Unutmaq olmaz ki, hələ pandemiya tam aradan qalxmayıb...

Bakı:

22 °C

58 %

1 m/s

Əlaqə

AZ RU EN

Ana səhifə / Siyasət / Unutmaq olmaz ki, hələ pandemiya tam aradan qalxmayıb...

Unutmaq olmaz ki, hələ pandemiya tam aradan qalxmayıb...

13.08.2020 [08:34]

Ekspertlərin fikrincə, sanitar-gigiyenik qaydalara riayət edilməməsi əldə olunan müsbət dinamikanın yenidən pozulmasına gətirib çıxara bilər
Məlum olduğu kimi, dövlət tərəfindən həyata keçirilən effektiv və təxirəsalınmaz tədbirlər yeni növ koronavirus (COVİD-19) infeksiyasının ölkəmizdə geniş yayılmasının qarşısını alıb. Belə ki, artıq avqust ayınının əvvəllərindən etibarən bu xəstəlikdən sağalanların sayı gündəlik yoluxma sayını üstələyir. Təbii ki, əldə olunan bu müsbət nəticəni qoruyub saxlamaq, yoluxma sayının artmasına imkan verməmək üçün inzibati tədbirlərlə yanaşı vətəndaş məsuliyəti də ilkin şərtlərdəndir. Vətəndaşlar dərk etməlidirlər ki, pandemiyadan qorunmaq üçün tibbi maskadan istifadə və sanitar-gigiyenik qaydalara riayət olunması vacibdir.
Məsələ ilə bağlı fikirlərini bölüşən Milli Məclisin Səhiyyə komitəsinin üzvü Müşfiq Məmmədli də bildirib ki, hazırda yoluxma sayının azalması tendensiyasını qorumaq üçün birmənalı şəkildə vətəndaşların üzərinə böyük məsuliyyət düşür. Millət vəkili qeyd edib ki, adi sanitar-gigiyenik qaydalara riayət edilməməsi əldə olunan müsbət dinamikanın yenidən pozulmasına gətirib çıxara bilər: “Avqust ayının əvvəlindən başlayaraq bir sıra yumşalmaların tətbiqi vətəndaşlarda arxayınlıq yaratmamalıdr. Bu günlərdə çimərliklərdə yaşanan izdiham, intizamsızlıq neqativ hallara gətirib çıxarar. Neqativ halların yaranmaması üçün vətəndaşlarımız mütləq şəkildə məsuliyyətli olmalı, Operativ Qərargahın tələb və tövsiyyələrinə əməl etməlidirlər. Unutmaz olmaz ki, hələ də pandemiya tam aradan qalxmayıb. Dövlətimizin və səhiyyəmizin bütün imkanları vətəndaşların sağlamlığının qorunmasına səfərbər edilib. Bunun qarşılığında vətəndaşlar qaydalara riayət etməli, xüsusi zərurət olmadıqda ictimai nəqliyyatdan istifadə edilməməlidirlər, evdə qalınmalıdır”.
Millət vəkili deyib ki, virusa qalib gəlməyin yeganə yolu məsuliyyətli davranmaq, karantin qaydalarına riayət etməkdir. Həmrəylik və sadə qaydalara əməl edilməsi həyatımızın yenidən öz adi axarına qayıtmasında mühüm rol oynayacaq.
Milli Məclisin deputatı Afət Həsənova da insanlarımızı diqqətli olmağa və Nazirlər Kabineti yanında Operativ Qərərgahın qoyduğu qaydalara riayət etməyə çağırıb. Millət vəkili bildirib ki, son günlərin statistikası, yəni yoluxmaların sayında azalma, sağalanların sayında isə artım ümidvericidir, lakin bu nəticələri uğurlu sonluğa çatdırmaq üçün hər birimiz üzərimizə düşən vəzifəni yerinə yetirməliyik: “Məlum olduğu kimi, son günlərdə sərt karantin rejiminin yumşaldılması ilə bağlı bir sıra qərarlar verilib. Lakin biz elə etməliyik ki, bu qərarlar davamlı olsun və uğurlu sonluqla nəticələnsin. Bunun üçün biz sadə qaydalara əməl etməliyik. Hesab edirəm ki, tibbi maska taxmaq, sosial məsafəni qorumaq və tələb olunan digər qaydalara riayət etməklə bu bəladan daha tez və daha az itki ilə qurtula bilərik”.
Millət vəkili onu da əlavə edib ki, post-pandemiya dövründə də hələ uzun müddət gigiyena və sosial məsafə qaydalarına riayət etmək və tibbi maska taxmaq məqsədəuyğundur: “Nəzərə almalıyıq ki, bu virus hələ uzun müddət bizimlə olacaq, yəni biz bu virusla birgə yaşamağa məcburuq. Lakin qaydalara əməl etsək, virus bizim həyatımıza o qədər də təsir etməyəcək, sərt karantin şəraitində yaşamaq məcburiyyətində qalmayacağıq”.
Pərviz SADAYOĞLU

Paylaş:

Baxılıb: 486 dəfə