Azərbaycan xalqı xarici ölkələrə sığınıb dövlətimizə və millətimizə qarşı böhtan atan bu ünsürlərin əsl riyakar, xain mahiyyətinə dərindən bələddir

Bakı:

26 °C

65 %

2 m/s

AZ RU EN

Ana səhifə / Siyasət / Azərbaycan xalqı xarici ölkələrə sığınıb dövlətimizə və millətimizə qarşı böhtan atan bu ünsürlərin əsl riyakar, xain mahiyyətinə dərindən bələddir

Azərbaycan xalqı xarici ölkələrə sığınıb dövlətimizə və millətimizə qarşı böhtan atan bu ünsürlərin əsl riyakar, xain mahiyyətinə dərindən bələddir

28.07.2020 [09:16]

Ermənistanın Tovuz rayonu istiqamətində təxribatının nəticəsiz qalması, hətta bu döyüşlərin düşmən üçün məğlubiyyətlə yekunlaşması, eyni zamanda, Azərbaycanda və dünyada azərbaycanlıların ordusuna, öz dövlətinə və Ali Baş Komandanına dəstək ifadə etmələri erməni lobbisini və havadarlarını ciddi şəkildə təşvişə salıb. Odur ki, ermənilər Azərbaycana qarşı əsas silahlarını aktivləşdirməyə- xaricdəki anti-Azərbaycan şəbəkənin daxilimizdəki antimilli ünsürlərlə sinxron şəkildə Azərbaycan dövlətinin və xalqının üzərinə hücumunu təşkil etməyə başlayıblar. Son günlər Əli Kərimli, Sevinc Osmanqızı, Arif Məmmədov, Vidadi İsgəndərli, Tural Sadıqlı, Qənimət Zahid və digər bu kimi Azərbaycan düşmənləri ermənilərin tapşırığı ilə, erməni siyasi mətbəxinin tezisləri əsasında bəyanatlar verir və çıxışlar edirlər.
Bu fikirləri AZƏRTAC-a açıqlamasında Yeni Azərbaycan Partiyası Siyasi Şurasının üzvü, “İki sahil” qəzetinin baş redaktoru Vüqar Rəhimzadə söyləyib.
Vüqar Rəhimzadə bildirib ki, bu üzdəniraq “azərbaycanlılar” xaricdəki həmvətənlərimizin Ermənistanın işğalçılıq siyasətinin əleyhinə olan aksiyalarını xuliqanlıq, quldurluq, vətənşüvənlik kimi qələmə verirlər: “Ötən həftə canlı yayım zamanı çıxış edən Sevinc Osmanqızı şübhəsiz, erməni siyasi mətbəxinin tezisləri əsasında danışaraq deyirdi ki, sizi inandırıram, heç erməni tərəfində belə təxribat niyyəti yoxdur və bu gün sivil mübarizə qaydasını pozan, bu qarşıdurmanı təşkil edən rəsmi Bakıdır. Azərbaycan dövlətinin və xalqının ünvanına yağdırılan bu şər-böhtanın adı açıq düşmənçilikdən başqa bir şey deyildir. Sevinc Osmanqızı ilə yanaşı, Ramiz Yunus, Cəmil Həsənli, Tural Sadıqlı kimi “sapı özümüzdən olan baltalar” da bu cür iyrənc fikirləri bölüşməkdədirlər. Bu şəxslər azərbaycanlıların vətənpərvərlik aksiyalarını ləkələməyə, onun mahiyyətini təhrif etməyə çalışır, bununla da, necə deyərlər, ermənilərin dəyirmanına su tökür, onların cinayətkar əməllərinə bəraət qazandırmağa cəhd edirlər. Əlbəttə ki, Azərbaycan xalqı xarici ölkələrə sığınıb dövlətimizə və millətimizə qarşı böhtan atan bu ünsürlərin əsl riyakar, xain mahiyyətinə dərindən bələddir. Amma istənilən halda diqqətli olmaq, antimilli ünsürlərin çirkin planlarının reallaşmasına imkan verməmək lazımdır”.
“Azərbaycan Respublikasının Birinci vitse-prezidenti Mehriban xanım Əliyevanın ABŞ-ın Los-Anceles şəhərində və bəzi Avropa ölkələrinin paytaxtlarında yaxın günlərdə baş vermiş hadisələrlə bağlı həmvətənlərimizə müraciəti istər erməni lobbisini, istərsə də “beşinci kolon”u ciddi şəkildə narahat etmişdir”, - deyən Vüqar Rəhimzadə əlavə edib ki, müraciətdən sonra əsas təxribatçılar beynəlxalq qanunlar qarşısında çətin vəziyyətə düşdülər: “Erməni millətçilərinin azərbaycanlılara qarşı nifrəti, aqressiyası o qədər artıb ki, onlar hətta özünü demokratiyanın beşiyi hesab edən Qərb ölkələrinin paytaxtlarında qanunsuzluq və hərc-mərclik törədirlər. Los-Ancelesdən, Brüsseldən və digər şəhərlərdən çəkilmiş, düşmənlərin həqiqi simasını göstərən zorakılıq və vandalizm kadrları xalqımıza qarşı onilliklər boyu aşılanan nifrət və Azərbaycanafobiya ideologiyasının hələ də Ermənistanda mövcud olduğunu və daha da şiddətləndiyini sübut edir. Bu da əlbəttə ki, Ermənistanın və erməni lobbisinin dünyada ciddi qınaqla, hətta sanksiyalarla qarşılaşmasına səbəb ola bilər. Mehriban xanım Əliyeva, eyni zamanda, hər gün insan hüquqlarından dəm vuran beynəlxalq təşkilatlara və QHT-lərə də müraciət etdi. Erməniləri narahat edən növbəti məqam da məhz budur. Burada artıq tərəflərdən biri fakt qarşısında qalacaq. Ya Avropa Şurası, ATƏT, “Freedom House”, “Amnesty International” və “Human Rights Watch” kimi beynəlxalq təşkilatlar Ermənistanla bağlı, ermənilərin vandalizm hərəkətləri ilə əlaqədar bəyanat verəcək, müvafiq sənəd qəbul edəcək, yaxud da bunu etməyib özlərinin ikiüzlü, ikili standartlara əsaslanan siyasət yürütdüklərini isbatlamış olacaqlar”.
Baş redaktor diqqətə çatdırıb ki, Mehriban xanım Əliyevanın çağırışına əsasən bütün dünya azərbaycanlıları birgə hərəkət etməli, azğınlaşmış düşmənə layiqli cavab vermək üçün diasporumuz bütün potensialını birləşdirməli, yağı düşmənə qarşı informasiya mübarizəmiz yalnız sivil metodlarla, hüquq müstəvisi çərçivəsində aparılmalıdır.

Paylaş:

Baxılıb: 381 dəfə