın “LA CLTIMA” qəzetində Azərbaycan-İspaniya Mədəniyyət və Ticarət Assosiasiyasının (ACAE) prezidenti Fərid Mustafayevin “Azərbaycanda nəinki biznes, hər kəs üçün böyük imkanlar var” sərlövhəli müsahibəsi dərc olunub.
Diasporla İş üzrə Dövlət Komitəsinin mətbuat xidmətindən AZƏRTAC-a verilən məlumatda bildirilir ki, ACAE-nin prezidenti müsahibəsində ermənilərin Azərbaycanın Dağlıq Qarabağ bölgəsini işğal etməsini sərt şəkildə pisləyib, ölkəmizə qarşı bir daha belə hərbi təcavüzlərə yol verilməyəcəyini diqqətə çatdırıb.
Azərbaycan ərazisinin 20 faizinin uzun illərdir Ermənistanın işğalı altında qalmasına diqqət çəkən Fərid Mustafayev təcavüzkar ölkənin torpaqlarımızın dərhal və qeyd-şərtsiz boşaldılması ilə bağlı beynəlxalq təşkilatların qərar və qətnamələrinə məhəl qoymadığını qeyd edib. Bildirib ki, əksinə, təcavüzkar Ermənistan silahlı qüvvələri sərhədyanı bölgələrdən və Azərbaycanın işğal olunmuş ərazilərindən ordumuzun mövqelərini atəşə tutur ki, bu da hərbçilərlə yanaşı, mülki şəxslərin də ölümünə səbəb olur. İyul ayında Ermənistanın Tovuz istiqamətində törətdiyi hərbi təxribatdan danışan F.Mustafayev vurğulayıb ki, sülhsevər Azərbaycan hər an işğalçı ölkənin hərbi təxribatları və terroru ilə üzləşə bilər.
Avropa İttifaqının və onun üzvü olan İspaniyanın hər bir ölkənin suverenliyini və ərazi bütövlüyünü qorumaq prinsipinə hörmətlə yanaşdığını bildirən F.Mustafayev deyib: “Bütün demokratik və inkişaf etmiş ölkələr bu prinsipi dəstəkləyir”.
Azərbaycanda pandemiya ilə mübarizədə görülən işlərdən danışan ACAE-nin sədri bildirib ki, ölkəmizdə bu sahədə bütün zəruri addımlar atılıb və proses davam edir. Modul tipli yeni xəstəxanaların quraşdırılması, süni tənəffüs aparatlarının alınaraq ölkəyə gətirilməsi və digər tədbirlər Prezident İlham Əliyevin birbaşa nəzarəti altında həyata keçirilir. Hazırda Azərbaycanda virusa yoluxanların sayı xeyli azalıb.
Sonda vurğulanıb ki, qədim tarixə, ənənələrə, güclü iqtisadiyyata, turizm sahəsində böyük imkanlara malik olan Azərbaycan xarici sərmayələrin qoyulması üçün münbit ölkədir və bir çox böyük şirkətlər uzun illərdir burada uğurla fəaliyyət göstərir. “Azərbaycanın tarixi-memarlıq abidələri, əsrarəngiz təbiəti və mətbəxi avropalılar, o cümlədən ispanlar üçün çox maraqlı olar. Azərbaycanda turizmin inkişafı üçün tərəfimizdən ardıcıl tədbirlər həyata keçirilir”, - deyə F.Mustafayev qeyd edib.

Paylaş:

Baxılıb: 351 dəfə