Deputat: Pandemiya dövründə kütləvi ibadətlərin təşkili virusa yoluxma hallarının sayını artıra bilər

Bakı:

19 °C

77 %

14 m/s

AZ RU EN

Ana səhifə / Siyasət / Deputat: Pandemiya dövründə kütləvi ibadətlərin təşkili virusa yoluxma hallarının sayını artıra bilər

Deputat: Pandemiya dövründə kütləvi ibadətlərin təşkili virusa yoluxma hallarının sayını artıra bilər

19.08.2020 [09:16]

Hər il Qurban, Ramazan bayramlarının, Məhərrəmlik ayının İslam dininin qaydalarına uyğun qeyd edilməsi ölkəmizdə dini etiqad azadlığının, mənəvi dəyərlərimizə bağlılığın nəticəsi olmaqla yanaşı, inanclarımıza sadiqlik kimi də yaşadılır. Lakin hazırkı reallıq odur ki, bütün sahələrdə problemlər yaradan, dini ayinlərin, mərasimlərin keçirilməsinə də təsir edən pandemiya şəraitində ibadətlər də dövrün tələblərinə uyğun həyata keçirilir. İnsanların qapalı məkanda kütləvi toplaşması ilə daha çox yoluxma hallarının baş verməməsi üçün yas mərasimlərinin daha az sayda insanın iştirakı ilə keçirilməsi əhalinin sağlamlığı üçün tətbiq olunan məhdudiyyətlərdir. Bu cür profilaktik tədbirlərə yaxınlaşmaqda olan, İslam dininin müqəddəs tarixi günlərindən sayılan Məhərrəm ayında da əməl edilməlidir.
Bunu AZƏRTAC-a açıqlamasında Milli Məclisin deputatı, Yeni Azərbaycan Partiyası Nizami rayon təşkilatının sədri Sədaqət Vəliyeva deyib.
Deputat bildirib ki, pandemiya ilə əlaqədar məscid və ziyarətgahlarda kütləvi ibadətlərin təşkili zamanı virusa yoluxma hallarının artması ehtimalı daha yüksəkdir. Sanitar-gigiyenik qaydalara əməl olunmasının vacibliyini bildirən S.Vəliyeva insanların sağlamlığının qorunması məqsədilə açıq və qapalı məkanlarda dini ayinlərin təşkilinin, kütləvi toplaşmaların yolverilməz olduğunu qeyd edərək deyib: “Hətta pandemiya səbəbindən Həcc ziyarətinin təxirə salınması virusa yoluxma hallarının qarşısının alınması və insanlara diqqətin bariz nümunəsidir. Bu səbəbdən də Məhərrəmlik ayının daha çox kütləvi şəkildə qeyd olunan Aşura günündə əvvəlki illərdən fərqli olaraq bəzi ayinlərin keçirilməsinə məhdudiyyətlər nəzərdə tutulur. Pandemiyaya görə təkcə Azərbaycanda deyil, bütün müsəlman ölkələrində həmin günün ayinlərinin evlərdə təşkili daha məqsədəuyğun hesab edilir”.
Aşura mərasiminə uşaqların aparılması məsələsinə də münasibət bildirən deputat qeyd edib: “Aşura mərasiminə uşaqların aparılması onların sağlamlığını təhlükə qarşısında qoyur. Çünki həmin mərasimdə iştirak edən insanlardan kimsə infeksion xəstəliklərin daşıyıcısı ola bilər. Koronavirus, vərəm kimi təhlükəli xəstəliklərin daşıyıcısı olan hər hansı bir şəxsin orada iştirakı onlarla başqa adamı potensial xəstəyə çevirə bilər. Hava-damcı yolu ilə yayılan bu xəstəliklər uşaqları daha tez yoluxdura bilir. Uşaqların orqanizmləri zəif və yenicə formalaşan olduğundan onlar təhlükəli və güclü viruslara daha tez yoluxurlar”.
Deputat əlavə edib ki, İslam dininin əsas qayəsi insanları birliyə, həmrəyliyə dəvət etmək, mərhəmət göstərməyə, xeyirxah əməllərə çağırmaqdır. Bu mənada pandemiya dövründə Məhərrəm ayına xas inanclar fərqli yollarla yerinə yetiriləcək və Aşura günündə xəstələrə yardım məqsədilə Mərkəzi Qan Bankında qanvermə aksiyalarının keçirilməsi, xəstəlikdən əziyyət çəkənlərə həyat verilməsi Tanrı məqamında ən böyük savab, insanlıq, mərhəmətdir. Həmin gün kimsəsiz, aztəminatlı ailələrə yardım, valideyn himayəsindən məhrum uşaqlara nəvaziş göstərmək, uşaq evlərindəki körpələrə baş çəkmək insanlıq naminə edilən xeyirxahlıqlardır.

Paylaş:

Baxılıb: 343 dəfə